اسلام آباد : (ویب ڈیسک) جے یو آئی ف نے اسلام آباد میں سرینگرہائی وے کے ساتھ علاقے ایچ نائن میں میدان سجا لیا۔
جلسہ گاہ میں پارٹی پرچموں کی بہار ہے ۔ خیمے نصب کر دیئے گئے ہیں ۔ منتظمین کا کہنا ہے کہ انہیں قیادت کی جانب سے جلسہ گاہ میں تین دن پڑاؤ کا حکم دیا گیا ہے ۔
متحدہ اپوزیشن کا اٹھائیس مارچ کو بڑا جلسہ ہو گا جس میں ن لیگ اور پیپلز پارٹی کی قیادت اور کارکن بھی شریک ہوں گے ۔
مولانا فضل الرحمان نےاسلام آباد میں جلسے سے خطاب کرتے ہوئے کہا، حکومت کو صرف ایک دھکے کی ضرورت ہے، ہم موجودہ حکومت کو غیر آئینی، غیر قانونی اور ناجائز کہتے ہیں۔
ان کا کہنا ہے کہ حکومت کو مزید ایک لمحے کی گنجائش نہیں دے سکتے۔ان کے سارے سہارے ٹوٹ چکے ہیں، ان کا کندھا اب خالی ہو چکا ۔اب صرف استعفے کا راستہ ہے، گھر جاؤ ورنہ گھر بھجوائے جاؤ گے۔
ڈپٹی کمشنر اسلام آباد حمزہ شفقات نے جے یو آئی کے جلسہ گاہ کا دورہ کیا ۔۔ڈپٹی کمشنر اسلام آباد کا کہنا ہے کہ جے یو آئی ف کی جانب سے خلاف ورزی کی گئی۔
سری نگر ہائی وے خالی کرنے کے لیے جے یوآئی ف انتظامیہ سے تعاون کررہی ہے۔ جے یو آئی ف کو شو کاز نوٹس جاری کررہے ہیں ۔، دوبارہ خلاف ورزی کی تو ایف آئی آر درج کروائی جائے گی۔ آج تحریک انصاف اسلام آباد میں جلسہ کرے گی، جے یو آئی ف کو کہا ہے کہ آج جلسہ نا کریں
سرینگر ہائی وے پر ممکنہ دھرنے سے متعلق اسلام آباد ہائیکورٹ نے حکم نامہ جاری کردیا ہے۔ چیف جسٹس اطہر من اللہ نے حکم دیا ہے کہ انتظامیہ این او سی کی خلاف ورزی کرنے والوں کیساتھ سختی سے نمٹے۔
حکم نامے میں کہا گیا ہے کہ خلاف ورزی کرنے والوں کے خلاف کاروائی کی جائے۔ سیاسی جماعتیں اور رہنما قانون پر عمل کرنے کے پابند ہیں۔ چیف جسٹس اطہر من اللہ نے اسلام آباد انتظامیہ کی درخواست پر حکم جاری کیا ہے۔

اسلام آباد: (ویب ڈیسک) وفاقی دارالحکومت کی انتظامیہ نے جلسے کی وجہ سے متبادل ٹریفک پلان جاری کر دیا۔
اسلام آباد ،سری نگر ہائی وے پر جمعیت علمائے اسلام (جے یو آئی) ف کے جلسے کے لیے ٹریفک پلان جاری کیا گیا ہے۔ جس کے مطابق سری نگر ہائی وے پروجیکٹ موڑ سے نائنتھ ایونیو فلائی اور تک بند رہے گی اور ریڈ زون کے علاوہ باقی تمام سڑکیں کھلی رہیں گی۔
سری نگر ہائی وے کے پروجیکٹ موڑ پر دونوں اطراف کے لیے ٹریفک بند رہے گی جبکہ فقیر ایپی روڈ کو آئی جے پی روڈ تک پہنچنے کے لیے استعمال کیا جاسکتا ہے۔ جی، ایف اور ای سیکٹرز تک پہنچنے کے لیے جی الیون سروس روڈ ویسٹ استعمال کیا جاسکتا ہے۔
سرینگر ہائی وے سے جی 9 مرکز روڈ پر داخلی اور خارجی راستے بند رہیں گے تاہم متبادل طور پر نائنتھ ایونیو استعمال کیا جا سکتا ہے۔ ایئرپورٹ اور موٹروے تک مارگلہ روڈ اور جناح ایونیو سے رسائی حاصل کی جا سکتی ہے۔
ریڈ زون میں داخلے اور باہر نکلنے کی اجازت صرف مارگلہ روڈ سے ہو گی۔

