اسلام آباد: (ویب ڈیسک) سپریم کورٹ میں صدارتی ریفرنس کی سماعت کے موقع پرریڈ زون کو سیل کردیا گیا ہے۔ سرینا چوک، نادرا، ڈی چوک اور میریٹ چوک سے تمام راستے بند کردیئے گئے۔ پولیس کی بھاری نفری بھی تعینات کی گئی ہے۔
سیکرٹریٹ اور سپریم کورٹ جانے کیلئے صرف مارگلہ روڈ والا راستہ کھلا ہے۔ سپریم کورٹ کے اندر اور باہر پولیس کی بھاری نفری بھی تعینات ہے۔
پولیس کی واٹرکینن بھی سپریم کورٹ کے قریب پہنچا دی گئی ہے، ریڈزون کے داخلی راستوں پر بھی پولیس کی بھاری نفری تعینات ہے۔

لاہور: (ویب ڈیسک) طالبان نے افغانستان میں لڑکیوں کے سکول کھولنے کا وعدہ کیا لیکن پورا نہ کیا، مقررہ دن پر سکول کھولے لیکن پھر بند کر دئیے۔
جس پر دنیا بھر سے مزمتی بیانات جاری کیے جا رہے ہیں، دنیا کی کم عمر ترین نوبیل انعام یافتہ سماجی کارکن ملالہ یوسفزئی کا کہنا ہے کہ طالبان تعلیم یافتہ اور بااختیار خواتین سے ڈرتے ہیں
انہوں نے ٹوئٹ کرتے ہوئے لکھا کہ افغانستان میں لڑکیوں کے اسکول کھلنے کے چند گھنٹوں بعد ہی بند ہونا انتہائی افسوس ناک ہے،آج کے دن کی یہی امید تھی کہ اسکول جانے والی افغان لڑکیوں کو گھر واپس نہیں بھیجا جائے گا، لیکن طالبان وعدہ پورا نہیں کر سکا۔
ملالہ نے لکھا کہ طالبان لڑکیوں کو تعلیم سے دور رکھنے کے بہانے ڈھونڈ رہے ہیں۔
اقوام متحدہ کے بعد ترک وزارت خارجہ نے بھی افغان لڑکیوں کے لیے ہائی اسکول بند رکھنے کے اقدام پر افسوس کا اظہار کیا ہے، ترک وزارت خارجہ کا کہنا تھا کہ لڑکیوں سمیت تمام طلبا کے لیے تعلیم افغان عوام کی توقع تھی، افغان حکومت ہرعمر کی لڑکیوں کو تعلیم حاصل کرنے کی اجازت دے ، مشکل وقت میں ترکی افغان عوام کےساتھ کھڑا ہے۔
یاد رہے گزشتہ روز افغانستان میں 7 ماہ بعد لڑکیوں کے لیے تعلیمی ادارے کھولے گئے لیکن پھر بند کرنے کے احکامات جاری کر دئیے گیاوزارت تعلیم کا کہنا ہے کہ لڑکیوں کے اسکول اس وقت تک بند رہیں گے جب تک مذہبی قانون اور افغان ثقافت کے مطابق کوئی منصوبہ نہیں بنایا جاتا۔

لاہور: (ویب ڈیسک) وفاقی وزیر داخلہ شیخ رشید نے کہا ہے کہ اپوزیشن کے پاس ہمارے کچھ بندے ہیں تو ہمارے پاس بھی اپوزیشن کے کچھ بندے ہیں، اتحادی سوچ سمجھ کر فیصلہ کریں، عثمان بزدار عمران خان کو چھوڑ کر کہیں نہیں جارہے،ملک میں انتخابات جلدی بھی ہو سکتے ہیں۔
لاہور میں پریس کانفرنس سے خطاب کرتے ہوئے وزیر داخلہ شیخ رشید نے کہا کہ جےیوآئی کو ان کی ڈیمانڈ کے مطابق جلسےکی اجازت دے دی، ن لیگ کی ابھی تک جلسے کی کوئی درخواست نہیں آئی، کل کوئی واقعہ ہو جائے تو وزارت داخلہ ذمہ دار نہیں ہو گی،عمران خان تاریخی جلسہ 27 مارچ کو پریڈ گراؤنڈ میں کریں گے۔
انہوں نے کہا کہ اپوزیشن کے پاس ہمارے کچھ بندے ہیں تو ہمارے پاس بھی اپوزیشن کے کچھ بندے ہیں، بلاول کے ابھی دودھ کے دانت نہیں ٹوٹے،وہ تو کہہ رہا تھا او آئی سی کانفرنس نہیں ہوگی مگر او آئی سی کی تاریخی کانفرنس ہوئی، اس پر تمام اداروں کو مبارکباد پیش کرتا ہوں۔
انہوں نے کہا کہ اپوزیشن کو اب فوج کا خیال آ گیا ہے، بہت اچھی بات ہے، کوئی شک نہیں پاک فوج عظیم فوج اورعدلیہ دوراندیش ہے، جو فوج یا عدلیہ مخالف مہم چلائے گا اسے سختی سےکچل دوں گا، چاہتے ہیں جمہوریت اور ملک آگے بڑھے، پارٹیاں بدلنے سے کوئی عزت نہیں ملتی۔

