لاہور: (ویب ڈیسک) چھینہ گروپ نے چودھری پرویز الٰہی کی وزیر اعلیٰ پنجاب کے لئے حمایت کر دی ہے۔
پنجاب میں حکومت سازی میں بڑی پیش رفت سامنے آئی ہے، حکومتی اتحاد کا بڑا بریک تھرو، وزیر اعلیٰ کے امیدوار چودھری پرویزالٰہی سے چھینہ گروپ نے ملاقات کی، ملاقات میں چھینہ گروپ کے 14ارکان پنجاب اسمبلی شریک ہوئے اور پرویز الٰہی کی حمایت کا اعلان کیا۔
ملاقات میں چھینہ گروپ کے ارکان پنجاب اسمبلی غضنفر عباس چھنیہ، عامر عنایت شاہانی، علی رضا خان خاکوانی، اعجاز سلطان بندیشہ ،محمد احسن جہانگیر، گلریز افضل گوندل، خواجہ داؤد سلیمانی، سردار محی الدین کھوسہ، کرنل غضنفر عباس شاہ، تیمور علی لالی، سردار شہاب الدین سیہڑ، فیصل فاروق چیمہ، اعجاز خان، غلام علی، اصغر خان لہری شریک تھے۔
خیال رہے کہ چودھری پرویزالٰہی نے گزشتہ روز بھی چھینہ گروپ سے حمایت کیلئے ملاقات کی، چھینہ گروپ نے حتمی فیصلے کے لئے 24 گھنٹے کا وقت مانگا تھا اور آج گروپ نے ملاقات میں چودھری پرویز الٰہی کی حمایت کا باضابطہ اعلان کر دیا ہے۔

اسلام آباد: (ویب ڈیسک) وفاقی وزیر اطلاعات فواد چودھری نے کہا ہے کہ لیگی صدر شہباز شریف گھر بیٹھے ہی وزیراعظم بن گئے، باپ بیٹے کی ضمانتیں منسوخ کرائیں گے، اتوار کو بہت سار ےلوگوں کے خواب چکنا چور ہونگے۔ کل انشااللہ پرویزالہی چیف منسٹرہوں گے۔
وفاقی وزیر حماد اظہر، وزیراعظم کے معاون خصوصی ڈاکٹر شہباز گل کے ہمراہ میڈیا سے گفتگو کرتے ہوئے انہوں نے کہا کہ مسلم لیگ ن کے صدر شہبازشریف نے کہا خط دکھایا جائے تو ساتھ دوں گا، شہبازشریف کو بلایا گیا اور وہ نہیں آئے، یہ اس لیے نہیں آئے ان کو تو اس سازش کا پتا ہے، رات کو تین غلام خواجہ آصف، احسن اقبال، شاہد خاقان عباسی پریس کانفرنس کررہے تھے، خواجہ آصف کہتے ہیں امریکا نے تو ڈرپ لگائی ،امریکا نے ڈرپ نکال لی توکیا ہوگا۔
انہوں نے مزید کہا کہ والد وزیراعظم، بیٹا چیف منسٹر کا امیدوار بن گیا، کوئی شرم کوئی حیا ہوتی ہے، صبح عدالت سے کہیں گے ان کیخلاف عدالتی کارروائی کو شروع کریں، باپ، بیٹا دونوں پر ہی کیسز ہیں، ان کی جو شیروانیاں سلوائی رہ جائیں گی، پاجامے نہیں ملیں گے، منحرف اراکین کے خلاف کارروائی آگے بڑھے گی، قانونی ٹیم نے اپنی حکمت عملی طے کرلی۔ وفاقی ایجنسی کی رپورٹ کے بعد وزیراعظم کی سیکیورٹی کو بڑھادیا گیا ہے، سیکیورٹی کے حوالے سے ضروری اقدامات اٹھائے گئے ہیں، بہت سارے لوگوں کے خواب چکنا چورہوں گے، شہبازشریف گھربیٹھے ہی وزیراعظم بن گئے ہیں۔
