اسلام آباد (مانیٹرنگ ڈیسک )وفاقی وزیر اطلاعات مریم اورنگزیب نے کہا ہے کہ وزیر اعظم جے آئی ٹی کے سامنے پیش ہو کر تاریخ رقم کریں گے، نواز شریف احتساب کے لئے پہلے دن سے ہی تیار تھے۔ وزیر اعظم نواز شریف کی پانامہ جے آئی ٹی میں پیشی کے معاملے پر ردعمل ظاہر کرتے ہوئے وزیر مملکت برائے اطلاعات مریم اورنگزیب کا کہنا تھا کہ تاریخ رقم ہونے جا رہی ہے، وزیر اعظم احتساب کے لئے پہلے دن سے تیار تھے، وزیر اعظم کو لیٹر موصول ہو چکا ہے اور شریف فیملی نے تحفظات کے باوجود آئین اور قانون کا راستہ استعمال کیا ہے۔ مریم اورنگزیب کا مزید کہنا تھا کہ اپوزیشن پانامہ لیکس پر سیاست کر رہی تھی، عمران خان کہتے تھے کہ شریف فیملی اور نواز شریف پیش نہیں ہونگے اور اپوزیشن اور عمران نے چار سال پانامہ کو بیساکھی بنا کر سیاست کی۔ مسلم لیگ(ن) کے رہنما دانیال عزیز نے کہا ہے کہ جے آئی ٹی میں گواہوں کو کہا جارہا ہے کہ جلتی آگ میں کیوں پاو¿ں دینے آئے ہو، لوگوں کو جھوٹا بولا جارہا ہے جس کی شکایت نیشنل بینک کے صدر نے بھی کی۔ نجی ٹی وی کے مطابق اسلام آباد میں وزیر مملکت برائے اطلاعات و نشریات مریم اورنگزیب کے ہمراہ میڈیا سے گفتگو کرتے ہو ئے انکا کہنا تھا کہ ہماری خواہش تھی کہ ہمارے تحفظات پر بھی بات کی جائے اور حسین نوازکے چند تحفظات کو جے آئی ٹی نے بھی تسلیم کیا۔ آج عدالت میں واٹس ایپ کال اور جے آئی ٹی کی دھمکیوں پر بات ہوئی دانیال عزیز نے کہا کہ جو معاملہ جمالی بینچ اور کھوسہ بینچ میں طے نہ ہو پایا اب جے آئی ٹی میں آگیا ہے کیا یہ جے آئی ٹی محض وقت تو ضائع نہیں کررہی ہم اس کی رپورٹ پڑھ کر اپنا رد عمل دیں گے۔ وزیرمملکت برائے اطلاعات مریم اورنگزیب کا کہنا ہے کہ وزیراعظم نے عدلیہ کی بحالی کے لیے لانگ مارچ کیا اور عدلیہ کے رتبے کو بحال کرنے کے لیے سڑکوں پرنکلے۔اب بھی وزیراعظم قانون کی حکمرانی کےلئے تاریخ درج کرنے جارہے ہیں اور انہوں نے عدلیہ کی تعظیم میں جمعرات کو جے آئی ٹی کے سامنے پیش ہونے کا فیصلہ کیا ہے۔” عدالتوں سے بھاگنے کا کام عمران خان نے کیا جو چٹھیاں لکھ لکھ کر عدالت سے استثنیٰ مانگتے ہیں“۔ وزیرمملکت اطلاعات مریم اورنگزیب کا کہنا تھا کہ آج فخر ہے پاکستان میں جمہوریت مستحکم ہو رہی ہے، وزیراعظم نے قوم سے خطاب میں کہا تھا جب سپریم کورٹ بلائے گی میں ضرور جاو¿ں گا انہوں نے ہی جے آئی ٹی بنانے کے لیے خط لکھا تھا اوراب جب جے آئی ٹی کی طرف سے سمن بعد میں آیا وزیراعظم نے جے آئی ٹی میں جانے کا فیصلہ پہلے کیا۔ ان کا کہنا تھا کہ ماضی میں کسی کو کمر درد، دل کی تکلیف، کبھی دماغی توازن ٹھیک نہ ہونےکا بہانہ بنایا گیا بلکہ کسی نے تو دماغی امراض سے متعلق سرٹیفیکٹ بھی جمع کرائے۔ عدالتوں سے بھاگنے کا کام عمران خان نے کیا اور چٹھیاں لکھ لکھ کر قانون سے استثنیٰ مانگتے ہیں، 2018 ئ میں عمران خان کا جو حال عوام کرے گی۔ انہیں کہنا پڑے گا یاد ماضی عذاب ہے یارب، چھین لے مجھ سے حافظہ میرا۔

اسلام آباد(ویب ڈیسک) وزیر مملکت برائے اطلاعات و نشریات مریم اورنگزیب کا کہنا ہے کہ عمران خان سپریم کورٹ سے فرار ہونے کی کوشش کررہے ہیں لیکن انہیں جھوٹ بولنے کی سزا بھگتنا پڑے گی۔سپریم کورٹ کے باہر میڈیا سے بات کرتے ہوئے وزیر مملکت مریم اورنگزیب کا کہنا تھا کہ لوگوں پر بہتان تراشی کرنے والے شخص کے کیس کی سماعت کی جارہی ہے اور عمران خان کو جواب اب سپریم کورٹ میں دینا ہوگا، انہوں نے اداروں اور لوگوں پرالزامات لگائے لیکن اب عمران خان سپریم کورٹ سے فرار ہونے کی کوشش کررہے ہیں،عمران خان کوجھوٹ بولنے کی سزا بھگتنا پڑے گی۔ ان کا کہنا تھا کہ عمران خان غیرملکی فنڈنگ اور اثاثوں کی معلومات کی غلط فراہمی اور اپنی آف شور کمپنیوں کا بھی جواب دیں، آپ خالی کرسیوں سے خطاب اور جے آئی ٹی کومتنازع بناتے ہیں اور الیکشن کمیشن کے فیصلوں کے خلاف عدالتوں سے حکم امتناعی مانگتے ہیں۔مریم اورنگزیب نے کہا کہ عمران خان کو شہباز شریف پر جھوٹا الزام لگانے پر نوٹس موصول ہوچکا ہے جب کہ معافی مانگنے کی تو آپ کو عادت پڑ گئی ہے، الزام لگاتے ہیں اور پھر معافی مانگ لیتے ہیں، عمران خان پنجاب میں جاکر شہباز شریف کی کارکردگی دیکھنا چاہتے ہیں تاہم انہیں خیبر پختونخوا میں پنجاب کی نقل کرنے کا فائدہ نہیں ہوگا کیونکہ انہوں نے خیبر پختونخوا میں ترقی کے بجائے بہت وقت ضائع کیا۔ انہوں نے کہا کہ عمران خان پر اٹھنے والے سوالات سے متعلق پوری قوم جواب کی منتظر ہے جب کہ الیکشن کمیشن نے خود کہا کہ عمران خان اداروں کی تضحیک کرتے ہیں، دوسروں پر الزامات لگانیوالے جواب دینے الیکشن کمیشن یا سپریم کورٹ کیوں نہیں آتے؟