لندن: (ویب ڈیسک) برطانوی ہائی کورٹ نے شیخ محمد بن راشد المختوم کے بچوں کو اُن کی سابق اہلیہ کے حوالے کردیا۔
قطر کے سرکاری خبررساں ادارے الجزیرہ کے مطابق لندن ہائی کورٹ میں اپنے بچوں کی سرپرستی کیلئے لڑرہے دبئی کے حکمران شیخ محمد بن راشد المختوم کیس ہار گئے ہیں۔ انگلینڈ اور ویلز میں فیملی ڈویژن کے صدر اینڈریو میک فارلین نے شیخ محمد کے خلاف اپنے حتمی فیصلے میں ان کے بچوں کو اُن کی سابق اہلیہ حیا جو کہ اردن کے شاہ عبداللہ کی سوتیلی بہن بھی ہیں، کے حوالے کردینے کا فیصلہ سنایا ہے۔
جج نے کہا کہ حیا کو ہی دو بچوں، 14 سالہ جلیلہ اور 10 سالہ زید کی تعلیم اور صحت سے متعلق تمام معاملات طے کرنے چاہئیں تاہم شیخ محمد کو ان معاملات سے باخبر رکھا جائے۔
عدالت نے اس سے قبل کہا تھا کہ شیخ محمد سے حیا کی جان کو خطرہ پیدا ہوا، شیخ محمد نے دوسری شادی کرکے سابق اہلیہ سے ہوئی دو بیٹیوں کو اغوا کیا اور ان کے ساتھ بدسلوکی جبکہ حیا اور ان کے وکلا کے فونز اسرائیلی سیکیورٹی سافٹ ویئر ’پیگاسس‘کے ذریعے ہیک کرنے کا بھی حکم دیا۔
عدالت نے یہ بھی کہا کہ شیخ محمد کو بچوں کی طویل مدتی دیکھ بھال کے ثبوت کے طور پر 554 ملین پاؤنڈز (730 ملین ڈالرز) کا ریکارڈ فراہم کرنا ہوگا۔
اینڈریو میک فارلین کا کہنا تھا کہ شیخ محمد اپنی مرضی کیخلاف جانے والے افراد چاہے وہ اہلخانہ ہی کیوں نہ ہوں، ان کے ساتھ جبر اور اُن پر کنٹرول رکھنے والے رویے کا مظاہرہ کرتے ہیں۔

ماسکو: (ویب ڈیسک) روسی صدر ولادیمیر پیوٹن نے گیس کی فروخت ڈالر کے بجائے روسی روبل میں کرنے کا اعلان کرکے یورپ کو شدید مشکل میں مبتلا کردیا ہے۔
غیر ملکی میڈیا رپورٹس کے مطابق روسی صدر نے اعلان کیا کہ جو ممالک روس کے دوست نہیں ان کو گیس روبل کے عوض ہی فروخت کی جائے گی، جن کو روس کی گیس چاہیے وہ روسی کرنسی بھی خرید لیں۔
پیوٹن کے فیصلے کے بعد یورپ میں گیس کی قیمت بڑھ گئی، برطانیہ اور نیدر لینڈ میں گیس کی قمیت میں 30 فیصد تک اضافہ ہوا۔
غیر ملکی میڈیا کے مطابق یورپ روزانہ 800 ملین ڈالر کی گیس روس سے خریدتا ہے۔

نئی دہلی: (ویب ڈیسک) بھارت نے مقبوضہ کشمیر سے متعلق چین کے وزیر خارجہ وانگ یی کے بیان کو مسترد کردیا ہے۔
الجزیرہ کی رپورٹ کے مطابق چین کے وزیر خارجہ نے اسلام آباد میں اسلامی تعاون تنظیم (او آئی سی) کی کانفرنس میں شرکت کی اور کہا تھا کہ ’چین کو وہی امید ہے جو او آئی سی کو کشمیر پر ہے، جو ایک مسلم اکثریتی خطہ ہے جس پر دونوں نئی دہلی اور اسلام آباد جزوی حصوں پر حکومت کرتے ہیں لیکن اس پر مکمل دعویٰ بھی کرتے ہیں۔
خیال رہے کہ چین کے وزیر خارجہ کی جانب سے مقبوضہ کشمیر کا دورہ متوقع ہے لیکن اس حوالے سے باضابطہ اعلان نہیں کیا گیا۔
اس حوالے سے بھارتی وزارت خارجہ نے ایک بیان میں کہا کہ ہم چینی وزیر خارجہ وانگ یی کی جانب سے بھارت کے حوالے سے نامناسب حوالے کو مسترد کرتے ہیں۔
انہوں نے کہا کہ مرکزی علاقے جموں و کشمیر سے متعلق معاملات مکمل طور پر بھارت کے داخلی معاملات ہیں، چین سمیت دیگر ممالک کے پاس تبصرہ کرنے کا کوئی حق نہیں ہے، انہیں یاد رکھنا چاہئے کہ بھارت اپنے داخلی مسائل کے بارے میں عوامی فیصلے سے گریز کرتا ہے۔

لندن: (ویب ڈیسک) دنیا بھر میں تہلکہ مچانے والے وکی لیکس کے بانی جولین اسانج نے اپنی گرل فرینڈ اسٹیلا مورس سے جیل میں شادی کرلی ہے۔غیر ملکی میڈیا کے مطابق جولین اسانج اور اسٹیلا مورس کی شادی کے لیے سخت سکیورٹی والے جیل میں مختصر تقریب کا انعقاد کیا گیا جس میں جیل کے دو حکام اور دو محافظوں نے شرکت کی۔اسٹیلا مورس نے جیل کے باہر شادی کا کیک کاٹا اور میڈیا سے گفتگو کرتے ہوئے کہا کہ میں بیک وقت بہت خوش ہوں اور اداس بھی، میں جولین سے سچے دن سے محبت کرتی ہوں، کاش وہ اس وقت گفتگو کے دوران میں ساتھ کھڑے ہوتے۔جولین اسانج اور اسٹیلا مورس کے دو بچے ہیں، ان کا تعلق 2015 سے قائم ہے۔ جیل میں شادی کے موقع پر مورس نے عروسی لباس زیب تب کیا تھا جس پر کڑھائی کی مدد سے ”بہادر“، ”انتھک“ اور ”آزادانہ محبت“ جیسے الفاظ لکھا گئے تھے۔وکی لیکس کے بانی جولین اسانج ایک دہائی سے امریکی خفیہ فوجی ریکارڈ اور سفارتی راز کو منظر عام پر لانے کے جرم میں سزا کاٹ رہے ہیں۔50 سالہ جولین اسانج 2019 سے جنوبی مشرقی لندن کی جیل میں ہیں۔ اس سے قبل مجرم کو ایکواڈور کے سفارت خانے میں سات سال تک قید میں رکھا گیا تھا۔امریکا نے 2010 اور 2011 میں قومی راز افشا کرنے کے جرم میں جولین اسانج کی حوالگی کے لیے برطانیہ سے درخواست کر رکھی ہے۔برطانوی میرج ایکٹ 1983 کے تحت جیل کے قیدی یہ حق رکھتے ہیں کہ وہ جیل میں شادی کرنے کی درخواست دے سکتے ہیں لیکن درخواست گزار کے لیے ضروری ہے کہ وہ شادی کے تمام اخراجات اٹھانے کی اہلیت رکھتا ہو۔