لاہور: (ویب ڈیسک) وزیراعظم عمران خان نے پنجاب میں اپنے تمام اراکین اسمبلی کو ہدایت کی ہے کہ نئے قائد ایوان کے لیے چودھری پرویز الٰہی کو ووٹ دیا جائے۔
سماجی رابطے کی ویب سائٹ ٹویٹر پر اپنے ایک بیان میں وزیراعظم عمران خان نے کہا کہ پاکستان تحریک انصاف کے تمام اراکین صوبائی اسمبلی پنجاب میں وزارتِ اعلیٰ کے انتخاب میں چودھری پرویز الہٰی کو ووٹ دیں، رائے شماری سے غیرحاضر رہنے یا جماعتی ہدایات کیخلاف ووٹ ڈالنے والے رکن کو کڑی انضباطی کارروائی کا سامنا ہو گا اور اسے نااہل قرار دیا جائے گا۔
خیال رہے کہ اتوار کو پنجاب میں نئے قائد ایوان کے لیے چودھری پرویز الٰہی کا مقابلہ پاکستان مسلم لیگ ن کے حمزہ شہباز کے ساتھ ہو گا۔ اس وقت جوڑ توڑ کی سیاست جاری ہے۔

اسلام آباد: (ویب ڈیسک) پاکستان مسلم لیگ ن کے صدر میاں محمد شہباز شریف نے کہا ہے کہ عمران خان اپنی شکست کو تسلیم کرنے کے بجائے قوم کو تقسیم کرنے کی سازش کر رہے ہیں، اپنے طرز عمل اور دھمکیوں کے ذریعے قوم کو تقسیم کر رہے ہیں۔ غداری کا مقدمہ سب سے پہلے آپ کے خلاف درج ہونا چاہیے۔
نیوز کانفرنس کے دوران پاکستان مسلم لیگ ن کے صدر کا کہنا تھا کہ عدم اعتماد کی ساری اسٹرٹیجی آخری مرحلے میں کامیابی سے ہمکنار ہو گی، عمران نیازی اپنی شکست ماننے کے بجائے قوم کو تقسیم درتقسیم کرنے کی بھیانک سازش کرنے میں مصروف ہے۔ یہ تمام آئینی اداروں کا فرض ہے تمام اقدامات اٹھائیں۔ عمران نیازی آئین وقانون کے راستے پرچلنے سے انکاری ہے۔
انہوں نے کہا کہ سپریم کورٹ کے فیصلے کے مطابق ووٹ کا حق ملنا چاہیے، عمران کے فسطایت، غیرجمہوری سوچ کو آئین وقانون کی طاقت سے دفن کریں گے، امید کرتا ہوں پرامن ماحول اورعمران خان کو تھوک کو چاٹنا ہو گا، ’بیگرز کانٹ بھی چوزر’ یہ بات پہلی مرتبہ نہیں کی، یہ بات بیسیوں مرتبہ کر چکا ہوں، بعض کرم فرماؤں نے میری بات کو ٹوئسٹ کرنے کی کوشش کی، عمران کی بیجا باتوں سے مجھے کوئی سروکارنہیں، واضح کرنا چاہتا ہوں دہائیوں سے یہ بات کررہا ہوں۔
شہباز شریف کا کہنا تھا کہ اپنے بھکاری والے بیان پر قائم ہوں، اگر کوئی قوم معاشی طور پر محکوم ہے تو اس کی سیاسی آزادی بے معنی ہے،74سال ہو گئے معاشی لحاظ سے آزاد نہیں ہیں، قرضوں پر قرض لیے جاتے ہیں، اگر ہم نے ایک آزاد قوم کی طرح زندہ رہنا ہے تو کشکول کو توڑنا ہو گا، کشکول توڑنا کوئی آسان کام نہیں ہے۔
لیگی صدر کا کہنا تھا کہ کسی جادو، ٹونے سے نہیں دن رات محنت سے جاپان، جرمنی نے اپنا مقام بنایا، جرمنی کو تقسیم کر دیا گیا تھا، مغربی جرمنی کی اکانومی، خوشحالی سے دیوار برلن منہدم ہو گئی تھی، مشرقی اور مغربی جرمنی ایک ہو گئے تھے، یہی وہ فارمولا ہے اسی طرح کشمیر ہماری جھولی میں آئے گا، اگر جرمنی ایک بیگر ہوتا تو کیا مغربی جرمنی کی جھولی میں گرتا، خود انحصاری تب ہی اچیو کر سکتے ہیں، قرضوں سے نکلنا ہو گا، اس تناظرمیں ہمیشہ یہ بات کی، میری بات کو ٹوئسٹ کرنا درست بات نہیں تھی، میری بات کوامریکا سے کونیکٹ کردیا گیا۔
