لاہور (خصوصی رپورٹ) گلبرگ کے علاقہ جام شیریں پارک کے قریب وحشیانہ تشدد کرکے نوجوان کو قتل کرنے والا معروف اداکارہ دیدار کا شوہر حمزہ بھٹی اور ایک مذہبی رہنما کا بیٹا محمود زوار نکلے۔ شوہر کو بچانے کے لئے اداکارہ دیدار نے کئی اہم شخصیات سے رابطے شروع کردیئے۔ پولیس نے حمزہ بھٹی کی گرفتاری کے لئے اس کے گھر جوہر ٹاﺅن اللہ ہو چوک کے قریب چھاپے مارا لیکن وہ بچ نکلا۔ دونوں ملزمان کو قتل کے مقدمہ میں نامزد کردیا گیا ہے۔ مقتول حسن کی پوسٹ مارٹم رپورٹ بھی پولیس کے حوالے کردی گئی۔ مقتول پر وحشیانہ تشدد کیا گیا۔ تین روز قبل گلبرگ کے علاقہ کبوتر پورہ کے رہائشی حسن کو کار سوار ملزموں نے جام شیریں پارک کے قریب گاڑی روک کر تشدد کا نشانہ بنایا تھا۔ ملزمان اس کا موبائل فون بھی لے گئے تھے۔ زخمی حالت میں حسن ہسپتال میں دم توڑ گیا۔ مقتول کے کزن اسلم پرویز کے بیان پر گلبرگ پولیس نے مقدمہ درج کرلیا۔ ابتدائی تفتیش میں معلوم ہوا ہے کہ ملزمان گاڑی نمبر LEC-777 پر فرار ہوئے تھے۔ گاڑی کا ریکارڈ نکلوایا تو وہ ڈیفنس کے رہائشی سلمان کے نام نکلی۔ پولیس نے اسے حراست میں لیا تو اس نے بتایا کہ اس نے دو سال قبل یہ گاڑی حمزہ علی بھٹی کو فروخت کردی تھی جو کہ اداکارہ دیدار کا شوہر ہے۔ پولیس ذرائع کے مطابق حمزہ علی بھٹی کو بچانے کے لئے اس کے کئی سفارشی میدان میں آگئے ہیں۔ انویسٹی گیشن پولیس کے مطابق جلد ہی مزمل علی بھٹی کو گرفتار کرلیا جائے گا۔ ملزمان نے حسن کو گاڑی اوورٹیک کرنے پر تشدد کا نشانہ بنایا تھا۔
دیدار کا شوہر