اسلام آباد: (ویب ڈیسک) مولانا فضل الرحمن کی سیاسی جماعت جے یو آئی کی جانب سے صدارتی ریفرنس سے متعلق سپریم کورٹ میں جواب جمع کرا دیا گیا ہے۔
جے یو آئی ف کے سپریم کورٹ میں جمع کروائے گئے جواب میں کہا گیا ہے کہ پی ٹی آئی میں پارٹی الیکشن نہیں ہوئے، جماعت سلیکٹڈ عہدیدار چلا رہے ہیں۔ سلیکٹڈ عہدیدار آرٹیکل 63 اے کے تحت ووٹ ڈالنے یا نہ ڈالنے کی ہدایت نہیں کر سکتے،سپیکر کو اراکین کے ووٹ مسترد کرنے کا اختیار نہیں دیا جا سکتا، لازمی نہیں کہ عدم اعتماد پر ووٹنگ سے پہلے ہی ریفرنس پر رائے دی جائے۔
جے یو آئی ف کی جانب سے مزید موقف اختیار کیا گیا کہ کسی رکن کیخلاف نااہلی کا کیس بنا تو سپریم کورٹ تک معاملہ آنا ہی ہے، سپریم کورٹ نے پہلے رائے دی تو الیکشن کمیشن کا فورم غیر موثر ہو جائے گا، آرٹیکل 63 اے پہلے ہی غیر جمہوری ہے، آزاد جیت کر پارٹی میں شامل ہونے والوں کی نشست بھی پارٹی کی پابند ہو جاتی ہے، ریفرنس سے لگتا ہے صدر، وزیراعظم اوراسپیکر ہمیشہ صادق اور امین ہیں اور رہیں گے، پارٹی کیخلاف ووٹ پر تاحیات نااہلی کمزور جمہوریت کو مزید کم تر کرے گی، عدالت پارلیمنٹ کی بالادستی ختم کرنے سے اجتناب کرے۔

اسلام آباد: (ویب ڈیسک) سپریم کورٹ بار نےصدارتی ریفرنس سے متعلق اپنا تحریری جواب سپریم کورٹ میں جمع کرا دیا ہے۔
سپریم کورٹ بار کی جانب سےجمع کرائے گئے جواب میں کہا گیا ہے کہ عدم اعتماد کی تحریک میں رکن پارلیمان کا ووٹ کا حق انفرادی ہے ، آرٹیکل 95 کے تحت ووٹ کسی سیاسی جماعت کا حق نہیں۔ کسی رکن قومی اسمبلی کو ووٹ ڈالنے سے روکا نہیں جاسکتا۔ عوام اپنے منتحب نمائندوں کے ذریعے نظام حکومت چلاتے ہیں ۔سپریم کورٹ بار آٓرٹیکل 63 کے تحت کسی بھی رکن کو ووٹ ڈالنے سے پہلے نہیں روکا جاسکتا۔
سپریم کورٹ بار کے جواب میں مزید کہا گیا ہےکہ آرٹیکل 95 کے تحت ڈالا گیا ہر ووٹ گنتی میں شمار ہوتا ہے، ہر رکن قومی اسمبلی اپنے ووٹ کا حق استعمال کرنے میں خودمختار ہے، آرٹیکل 63 اے میں پارٹی ڈائریکشن کیخلاف ووٹ ڈالنے پر کوئی نااہلی نہیں۔

