اسلام آباد: (ویب ڈیسک) سرکاری ملازمین کیلئے اچھی خبر، حکومت نے عیدالفطر سے قبل تنخواہوں کی ادائیگی کا فیصلہ کرلیا۔
حکومت نے عیدالفطر سے قبل تنخواہوں کی ادائیگی کیلئے نوٹیفکیشن جاری کر دیا۔ نوٹیفکیشن کے مطابق سرکاری ملازمین کو عید کی چھٹیوں سے قبل تنخواہ ادا کی جائیگی۔ سرکاری ملازمین کو تنخواہوں کی جلد ادائیگی عیدالفطر کی وجہ سے کی جائے گی۔

لندن : (ویب ڈیسک) نائب صدر پیپلز پارٹی سینیٹر شیری رحمان سینیٹر شیری رحمان کا کہنا ہے کہ تحریک انصاف کے تمام ناکام سیاستدانوں کو چیئرمین بلاول بھٹو زرداری کی سیاست سے خوف ہے۔
انہوں نے کہا ہے کہ پی ٹی آئی چیئرمین بلاول بھٹو کے عوامی مارچ سے بھی اتنا ہی پریشان تھی جتنا اب ان کے لندن کے دورے سے ہے۔بلاول بھٹو زرداری عمران خان اور ان کے ترجمانوں کے اعصاب پر سوار ہیں۔
ان کا کہنا ہے کہ نوجوان سیاستدان نے عدم اعتماد تحریک کی قیادت کر کے ثابت کر دیا وہ اس ملک کی سیاست کا مرکز ہیں۔مخالفین کے پاس جب سیاسی جواب نہیں ہوتے تو ذاتیات پر اتر آتے ہیں۔
انہوں نے کہا ہے کہ ان کی بدزبانی اور بدتمیزی سے اندازہ ہوتا ہے کہ ہمارے نوجوان قائد نے ان کی سیاسی دکان بند کر دی ہے۔اب بد تہذیبی اور گالم گلوچ کی نہیں، پارلیمان، آئین اور جمہوریت کی سیاست ہوگی۔

لاہور: (ویب ڈیسک) پاکستان کیلئے بڑا اعزاز، اخوت کے بانی ڈاکٹر امجد ثاقب کا نام نوبیل امن انعام کیلئے نامزد کر دیا گیا۔ انہیں غربت کے خاتمے کیلئے کوشش اور انسانیت کی خدمت پر نامزد کیا گیا۔
ڈاکٹر امجد ثاقب کا کہنا تھا کہ ساری خدمات صرف رضائے الٰہی کیلئے انجام دیتے ہیں، قرض حسنہ کا پروگرام چند ہزار روپے سے شروع کیا تھا، ملک بھر سے 50 لاکھ افراد کو قرض حسنہ دیا گیا، ضرورت مندوں کو بغیر سود قرض حسنہ دیا جاتا ہے، رواں مالی سال 40 ارب روپے بلاسود قرض حسنہ کا ہدف پورا ہوگا، سرمایہ دارانہ نظام نے لوگوں سے اعتماد چھین لیا ہے، کوئی بھی شخص اپنا نام خود نوبیل پرائز کیلئے نامزد نہیں کرسکتا۔
امجد ثاقب نے کہا کہ اخوت فلاح انسانیت کیلئے ایک مکمل نظام ہے، ہم مکمل خود اعتمادی کے ساتھ لوگوں کو قرض حسنہ دیتے ہیں، اخوت اب تک 50 لاکھ افراد کو مائیکرو فنانسنگ سے مستفید کرچکا، آج 162 ارب سے قرض حسنہ پروگرام سب سے بڑا منصوبہ بن گیا ہے، نوبیل انعام کیلئے نامزدگی پر خوشی ہے، دیگر ممالک میں بھی ہمارے ماڈل کو اپنا نے پر کام کیا جا رہا ہے، غربت کوعجائب گھر کی زینت بنانا چاہتے ہیں۔

لاہور : (ویب ڈیسک) شیر خدا ، خلیفہ چہارم ، امیر المومنین حضرت علیؓ کا یوم شہادت آج 21 رمضان المبارک کو نہایت عقیدت و احترام سے منایا جا رہا ہے ۔
یوم علیؓ کی مناسبت سے ملک بھر کی مساجد ، امام بارگاہوں اور مختلف مقامات پر سیمینار اور تقریبات ہوں گی جن میں علماء اور ذاکرین حضرت علیؓ کی حیات مبارکہ اور اسلام کیلئے خدمات پر روشنی ڈالیں گے ۔ یوم علیؓ کی مناسبت سے لاہور مین مرکزی جلوس مبارک حویلی سےبرآمد ہو چکا ہے جو شام 5بجےکربلا گامے شاہ پہنچ کر اختتام پزید ہو گا۔
پنجاب میں مجموعی طور پر 234 جلوس برآمد ہو رہے ہیں جبکہ صوبہ بھر میں 868 مجالس برپا ہوں گی ۔ حفاظتی اقدامات کے طور پر ماتمی جلوسوں کی گزر گاہوں کو کنٹینرز لگا کر بند رکھا گیا ہے ، راستے میں آنے والے کاروباری مراکز بھی بند رکھے گئے ہیں ۔

