لاہور (نیوزایجنسیاں) نیوزی لینڈ کے ہاتھوں پہلے ٹی 20 میچ میں شرمناک شکست پر قوم کیساتھ ساتھ سابق کرکٹرز بھی سیخ پا ہیں جبکہ عاقب جاوید تو میچ کے بعد کپتان کے انٹرویو پر بھی سخت برہم ہو گئے۔نجی ٹی وی کے پروگرام میں گفتگو کرتے ہوئے انہوں نے کہا کہ جس نے سرفراز احمد کا یہ انٹرویو سنا ہو گا وہ کیا سوچ رہا ہو گا؟ یعنی وہ کہہ رہے ہیں کہ باﺅلرز نے جتنی اچھی باﺅلنگ کی اگر اہم نے 140 رنز بنائے ہوتے تو میچ جیت جاتے۔ میں سمجھتا ہوں کہ ٹھیک ہے کہ ایک برا دن ہو سکتا ہے جس روز اچھی کارکردگی نہیں دکھا جا سکتی لیکن مسلسل 6 برے میچ اور آپ ایک ہی طرح کی کارکردگی دکھاتے جا رہے ہیں اور پھر کہتے ہیں کہ ہم نے ایسا کیا ہوتا تو یہ جاتا۔نیوزی لینڈ کے باﺅلرز کیا بہت ہی اچھے ہیں یا بڑی بڑی سوئنگ ہو رہی تھی کہ کھیلنا ہی مشکل ہو گیا تھا؟ اس کا تو یہ مطلب ہوا کہ ہم بڑی ٹیموں کے ساتھ کھیلنے کی پوزیشن میں ہی نہیں ہیں۔