لاہور: (ویب ڈیسک) تیز رفتار مسافر بس کے رکشہ اور موٹر سائیکل سے تصادم کے نتیجے میں ایک خاتون سمیت 3 افراد جاں بحق اور 6 زخمی ہو گئے۔
راولپنڈی سے بھکر جانے والی مسافر بس چونی شمالی کے قریب سڑک پر موجود گڑھے کو بچاتے ہوئے سامنے آنے والے رکشہ اور موٹرسائیکل سے ٹکرا گئی جس کے نتیجہ میں ایک خاتون موقع پر دم توڑ گئی جبکہ چھ افراد زخمی ہو گئے، زخمیوں میں دو بچیاں ہسپتال میں جاں بحق ہو گئیں، ریسکیو ٹیم نے چار زخمیوں کو ہسپتال منتقل کر دیا۔
مشتعل افراد نے مسافر بس پر پٹرول چھڑک کر آگ لگا دی، بس ڈرائیور موقع سے فرار ہونے میں کامیاب ہو گیا، ریسکیو نے بس کو لگنے والی آگ پر پالیا۔

راولپنڈی : (ویب ڈیسک) پنجاب پولیس کی وردی پہن کر ٹک ٹاک بنانے والے نوجوان کو راولپنڈی پولیس نے گرفتار کرلیا گیا ہے، وردی بھی برآمد کرلی۔
ٹک ٹاکر کےخلاف تھانہ سٹی میں مقدمہ درج کرکے قانونی کارروائی شروع کردی گئی ہے۔ مقدمے کے متن میں کہا گیا ہے کہ ٹک ٹاکر سلیمان پیرودھائی کا رہائشی ہے۔
ملزم کے قبضے سے پنجاب پولیس کے سب انسپکٹر کی وردی برآمد ہوئی، ملزم نے پولیس کی وردی پاس رکھ کر اور ٹاک بناکر جرم کا ارتکاب کیا۔۔۔ابتدائی تحقیقات میں ملزم کا کہنا ہے کہ وہ شوقیہ پولیس کی وردی ساتھ رکھتا ہے۔

اسلام آباد: (ویب ڈیسک) آرٹیکل 63 اے کی تشریح کیلئے سپریم کورٹ کا 5 رکنی بنچ صدارتی ریفرنس کی آج سماعت کرے گا۔
منحرف ارکان تاحیات نااہل ہونگے یا دوبارہ الیکشن لڑ سکیں گے؟ آرٹیکل 63 اے کی تشریح کیلئے صدارتی ریفرنس کی آج سماعت ہو رہی ہے، حکومت کی جانب سے دائر کیے جانے والے صدارتی ریفرنس میں سپریم کورٹ سے چار سوالات پر رائے مانگی گئی ہے۔
ریفرنس میں پوچھا گیا ہے کہ کوئی رکن اسمبلی پارٹی پالیسی سے انحراف کرتے ہوئے ووٹ دے تو کیا اسے رکن کے خلاف کوئی کارروائی عمل میں نہیں لائی جاسکتی؟ اسے ڈی سیٹ نہیں کیا جاسکتا؟
سپریم کورٹ سے یہ رائے مانگی گئی ہے کہ کیا ایسے رکن جو پارٹی پالیسی سے انحراف کریں اور پالیسی کے خلاف ووٹ دیں تو کیا ان کے ووٹ کو شمار کیا جائے گا؟
سپریم کورٹ سے پوچھا گیا ہے کہ کیا جو وفاداری تبدیل کرتے ہوئے رکن پارٹی پالیسی کے خلاف جائے اور ثابت ہو کہ اس نے آرٹیکل 63 اے کی خلاف ورزی کی ہے تو کیا اسے رکن کو تاحیات نا اہل قرار دیا جائے گا؟
چوتھے سوال میں عدالت سے رائے مانگی گئی ہے ہارس ٹریڈنگ اور فلور کراسنگ کو روکنے کے لیے موجودہ آئینی ڈھانچے میں کون سے اقدامات اٹھائے جاسکتے ہیں جس سے فلور کراسنگ کو روکا جاسکے۔