فواد چودھری کا کہنا تھا کہ حنا ربانی کھر بھی رات کو بڑی باتیں کررہی تھیں، یہ سارے بے شرم لوگوں کا ٹولہ ہے، پاکستان کے لوگ اس سازش کو پہچان گئے ہیں، آج ملک میں مظاہروں میں شرکت کرنے والے ہمارے ہیروہیں، پاکستان کی قیادت غیرت مند لیڈرکے پاس رہے گی، یہ ملک ڈرپ کے سہارے نہیں چل سکتا۔ ہماری پارٹی جمہوری پارٹی ہے، آئین سے باہر کوئی کام نہیں کرینگے، کل انشااللہ پرویزالہی چیف منسٹرہوں گے، چوروں کے گروپ کی سوچ ہی ٹرانسفر، پوسٹنگ جتنی ہے پتا نہیں کب بڑے ہوں گے، یہ اسی لیے ٹرانسفر، پوسٹنگ کے لیے آنا چاہتے ہیں۔کل سے مجھے وزارت قانون کا چارج مل رہا ہے۔
وفاقی وزیر حماد اظہر نے کہا کہ آج شہبازشریف اپنی حکومت کے بڑے فضائل بیان کر رہے تھے، مسلم لیگ سے ہمیں بینک کرپٹ حکومت ملی تھی، آج زرمبادلہ کے ذخائر ریکارڈ سطح پر ہے، مسلم لیگ (ن) نے فیٹیف کی تلوار لٹکائی تھی، جون میں ہم گرے لسٹ سے نکلنے کا پورا یقین ہے، ہماری حکومت نے قطر کے ساتھ سستا ایل این جی کا سودا کیا، مسلم لیگ کی حکومت نے مہنگے معاہدے کیے تھے۔ اقامے رکھنے والے پاکستان پرمسلط رہے، بین الاقوامی سازش کے تحت فارن پپٹس کی حکومت بنانے کی کوشش کی جارہی ہے، ہم فارن پپٹس کویہاں حکومت قائم نہیں کرنے دیں گے۔
اس موقع پر ڈاکٹر شہباز گل نے کہا کہ آج بچوں کا وزیراعظم پریس کانفرنس کر رہا تھا، اتوار والے دن شہبازشریف کا خواب کرچیاں، کرچیاں ہوتے نظرآئے گا، اگرانہوں نے کامیاب ہونے کی کوشش کی تو ایک، ایک پاکستانی ان غداروں سے بدلہ لے گا، اگر شہبازشریف نے وزیراعظم بننا ہے تو نائب وزیراعظم مقصود چپڑاسی کو بنانا چاہیے، پاکستان کے دن اتنے برے نہیں شہبازشریف جیسا شخص وزیراعظم بنے۔

راولپنڈی: (ویب ڈیسک) آرمی چیف جنرل قمر جاوید باجوہ سے افغانستان سے متعلق امریکا کے سابق مندوب زلمے خلیل زاد نے ملاقات کی ہے۔
پاک فوج کے شعبہ تعلقات عامہ (آئی ایس پی آر) کی طرف سے جاری کردہ بیان کے مطابق ملاقات میں باہمی دلچسپی کے امور اور علاقائی سکیورٹی صورتحال پر تبادلہ خیال کیاگیا۔ ملاقات میں افغانستان اور مختلف شعبوں میں دوطرفہ تعلقات پر بھی بات چیت کی گئی۔
آئی ایس پی آر کے مطابق آرمی چیف نے افغانستان میں انسانی بحران کے خطرے سے نمٹنے کیلئے عالمی کوششوں کی ضرورت پر زور دیا۔
آئی ایس پی آر کا کہنا ہے کہ آرمی چیف نے اسلام آباد سکیورٹی ڈائیلاگ میں شرکت پر زلمے خلیل زاد کا شکریہ اداکیا۔ زلمے خلیل زاد نے علاقائی استحکام کیلئے پاکستان کے کردار کو سراہا۔
بیان کے مطابق زلمے خلیل زاد نے پاکستان کے ساتھ ہرسطح پر سفارتی تعاون کیلئے کردار ادا کرنے کا عہد کیا۔