اسلام آباد: (ویب ڈیسک) تحریک انصاف آج اسلام آباد پریڈ گراونڈ میں سیاسی طاقت کا مظاہرہ کرے گی۔
تحریک انصاف آج اسلام آباد کے پریڈ گراؤنڈ میں جلسہ کر رہی ہے۔ وزیر اعظم عمران خان جلسے سے خطاب کریں گے۔ تحریک انصاف کے رہنماؤں کا دعویٰ ہے کہ جلسے میں لاکھوں پاکستانی شریک ہوں گے۔ یہ پاکستان کی تاریخ کا سب سے بڑا سیاسی جلسہ ہو گا۔
پریڈ گراؤنڈ میں جلسے کی تیاریاں مکمل ہیں، کارکن کل شام سے ہی جلسہ گاہ پہنچ رہے ہیں۔ ملک کے مختلف شہروں سے کارکن مقامی قیادت کے ساتھ جلسہ گاہ میں شرکت کے لیے پہنچ رہے ہیں۔
اسلام آباد کی مختلف شاہراؤں پر تحریک انصاف کے جلسے کے بینرز آویزاں ہیں جن میں وزیراعظم کے مشیروں کی جانب سے دوسرے شہروں سے آںے والے کارکنوں کو خوش آمدید کہا گیا ہے۔
وزیر اطلاعات فواد چودھری نے رات گئے ایک ٹویٹ میں جلسے کے مقام پر بنائے گئے اسٹیج سے اپنی سیلفی شیئر کرتے ہوئے ٹویٹ کیا کہ پریڈ گراؤنڈ کا منظر، رات کے اس پہر بھی پانچ سے سات ہزار لوگ موجود ہیں۔
وفاقی وزیر اسد عمرنے کہا ہے کہ اپوزیشن کرپشن کے پیسوں کی سیاست کرتی ہے۔ عمران خان خوددار پاکستان کیلئے کوشاں ہیں۔
وزیر مملکت فرخ حبیب نے کہا عمران خان پر عوام کا بھروسہ ڈبل ہونے جار ہا ہے۔ منحرف اراکین کی عدالت عوام ہے۔ مولانا فضل الرحمان اور آصف زرداری کی سیاست ختم کرنے آرہے ہیں۔

لاہور: (ویب ڈیسک) وزیراعلی عثمان بزدار نے وزیر اعظم عمران خان کے ساتھ والہانہ محبت کے اظہار اور کمالیہ میں پی ٹی آئی کا جلسہ کامیاب بنانے پر شہر کی عوام سے اظہار تشکر کیا۔
وزیراعلی پنجاب کا کہنا تھا کہ عوام کے سمندر نے وزیراعظم عمران خان پر بھرپور اعتماد کا اظہار کیا،بھرپور پذیرائی پر عوام کا شکریہ ادا کرتا ہوں۔ انہوں نے کہا کہ کمالیہ میں پی ٹی آئی کا جلسہ تاریخی رہا۔کامیاب جلسے پر تحریک انصاف کے پارلیمنٹرینز،ٹکٹ ہولڈرزاورکارکنوں کو مبارکباد دیتا ہوں۔
عثمان بزدار نے کہا کہ کمالیہ کے بعد آج اسلام آ باد میں پاکستان کی تاریخ کاسب سے بڑا جلسہ ہوگا- وزیر اعظم عمران خان نے عوامی سیاست سے مخالفین کو چاروں شانے چت کر دیا ہے۔ عمران خان کی قیادت میں پی ٹی آئی مقبول ترین جماعت بن چکی ہے۔

اسلام آباد: (ویب ڈیسک) وفاقی وزیر اسد عمر نے کہا ہے کہ تحریک انصاف کے آج شام ہونے والے جلسے میں شرکت کیلئے سوچ سے زیادہ لوگ آ رہے ہیں، منتخب نمائندے بروقت پہنچنے کیلئے اپنے گھروں سے جلد نکلیں۔
سوشل میڈیا پیغام میں وفاقی وزیر اور رہنما تحریک انصاف اسد عمر نے کہا کہ تمام تنظیمی عہدے دار اور منتخب نمائندے جو اپنے علاقوں سے جلوسوں کی قیادت کر رہے ہیں، وزیراعظم کی ہدایت کے مطابق جلسے میں شرکت کیلئے جلد نکلیں، جلسے میں پہنچنے میں اندازے سے زائد وقت لگ سکتا ہے۔
ان کا مزید کہنا تھا کہ آج ایک جلسہ نہیں تاریخ رقم ہونے جا رہی ہے،پاکستان آج فیصلہ کر رہا ہے کہ سیاست کو حرام کے پیسے سے نجات دلانی ہے اور ایک خودمختار قوم بن کر زندگی گزارنی ہے۔