راجستھان: (ویب ڈیسک) مسلم مخالف فلم ’’دی کشمیر فائلز‘‘ پر منفی تبصرہ کرنے پر بھارتی شہری کے ساتھ نہایت ذلت آمیز سلوک کیا گیا ہے۔
بھارتی میڈیا کے مطابق راجستھان کے علاقے بہرور میں راجیش کمار میگھوال نامی شخص کو فلم ’’دی کشمیر فائلز‘‘ پر سوشل میڈیا پر منفی تبصرہ کرنے پر مبینہ طور پر مندر کے اندر نا صرف ناک رگڑنے کو کہا گیا بلکہ معافی مانگنے کے لیے بھی کہا گیا۔
یہ واقعہ گزشتہ روز 23 مارچ کو بہرور پولیس اسٹیشن کی حدود میں پیش آیا۔ متاثرہ شخص راجیش کمار کی مندر کے اندر ناک رگڑنے کی تصویر بھی سوشل میڈیا پر وائرل ہورہی ہے۔
رپورٹس کے مطابق بھیم آرمی کے کارکنان نے واقعہ کے خلاف پولیس میں ایک میمورنڈم جمع کروایا ہے جس میں ملزمان کو 24 گھنٹے کے اندر گرفتار کرنے کا مطالبہ کیا گیا ہے۔
دوسری طرف پولیس سپرٹنڈنٹ شانتنو کمار نے میڈیا سے بات کرتے ہوئے کہا کہ یہ ایک سنجیدہ معاملہ ہے لہذا میں یہاں آیا اور مقامی لوگوں سے بات کی۔ سرکل آفیسر نے کچھ لوگوں کو پکڑا ہے جن سے پوچھ گچھ کی جارہی ہے۔ شانتنو کمار نے مزید کہا کہ ایک جمہوری ملک میں اس طرح کا طرز عمل برداشت نہیں کیا جائے گا، ہر کسی کو سوشل میڈیا پر اپنی بات کہنے کا حق ہے۔
واضح رہے کہ مسلم مخالف فلم ’’دی کشمیر فائلز‘‘ 90 کی دہائی میں کشمیروادی سے ہندو پنڈتوں کے اخراج پر مبنی فلم ہے۔ فلم پر تاریخ کو مسخ کرنے اور مسلمانوں کو دہشتگرد دکھائے جانے کا الزام ہے۔ کچھ روز قبل بھی بھارتی ریاست تلنگانہ میں فلم کی نمائش کے دوران دو افراد کی جانب سے تھیٹر میں ’پاکستان زندہ باد‘ کے نعرے لگائے جانے کا واقعہ سامنے آیا تھا۔

ممبئی: (ویب ڈیسک) بالی ووڈ کے سلطان سلمان خان کو عدالتی ثمن جاری ہونے کے بعد راکھی ساونت سلو میاں کے دفاع میں میدان میں آگئیں اور کہا کہ سلمان خان بھی انسان ہیں انہیں بھی غصہ آسکتا ہے۔
گزشتہ روز سلمان خان کو صحافی کے ساتھ بدتمیزی کرنے پر ممبئی کی مجسٹریٹ کورٹ کی جانب سے ثمن جاری ہوئے اور انہیں 5 اپریل کوعدالت طلب کیا گیا۔ سلمان خان پر انڈین پینل کوڈ کے سیکشن 504 اور 506 کے تحت مقدمہ درج کیا گیا ہے۔
اداکارہ راکھی ساونت نے حال ہی میں سلمان خان کو عدالتی ثمن جاری ہونے پر اداکار کے حق میں بیان دیا ہے کہ سلمان خان بھی انسان ہیں اور کبھی کبھار انہیں غصہ بھی آجاتا ہے۔ میرے خیال میں ان کے پاس سب کچھ ہے لیکن ایک وقت میں انہوں نے نقصان بھی اٹھایا۔
راکھی نے کہا اگر آپ سلمان خان کی دکھتی رگ دبائیں گے تو انہیں غصہ آئے گا وہ انسان ہیں۔ اگر کوئی ان سے غلط سوال پوچھے گا تو وہ ناراض ہوسکتے ہیں اور غصے میں کچھ کہہ سکتے ہیں۔ لیکن مجھے نہیں لگتا کہ کسی کو ان کے خلاف مقدمہ دائر کرنا چاہئے۔
راکھی ساونت نے مزید کہا دیکھیں کوئی بھی میڈیا برا نہیں ہوتا لیکن جب آپ ایک بڑے اسٹار بن جاتے ہیں تو کچھ سوالات آپ کو دکھ پہنچاتے ہیں۔ سلمان خان کی فلمیں سپر ہٹ ہیں، ان کے کروڑوں مداح ہیں لیکن کہیں نہ کہیں انہیں زندگی کی خوشیاں تو نہیں ملیں۔
واضح رہے صحافی اشوک پانڈے کی جانب سے سلمان خان کے خلاف دائر مقدمے میں کہا گیا ہے کہ 24 اپریل 2019 کو سلمان خان ممبئی کی سڑک پر سائیکل چلارہے تھے اور ان کے ساتھ ان کے دو باڈی گارڈز بھی تھے جب صحافی نے ان کی ویڈیو بنانے کی کوشش کی۔
صحافی نے سلمان خان پر اس کا فون چھیننے کا الزام لگایا اور یہ دعویٰ کیا کہ اس نے سلمان خان کے باڈی گارڈ سے اجازت لے کر ہی ان کی تصویریں کھینچیں تھیں۔ اشوک پانڈے نے یہ بھی الزام لگایا کہ سلمان خان کے باڈی گارڈ نے اس کے ساتھ بدتمیزی کی اور سلمان خان اور ان کے باڈی گارڈز نے مل کر ان کا موبائل فون چھین لیا۔