اسلام آباد: (ویب ڈیسک) وزیراعظم عمران خان نے کہا ہے کہ تحریک عدم اعتماد کے معاملے پر اتوار کو بڑا سرپرائز دینگے۔
ان خیالات کا اظہار وزیراعظم نے سینئر صحافیوں کے ساتھ ملاقات کے دوران کیا۔
وزیراعظم کا کہنا تھا کہ لیگل پراسس کو استعمال کیا جا رہا ہے، ہر گیند تک لڑوں گا، اتوار کو بہت انجوائے کریں گے، تحریک عدم اعتماد ایک بہت بڑی بین الاقوامی سازش ہے، میری زندگی کو بالکل خطرہ ہے، اپوزیشن کی جانب سے کردار کشی کے حوالے سے کوئی آڈیو ٹیپ نکالی جاسکتی ہے۔
عمران خان نے کہا کہ اپوزیشن کی جانب سے میری کردار کشی بھی کی جا سکتی ہے، اپوزیشن کا ایک ماضی ہے ججز کی بھی مختلف ٹیپ نکالتے رہتے ہیں، نیب ایک آزاد ادارہ ہے، عدالتیں آزاد ہیں، خیبرپختونخوا کی عوام نے تحریک انصاف پراعتماد کیا۔ اوآئی سی کانفرنس کی وجہ سے لیٹر کو ہولڈ رکھا۔
وزیراعظم نے کہا ہے کہ ایک بڑا طاقتور ملک دورہ روس پر غصہ ہوگیا، کیا حکومت کو ہٹانے کیلئے کوئی ملک اس طرح دھمکی دے سکتا ہے، اچکنیں سلوانے والے کہتے ہیں امریکا کو ناراض نہیں کرنا چاہیے، ان لوگوں کی وجہ سے ملک اس حال کو پہنچا۔
وزیراعظم عمران خان نے تقریب سے خطاب کرتے ہوئے کہا کہ لوگ کہتے ہیں شاید ووٹ کیلئے ریاست مدینہ کی بات کرتا ہوں، ریاست مدینہ کی کامیابی تاریخ کا حصہ ہے، لوگوں کو ریاست مدینہ کا ماڈل ہی سمجھ نہیں آیا، ہم نے سکیورٹی سے متعلق کبھی بات نہیں کی، ہمارے دماغ میں ہمیشہ سکیورٹی کا مطلب فوج تھا، امیر اور غریب میں فرق سے لوگوں میں بے چینی پیدا ہوتی ہے، سکیورٹی ڈائیلاگ ملک کیلئے بہت اہم ہیں، تعلیم اور صحت کے نظام میں فرق پیدا کر دیا گیا، کوئی بھی معاشرہ قانون کی حکمرانی کے بغیر ترقی نہیں کرسکتا، ملک پر اشرافیہ نے قبضہ کیا ہوا ہے۔
عمران خان کا کہنا تھا کہ منی لانڈرنگ کی بڑی وجہ مجرموں کو سزائیں نہ ملنا ہے، کرپٹ لوگ غریب ملکوں کا پیسہ باہر لے جاتے ہیں، مخصوص طبقہ غریب عوام کو آگے نہیں بڑھنے دیتا، کوئی بھی معاشرہ قانون کی حکمرانی کے بغیر ترقی نہیں کرسکتا۔ انہوں نے کہا کہ کیوبا نے پابندیوں کے باوجود ترقی کی، کرپٹ لوگ پیسہ چوری کر کے امیر ممالک میں رکھتے ہیں، خود مختار خارجہ پالیسی ملک کیلئے ضروری ہے، بہترین خارجہ پالیسی ملکی مفادات کو ترجیح دیتی ہے، ماضی میں افغان جنگ میں شراکت دار رہے، افغان جنگ میں شراکت داری مالی امداد کیلئے تھی یا افغانوں کی مدد کیلئے ؟ روس جانے پر نتائج کی دھمکیاں دی گئیں، کیا کسی خود مختار آزاد ملک کو ایسی دھمکیاں دی جاسکتی ہیں؟۔