لاہور: (ویب ڈیسک) پاکستان کرکٹ ٹیم کے اوپننگ بلے باز فخر زمان نے کہا ہے کہ آسٹریلیا کو کسی بھی صورت آسان حریف نہیں سمجھا جا سکتا، لاہور میں کراؤڈ ہمیشہ سپورٹ کرتا ہے، امید ہے ون ڈے سیریز میں اچھا پرفارم کریں گے۔
ورچوئل پریس کانفرنس کرتے ہوئے فخر زمان نے کہا کہ آسٹریلیا مضبوط سائیڈ ہے اور پاکستان کو ہوم گراؤنڈ کا فائدہ ہے، ہماری کوشش ہوگی تمام تینوں ون ڈے جیتیں، آسٹریلیا ٹیم کے بڑے نام نہیں ہیں اس سے فرق تو پڑتا ہے، مگر جو ٹیم ایرون فنچ کے پاس ہے اسے بھی کمزور نہیں کہہ سکتے نا ہلکا لے سکتے۔
انہوں نے مزید کہا کہ لاہور میں ہمیشہ اوس فیکٹر ہوتا ہے، مگر اتنا فرق نہیں پڑیگا، یہاں زیادہ رنز بنتے ہیں، 300 کے قریب ٹارگٹ اچھا ہوگا، آسٹریلیا سے ٹیسٹ سیریز میں اچھی کرکٹ ہوئی، مجھے مزہ آیا۔
ان کا کہنا تھا کہ بابر اعظم نے پلیئرز کو واضح پیغام دیا ہے کہ تینوں میچز جیتنے ہیں۔

لاہور: (ویب ڈیسک) پاکستان کے خلاف ون ڈے سیریز سے پہلے آسٹریلوی ٹیم سخت مشکلات کا شکار ہوگئی۔ آسٹریلوی ٹیم کے میڈیا مینیجر کے مطابق آسٹریلیا کے وکٹ کیپر کا کوویڈ ٹیسٹ پازیٹو آگیا ہے۔
وکٹ کیپر جوش اینجلز پانچ روز آئسولیشن میں رہیں گے۔ وہ 29 اور 31 مارچ کو شیڈول ایک روزہ میچز نہیں کھیل سکیں گے۔ پانچ روز تنہائی میں گزارنے کے بعد دوبارہ ان کا کوویڈ ٹیسٹ لیا جائے گا۔نیگیٹو رپورٹ آنے پر وہ کھیلنے کے لیے دستیاب ہوسکیں گے۔
آسٹریلیا کے دوسرے تمام ارکان کا کوویڈ ٹیسٹ منفی آیا ہے۔دوسری جانب فاسٹ بولر مچل مارش کی میڈیکل رپورٹس ٹیم انتظامیہ کو مل گئی ہیں۔ان رپورٹس کے مطابق مچل مارش پہلے میچ سے باہر ہوگئے ہیں۔
امکان ہے کہ مچل مارش دوسرے اور تیسرے میچ میں دستیاب ہوسکیں گے۔مچل مارش گزشتہ روز ٹریننگ سیشن میں فیلڈنگ کرتے وقت کولہے کی انجری کا شکار ہوئے تھے ۔ ترجمان ٹیم کا کہنا ہے کہ مچل زیر علاج رہیں گے اور فٹنس کلیئرنس کے بعد سیریز میں کھیل سکیں گے۔

کراچی: (ویب ڈیسک) پاکستان نمبر ون ٹینس کھلاڑی عقیل خان نے کھیل سے ریٹائرمنٹ کا عندیہ دے دیا۔
کئی برسوں سے ٹینس کے قومی چیمپیئن چلے آرہے عقیل خان کا کہنا ہے کہ اب ٹینس کھیلتے کھیلتے بری طرح تھک چکا ہوں۔
پشاور کے مشہور کھیلوں کے گھرانے سے تعلق رکھنے والے عقیل خان کا کہنا ہے کہ 42 برس کی عمر میں میرا جسم مزید کھیلنے کی اجازت نہیں دے رہا۔
عالمی اور قومی سطح پر پاکستان کی نمائندگی کرتے ہوئے لاتعداد اعزازات پانے والے عقیل خان مزید کہتے ہیں کہ ڈیوس کپ کے دو تین ریکارڈ کے قریب ہوں، خواہش ہے کہ وہ ریکارڈ اپنے نام کرنے کے لیے مزید دو سے تین برس ٹینس سے جڑا رہوں، لیکن اس کا انحصار میری فٹنس پر ہے۔

میامی: (ویب ڈیسک) الیگزینڈر زوریو نے میک میکڈونلڈ کو میامی اوپن ٹینس ٹورنامنٹ میں شکست دیدی۔
امریکہ میں جاری ٹینس ٹورنامنٹ کے دلچسپ مقابلے میں جرمنی کے سٹار نے امریکی حریف کے خلاف شاندار کارکردگی کا مظاہرہ کرتے ہوئے فتح اپنے نام کی۔
دونوں کھلاڑیوں کے مابین میچ سکور چھ دو اور چھ دو رہا۔