تھائی لینڈ: (ویب ڈیسک) تھائی لینڈ میں جنگلی حیات پر ویڈیو بنانے والے مشہور یوٹیوبر جوکو سائپاوٹ اکثر جنگلات میں سانپوں اور دیگر جانوروں کے پیچھے بھاگتے نظرآتے ہیں۔ اب انہوں نے ٹیرنٹیولا مکڑی کی ایک نئی قسم دریافت کی ہے جو بانس کے اندر چھپ کر رہتی ہے۔
جوکو خود بھی حشرات کی معلومات رکھتے ہیں لیکن انہوں نے تصاویر اور ویڈیو کیڑے مکوڑوں کے ایک ماہر کو بھیجی ۔ وہاں سے بتایا گیا کہ یہ مکڑی ایک نائی دریافت ہے اور اس سے قبل سائنسی لٹریچر میں اس کا کوئی ذکر نہیں ملتا۔ عام ٹیرنٹیولا کےبرخلاف یہ بانسوں کے اندونی کھوکھلے حصہ میں ہی رہتی ہے اور اپنی خوراک کے وقت باہر نکل کر دوبارہ اپنے گھر چلی جاتی ہے۔
نئی مکڑی کو’ٹاک سائنس‘ کا نام دیا گیا ہے جو تھائی لینڈ کے بادشاہ ٹاک سائن کے نام پر رکھا گیا ہے۔ 1767 میں ایوتھایا سلطنت کے زوال کے بعد ٹاک سائن نے ملک کو سنبھالا اور نئے تھائی لینڈ کی بنیاد رکھی تھی۔
دوسری جانب یہ پہلی ٹیرنٹیولا مکڑی ہے جو شمالی تھائی لینڈ میں دیکھی گئی ہے۔ ایشیائی خطے کی ٹیرنٹیولا یا تو درختوں پر کودتی پھرتی ہیں یا پھر زمین میں سوکھے پتوں کا مسکن بناتی ہیں۔ تاہم یہ نئی نوع ایشیائی بانس کے تنے کو گھربنانا پسند کرتی ہے۔ اس طرح ٹیرنٹیولا اندر کھوکھلی سطح پر اپنا گھر بناتی ہے۔

فلوریڈا: (ویب ڈیسک) امریکی ماہرین کی ایک ٹیم نے دریافت کیا ہے کہ چڑھتی تاریخوں میں جب آسمان پر چاند زیادہ روشن اور بڑا ہوتا ہے، دنیا بھر میں شارک کے حملے بھی بڑھ جاتے ہیں۔
لیکن ایسا کیوں ہوتا ہے؟ اس بارے میں وہ بھی اب تک کچھ نہیں جان سکے ہیں۔
اس سے بھی زیادہ حیرت انگیز بات یہ معلوم ہوئی ہے کہ چڑھتے چاند کی تاریخوں میں شارک کے زیادہ تر حملے دن کی روشنی میں ہوئے ہیں۔
یعنی یہ نہیں کہا جاسکتا کہ شارک مچھلیاں رات کے وقت چاند کی روشنی سے متاثر ہو کر لوگوں پر بلا وجہ حملے کرتی ہیں۔
لیوزیانا اسٹیٹ یونیورسٹی اور فلوریڈا یونیورسٹی کے سائنسدانوں نے اس مشترکہ تحقیق کےلیے ’انٹرنیشنل شارک اٹیک فائلز‘ (ISAF) نامی عالمی ادارے کے فراہم کردہ اعداد و شمار استعمال کیے جو 1958 سے باقاعدہ طور پر مرتب کیے جارہے ہیں۔
ان اعداد و شمار سے پتا چلتا ہے کہ 1958 سے 2016 کے دوران شارک مچھلیوں نے دنیا بھر میں 2,785 مرتبہ بغیر کسی وجہ کے انسانوں پر حملے کیے ہیں۔
ماہرین نے ان حملوں کے مقامات، مقامی وقت اور آسمان میں چاند کی کیفیت جیسی تفصیلات جمع کرنے کے بعد ان کا تجزیہ کیا تو معلوم ہوا کہ چڑھتے چاند کی تاریخوں میں شارک مچھلیوں کے ’بے وجہ‘ حملے واضح طور پر زیادہ تھے۔
اس کے برعکس گھٹتے چاند کی تاریخوں میں ان حملوں کی تعداد بہت دیکھی گئی۔
البتہ جس بات نے سائنسدانوں کو چکرا دیا، وہ یہ تھی کہ چاند کی بڑھتی تاریخوں میں شارک مچھلیوں کے زیادہ حملے دن کی روشنی میں ہوئے تھے کہ جب آسمان پر چاند ضرور موجود تھا لیکن سورج کے مقابلے میں اس کی روشنی نہ ہونے کے برابر تھی۔
کیا شارک مچھلیوں پر چاند کی کششِ ثقل اثر انداز ہوتی ہے جو انہیں لوگوں پر حملے کرنے کےلیے مجبور کرتی ہے؟ سائنسدانوں کے مطابق، اس بارے میں کچھ بھی کہنا فی الحال قبل از وقت ہوگا۔
ریسرچ جرنل ’فرنٹیئرز اِن میرین سائنس‘ کے تازہ شمارے میں شائع ہونے والی اس رپورٹ میں ماہرین نے لکھا ہے کہ فی الحال ان کے پاس اتنے زیادہ اعداد و شمار نہیں کہ وہ شارک کے زیادہ حملوں کو چڑھتے چاند کا نتیجہ قرار دے سکیں۔
موجودہ معلومات اس طرف اشارہ ضرور کرتی ہیں لیکن حتمی نتیجے کےلیے زیادہ وسیع اور تفصیلی تحقیق کی ضرورت ہوگی۔

کراچی: (ویب ڈیسک) کراچی میں وائلڈ لائف فوٹوگرافی کی نمائش ہوئی جس میں رکھی گئی تصویروں میں قدرتی ماحول کی حفاظت اور جانوروں سے محبت کی ترغیب کے علاوہ معدوم ہوتی نسلوں کی اہمیت اجاگر کی گئی۔
کراچی میں وائلڈ لائف فوٹوگرافی پر مبنی نمائش ہوئی جس میں ساوتھ ایشیا کے نادر پرندوں اور جانوروں کی تصاویر پیش کی گئیں۔ ان تصاویر کو پاکستان کے دور دراز علاقوں اور جنوبی ایشیا کے دیگر کئی ممالک میں اتارا گیا تھا۔ نمائش کے ذریعے پرندوں اور جانوروں کی معدوم ہوتی نسلوں کی خوبصورتی اور اہمیت اجاگر کی گئی۔
قدرتی ماحول اور وائلڈ لائف سے دلچسپی رکھنے والے افراد اس نمائش کو دیکھنے پہنچے اور تصاویر کو سراہا۔ یہ نمائش 25 جنوری تک کراچی کی مقامی آرٹ گیلری میں جاری رہے گی۔