اسلام آباد : (ویب ڈیسک) سابق وفاقی وزیر اسد عمر نے کوئٹہ کراچی شاہراہ کو پی ٹی آئی حکومت کا منصوبہ قرار دے دیا۔ کہا۔ کوئٹہ کراچی شاہراہ کا 2 ماہ پہلے کنٹریکٹ فائنل ہو چکا۔
پی ٹی آئی رہنما اسد عمر نے حکومت پر تنقید کرتے ہوئے کہا ہے کہ امپورٹد حکومت کوئی کام خود کرے گی یا عمران خان دور کے مکمل منصوبوں کا افتتاح کرے گی؟
انہوں نے سوشل میڈیا ویب سائٹ ٹوئٹر پر ایک پیغام میں کہا ہے کہ اسلام آباد میٹرو کے بعد اب کوئٹہ کراچی شاہراہ۔
ان کا کہنا ہے کہ کوئٹہ کراچی شاہراہ کا 2 ماہ پہلے کنٹریکٹ فائنل ہو چکا۔ مراد سعید سینیٹ میں منصوبہ کے افتتاح کا اعلان بھی کر چکے ہیں۔
انہوں نے مراد سعید کے اعلان سے متعلق پرانی خبر کا تراشہ بھی شیئر کیا۔ واضح رہے کہ وزیر اعظم شہباز شریف آج کوئٹہ کراچی شاہراہ کا افتتاح کرنے کوئٹہ پہنچے ہیں۔
یاد رہے کہ اس سے قبل وزیر اعظم شہباز شریف کی جانب سے اسلام آباد میٹرو کے افتتاح کے موقع پر بھی اسد عمر نے سی ڈی اے کی جانب سے اپریل میں میٹرو فعال کرنے کی پرانی پریس ریلیز ٹویٹ کی تھی۔

لاہور : (ویب ڈیسک) مسلم لیگ ن کے ذرائع نے دعویٰ کیا ہے کہ نومنتخب وزیراعلی ٰپنجاب حمزہ شہباز کی تقریب حلف برداری آج ہو گی۔
وزیر اعلیٰ پنجاب حمزہ شہباز کی تقریب حلف برداری گورنر ہاوس لاہور میں ہو گی۔نومنتخب وزیراعلیٰ پنجاب سے چیئرمین سینیٹ صادق سنجرانی حلف لیں گے۔
ذرائع کا کہنا ہے کہ گورنر پنجاب عمر سرفراز چیمہ کی طبیعت ناساز ہے۔گورنر پنجاب کی طبیعت سحری کے وقت خرا ب ہوئی تھی۔
یاد رہے کہ اس سے پہلے گورنر پنجاب نے وزیر اعلیٰ کے انتخاب کو غیر آئینی قرار دیتے ہوئے حلف لینے سے انکار کر دیا تھا۔
لاہور ہائی کورٹ نے حلف برداری سے انکار کے خلاف حمزہ شہباز کی درخواست پر فیصلہ سناتے ہوئے صدر پاکستان کو حلف لینے سے متعلق نمائندہ مقرر کرنے کی ہدایت کی تھی۔
ذرائع کا کہنا ہے کہ لاہور ہائی کورٹ کا حکم موصول ہونے پر صدر نے وزیر اعظم ہاوس سے رائے مانگی تھی۔ جس پر صدر کو تجویز دی گئی ہے کہ چیئر مین سینیٹ صادق سنجرانی وزیر اعلیٰ پنجاب سے حلف لیں۔
واضح رہے کہ اس سے پہلے صدر مملکت عارف علوی نے بھی طبیعت ناساز ہونے کے باعث وزیر اعظم شہباز شریف اور وفاقی کابینہ سے حلف لینے سے انکار کر دیا تھا۔

اسلام آباد: (ویب ڈیسک) وزیراعظم شہباز شریف نے ملک میں 15ماہ بعد پہلا پولیوکیس رپورٹ ہونے پر تشویش کا اظہار کیا ہے۔
وزیراعظم نے پولیو کا کیس رپورٹ ہونے پر تشویش کا اظہار کرتے ہوئے پیر کوقومی ٹاسک فورس برائےانسداد پولیو کا اجلاس طلب کرلیا ہے۔
وزیراعظم شہبازشریف نے حکام کو پولیو کے خاتمے کے لیے لائحہ عمل مرتب کرنے کی ہدایت کی ہے۔
دوسری جانب سابق وفاقی وزیر فواد چودھری نے حکومت پر تنقید کرتے ہوئے کہا ہے کہ15ماہ بعد پولیو واپس آگیا ، اللہ پاکستان کی حفاظت کرے ۔
انہوں نے کہا ہے کہ عمران خان حکومت میں پولیو ختم ہو گیا تھا۔بل گیٹس پولیو خاتمے کو پاکستان کی عظیم کامیابی قرار دے چکے تھے۔
ان کا کہنا ہے کہ عمران خان حکومت کیخلاف سیاسی ایڈونچر نے ملکی معیشت کی کمر توڑ دی ۔
واضح رہے کہ قومی ادارہ صحت نے شمالی وزیرستان سے تعلق رکھنے والے بچے میں پولیو کی تصدیق کی ہے۔
دنیا بھر میں رواں سال پولیو کے 3 کیسز سامنے آچکے ہیں۔