اپنی بات کو جاری رکھتے ہوئے ان کا کہنا تھا کہ عمران نیازی کو اس کا مکروہ چہرہ دکھانا چاہتا ہوں، 2011میں ڈرون حملوں کے نیتجے کی وجہ سے پنجاب حکومت نے امریکا کی ایڈ سے انکار کیا تھا، آپ نے تو کہا تھا آئی ایم ایف نہیں جاؤں گا خود کشی کر لوں گا، آئی ایم ایف جانے پر خود کشی کر لیتے، کہتا ہے مغرب کو سب سے زیادہ جانتا ہوں قوم کو کیا دیا؟ غصے میں دن رات ریاست مدینہ کی مثالیں دیتے تھکتے نہیں، کارٹیل کو پاکستان لوٹنے کی تم نے کھلی اجازت دی، کیا ہوا چینی سکینڈل کی کمیشن کی رپورٹ کا؟
شہباز شریف کا کہنا تھا کہ قطر، چین کو آپ نے بدنام کیا، کس کو عمران نیازی بھاشن سنارہے ہو، قوم کو برباد کردیا، غداری کا کیس اگر بنتا ہے تو تم پر بنتا ہے، پی ٹی آئی دھرنوں کے دوران چینی صدرکا دورہ موخر ہوا، تم پرغداری کا مقدمہ بنتا ہے، چینی صدرکے دورے کے دوران ڈی چوک دھرنا ختم نہیں کیا گیا تھا، راحیل شریف کے پاس گیا، چین کے صدرکا دورہ موخر ہو جائے گا، نوازشریف سے اجازت لیکرپنڈی راحیل شریف سے ملنے گیا تھا، دھرنے کی وجہ سے سی پیک معاہدہ موخرہوا تھا، غداری کا مقدمہ سب سے پہلے آپ کے خلاف درج ہونا چاہیے۔ نیشنل سیکیورٹی کونسل میں تین ہفتے بعد خط لیکر آئے پہلے سوتے رہے، اوآئی سی میٹنگ میں امریکی وفد کوبلایا گیا، آپ نے کہا امریکا اورپاکستان کے تعلقات کوسیلبریٹ کریں گے، خط 7 مارچ کو آیا تھا تو پھر امریکا کی تعریف کرنے کی کیا ضرورت تھی، یہ چاہتا ہے ’نا کھیڈا گے نا کھیڈن دیاں گے‘۔
انہوں نے کہا کہ سعودی ولی عہد محمد بن سلمان نے پاکستان کا ہمیشہ ساتھ دیا، آپ نے سعودی عرب کے ساتھ تعلقات کو بھی بگاڑ دیا، بال ٹمپرنگ آپ کے زمانے میں شروع ہوئی، غداری، وطن پرستی میں پڑیں گے تو بات بہت دور تک جائے گی، تمام عالمی طاقتوں سے اچھے تعلقات بنانے چاہئیں، عمران نیازی نے آج پھر لوگوں کو اشتعال دلایا، مسلم لیگ (ن)کے کارکن پرامن رہیں ، اگرعمران نیازی نے آئین کے ساتھ ٹکراؤ والی صورتحال پیدا کی توقانون اپنا راستہ اپنائے گا۔

اسلام آباد: (ویب ڈیسک) وزیراعظم عمران خان نے کہا ہے کہ نوجوانوں کو کہتاہوں کہ خاموش رہنے کا وقت نہیں ہے، اچھائی اور برائی میں نیوٹرل رہیں گےتو بُرائی کا ساتھ دیں گے۔ بیرونی سازش کے خلاف سب کو احتجاج کرناچاہیے۔ عدم اعتماد پر امریکا نے اپوزیشن کیساتھ ملکر سازش کی، آج فیصلہ کریں گے سازشیوں کے خلاف کیا قانونی کارروائی کرنی ہے۔ ان کے خلاف غداری کا مقدمہ درج کرانے کا منصوبہ بنایا ہے۔
نوجوانوں کو پیغام دیتے ہوئے وزیراعظم نے کہا کہ پاکستان اس وقت فیصلہ کن موڑ پر کھڑا ہے، اس وقت پاکستان کے مستقبل کی جنگ ہے، قوموں کی زندگی میں مشکل وقت آتے ہیں، ہمیں درست راستے کا انتخاب کرنا ہے، قوم نے آج فیصلہ کرنا ہے کہ ملک کو کس طرف لے کر جانا ہے، اللہ تعالیٰ کا حکم ہے کہ اچھائی کےساتھ اور برائی کیخلاف کھڑے ہو، جو معاشرہ اچھائی کا ساتھ دیتا ہے وہ زندہ ہوجاتا ہے۔وہ قوم تباہ ہوجاتی ہے جس میں اچھے اور برے کی تمیز ختم ہوجائے۔
