کراچی: (ویب ڈیسک) اپوزیشن لیڈر سندھ حلیم عادل شیخ نے آئی جی سندھ اور ایڈیشنل آئی جی کراچی کو خط لکھا ہے جس میں انہیں دھمکی آمیز پیغامات ملنے کی تحقیقات اور مناسب سکیورٹی دینے کا مطالبہ کیا ہے۔
اپوزیشن لیڈر سندھ اسمبلی حلیم عادل شیخ نے دھمکی آمیز ویڈیو کے خلاف ارسال خط کی کاپیاں مختلف اداروں کو بھی بھیج دیں جن میں کہا گیا ہے کہ کچھ روز قبل سوشل میڈیا گروپس پر دھمکی آمیز ویڈیو اپ لوڈ کی گئی تھی۔ پولیس بلٹ پروف جیکٹ، رائفل، پستول اور ہتھکڑیاں دکھائی گئی تھیں۔
ویڈیو میں پس پردہ شخص خود کو پولیس اہلکار ظاہر کر رہا ہے، حلیم عادل شیخ نے کہا کہ ظاہر کیا گیا کہ سندھ پولیس اہلکار مجھ سے ناراض ہیں۔ میں عوام پر پولیس کی زیادتیوں کو نمایاں کرتا ہوں اس لئے طنزیہ دھمکیاں دی گئیں۔ تاثر دیا گیا کہ جانی حملے کی کوشش کو پولیس اہلکار کی انتقامی کارروائی سمجھا جائے۔
خط میں مزید کہا کہ معاملے کی جلد از جلد تحقیقات کی جائیں تا کہ حقائق سامنے آئیں۔ گزشتہ ماہ واٹس ایپ پر غیرملکی نمبر سے دھمکی آمیز پیغامات بھی مل چکے۔ ایف آئی اے سائبر کرائم ونگ دھمکی آمیز پیغامات کے معاملے کی تحقیقات کر رہا ہے۔ خطرات کے باعث مناسب سکیورٹی فراہم کی جائے۔

لاہور: (ویب ڈیسک) پنجاب میں کفایت شعاری دعوے بس دعوے ہی نکلے، وزیراعلی پنجاب سردار عثمان بزدار کے دفتر کی تزئین وآرائش پر 4 کروڑ 91 لاکھ روپے خرچ ہونگے۔ وزیر اعلی پنجاب کے ساتھ ساتھ سٹاف کے دفاتر کی بھی تزئین و آرائش کی جائے گی۔
وزیر اعلی پنجاب سردار عثمان بزدار کے دفتر کی تزئین وآرائش پر 4 کروڑ 91 لاکھ روپے خرچ ہونگے۔ وزیر اعلی کے دفتر میں نئے ائیرکنڈیشنر نصب، قالین بچھائے جائیں گے۔ وزیر اعلی کے دفتر کی پینٹنگ اور دیواروں پر تاریخی تصاویریں بھی لگائی جائیں گی۔ سول سیکرٹریٹ میں قائم وزیراعلی پنجاب کے دفتر کی تزئین وآرائش پر یہ فنڈ خرچ ہوں گے۔
محکمہ خزانہ پنجاب کے مطابق محکمہ مواصلات و تعمیرات نے تخمینہ لگا کر محکمہ خزانہ سے فنڈ کے اجرا کی استدعا کی ہے۔ سپلمنٹری گرانٹ کے اجرا کے لیے سمری سٹیڈنگ کیبنٹ کمیٹی برائے خزانہ کو ارسال کی جاچکی ہے۔
محکمہ خزانہ پنجاب کے مطابق کابینہ کی منظوری کے بعد 4 کروڑ 91 لاکھ روپے کے فنڈ محکمہ مواصلات کو دئیے جائیں گے، وزیر اعلی پنجاب کے دفتر کی تزئین و آرائش پر یہ فنڈ بطور سپلمنٹری گرانٹ دی جائے گی۔

لاہور: (ویب ڈیسک) شہزاد اکبر نے کہا ہے کہ شہباز شریف 10 سال وزیراعلیٰ رہے، کاروبار کا بچوں سے کیسے پوچھیں ؟ رمضان شوگر ملز شہباز شریف نے بنائی، بچوں نے نہیں، شہباز شریف کو عدالت میں جواب دینا چاہیے۔
مشیر برائے احتساب شہزاد اکبر نے لاہور میں نیوز کانفرنس کرتے ہوئے کہا کہ شہباز شریف نے لاہور ہائیکورٹ میں درخواست دائر کی تھی، انہوں نے جتنی درخواستیں دیں وہ مسترد ہوگئیں، شہباز شریف بینکنگ کورٹ اسلام آباد میں پیش نہیں ہوئے، شوگر کمیشن کی تحقیقات میں رمضان شوگر ملز کے بے نامی اکاؤنٹس سامنے آئے، شہباز شریف پارٹی سربراہ ہیں، انہوں نے آج تک سوالوں کا جواب نہیں دیا، شہباز شریف کا مؤقف ہے کاروباری معاملات کا بچوں سے پوچھا جائے، شہباز شریف وزیراعلیٰ نہیں ہوتے تو ان کے کاروبار میں اضافہ نہیں ہوتا، شہباز شریف جب وزیراعلیٰ ہوتے ہیں ان کے کاروبار میں اضافہ ہوتا ہے۔
شہزاد اکبر کا کہنا تھا کہ شہباز شریف کا شریک ملزم مسرور انور ان کے مالی معاملات دیکھتا تھا، شہباز شریف قوم کو بتائیں ان کے اکاؤنٹس میں رقوم کہاں سے آئیں ؟ نواز شریف نے آج تک اپنی میڈیکل رپورٹس جمع نہیں کرائیں، عدالت شہباز شریف کو حکم کرسکتی ہے کہ نواز شریف کو واپس لائیں۔