ان کا کہنا تھا کہ آج بیرونی سازش کے تحت سیاستدانوں کی بکروں کی طرح نیلامی ہورہی ہے، اگر نوجوان چپ بیٹھیں گے تو وہ برائی کا ساتھ دیں گے، نوجوانوں کو چاہیے کہ اپنے مستقبل کیلئے احتجاج کریں ، نوجوانوں کو کہتاہوں کہ خاموش رہنے کا وقت نہیں ہے، سازش کے خلاف سب کو احتجاج کرناچاہیے، نوجوانوں کو اپنے مستقبل کے لیے باہر آنا پڑے گا، کیا باہر کی قوت 15ارب روپے خرچ کرکے حکومت گرادے گی۔
وزیراعظم کا کہنا تھا کہ برطانیہ زندہ معاشرہ ہے وہاں اچھے بُرے کی تمیزہے، غداروں کوپرامن احتجاج سے خوف ہوتاہے، جھوٹ بول کر کسی کی حکومت گرانا برائی ہے، چاہتا ہوں قوم میر جعفر اور میر صادق نہ بھولے، کہا گیا عمران خان کو ہٹائیں گے تو آپ سے تعلقات اچھے ہوں گے، نیشنل سیکیورٹی کمیٹی اور کابینہ نے دستاویزات دیکھ لیے، آفیشل دستاویز میں کہاگیاہے عمران کو ہٹاؤ تعلقات بہتر ہو جائیں گے، شہبازشریف نے 22 کروڑ عوام کو غلام بنا کر رکھ دیا ہے، لیگی صدر پر اربوں روپے چوری کے کیسز ہیں، اپوزیشن لیڈر نے 22 کروڑ لوگوں کو بھکاری قرار دیا، اِس نے کل قوم کو غلام قرار دے دیا، جس قوم میں خودداری نہ ہو، وہ قوم کبھی بھی اوپر نہیں جاسکتی۔ نوجوانوں نے ملک کے ساتھ کھڑا ہونا ہے، یہ لوگ کہتےہیں امریکاکی غلامی کرو، نوجوانوں کو بیرونی سازش کیخلاف آواز اٹھانی چاہیے۔
شہری نے سوال کیا کہ ان کیخلاف غداری کے مقدمات کب درج کریں گے جس پر جواب دیتے ہوئے وزیراعظم نے کہا کہ میں ہمیشہ آخری گیند تک مقابلہ کرنے والا شخص ہوں۔ کل سب دیکھیں گے کہ میں کیسے ان سے مقابلہ کرتا ہوں، کل سب نے احتجاج کرنا ہے، میں چاہتا ہوں کہ قوم زندہ ہو۔ سب سے کہتا ہوں کہ آپ سب کو پرامن احتجاج کرنا چاہیے، یہ اقتدار میں اس لیے آنا چاہتے ہیں تاکہ اپنے کرپشن کیسز ختم کریں۔ وکیلوں سے مشاورت کی ہے، ملک سے غداری معاف نہیں کرینگے، سب پر کیسز بنائیں گے، آج رات تک فیصلہ کریں گے کہ ہم نے کیا کرنا ہے۔
انہوں نے مزید کہا کہ پاکستان کی فوج پر ہمیں فخر ہے وہ ملک کو اکٹھا رکھ رہے ہیں، ہمارے دشمنوں کی کوشش ہے کہ ملک 3 حصوں میں ٹوٹ جائے، مضبوط فوج ملک کی اہم ضرورت ہے، ملک میں صرف ایک ہی نیشنل پارٹی ہے، وہ پی ٹی آئی ہے، فورسز کیخلاف سازش پاکستان کیخلاف سازش ہے، سب سے کہتا ہوں کہ فوج پر کسی قسم کی تنقید نہ کریں، سوشل میڈیا پر پاک افواج کے خلاف بے بنیاد پروپیگنڈا کیا جا رہا ہے،ملک کے ساتھ ذاتی مفادات کے لیے غداری کی جا رہی ہے۔
عمران خان نے کہا کہ تحریک انصاف نے ملک کو اکٹھا کیا ہوا ہے، 40 سال بعد امریکا میں مہنگائی کا ریکارڈ ٹوٹ گیا، آج ملک کی تاریخ میں ریکارڈ ایکسپورٹ میں اضافہ ہوا ہے، ن لیگ کے دور میں ایکسپورٹ میں اضافہ نہیں ہوا۔ مدینہ کی ریاست کی بنیاد انصاف، انسانیت اور خودداری پر رکھی گئی تھی۔ شہبازشریف، نوازشریف او ر آصف زرداری کرپٹ ترین لوگ ہیں، یہ باہر کی سازش کا حصہ بن کر ملک پر مسلط ہوتے ہیں، کبھی بھی کوئی قوم بھکاریوں کی طرف، اپنے لوگوں کو قربان کر کے ترقی نہیں کرتی۔
برطانیہ سے ایک لیڈی ڈاکٹر نے سوال کے جواب میں انہوں نے کہا کہ یہ پاکستان بھٹو والا پاکستان نہیں، بدل چکا ہے، یہ سوشل میڈیا کا زمانہ ہے سب کو سمجھ آگئی ہے کیا ہو رہا ہے، سازش کا پوری قوم کا پتا چل گیا ہے، سب سے بڑا کرپٹ سازشی ٹولہ پیسے چلا رہا ہے، 30 سالوں سے یہی حکومت کرتے رہیں قوم انہیں برداشت نہیں کرے گی، کل دنیا کوپتا چلے ہم زندہ قوم ہیں، بے فکر ہو جائیں، کل اسمبلی میں ان کو شکست دے کر دکھاؤں گا۔
ایک اور سوال کے جواب میں وزیراعظم کا کہنا تھا کہ پاکستان کی اخلاقیات ایسی نہیں تھی، ملک کی بدقسمتی 1985ء سے شروع ہوئی جب نوازشریف وزیراعلیٰ بنا، نوازشریف نے لفافہ جرنلزم، ججز کو پلاٹ دیئے، آصف زرداری، نوازشریف نے ملکر ملک میں اچھے اور بُرے کی تمیزختم کر دی، اگر ملک میں امربالمعروف ہوتا تو کیا سندھ ہاؤس میں لوگوں کو خرید سکتے تھے؟ قوم کا سب سے بڑا جرم ہو گا اگر امریکا کی رجیم چینج کی سازش کے خلاف کھڑے نہ ہوئے۔ شہبازشریف ہے ہی غلام، پیسے کی پوجا کرتے ہیں، نوازشریف 3 سالہ دور میں 18فیکٹریاں بناچکا تھا، جب تک عوام پُرامن احتجاج نہیں کریں گے سازشیں ہوتی رہیں گی، سازش کا پوری قوم کو پتا چل گیا ہے، عمران خان سب سے بڑا کرپٹ سازشی ٹولہ پیسے چلارہا ہے، 30 سال سے یہی حکومت کرتے رہے، قوم انہیں برداشت نہیں کرے گی۔
عمران خان کا کہنا تھا کہ کل اسمبلی میں ان کوشکست دے کر دکھاؤں گا۔ ووٹنگ کے حوالے سے ایک سے زائد پلان ہے، انشااللہ جیتیں گے، قوم کبھی بھی ان چوروں کواقتدارمیں واپس نہیں آنے دے گی، خیبرپختونخوا میں جن علاقوں میں پی ٹی آئی کمزور وہاں سے جیت گئے، عوام کا موڈ بتا رہا ہے، خیبرپختونخوا کا رزلٹ دیکھ کرایم این ایز کو خوف آ گیا ہے، (ن) لیگ کی ٹکٹ لیکر نہیں جیت سکتے، منحرف اراکین اب ڈرنا شروع ہو گئے، منحرف اراکین نے اگر ووٹ ڈالا تو اس سازش کا حصہ بن جائیں گے، مجھے کل رات سے منحرف اراکین کے فون آنا شروع ہوگئے ہیں، کل آپ رزلٹ دیکھیں گے۔

اسلام آباد: (ویب ڈیسک) وزیراعظم عمران خان کیخلاف تحریک عدم اعتماد کے معاملے پر اسلام آباد میں اتوار اور پیرکو دفعہ 144 نافذ کرنے کا فیصلہ کر لیا۔
نوٹیفکیشن کےمطابق انتظامیہ نےاسلام آباد میں امن و امان قائم رکھنے کیلئے دفعہ 144 نافذ کی۔ اسلام آباد میں سیکیورٹی کے تحفظ کو برقرار رکھنےکے لیے ایف سی، رینجرز اور پنجاب پولیس کو طلب کر لیا گیا ہے۔
اسلام آباد میں کل میٹرو بس سروس معطل رکھے جانے کا نوٹیفکیشن بھی جاری کردیا گیا۔ ڈبل سواری پرپابندی ہوگی۔ ریڈزون بھی سیل کردیا گیا۔