ڈیرہ غازی خان (ویب ڈیسک) پولیس، رینجرز اور حساس اداروں کی مشترکہ کارروائی میں 3 دہشت گرد ہلاک اور 2 رینجرز اہلکار زخمی ہو گئے۔پاک فوج کے شعبہ تعلقات عامہ کے مطابق پاک سرزمین کو دہشت گردی سے پاک کرنے کے لیے آپریشن ردالفساد کامیابی سے جاری ہے اور اس آپریشن کے سلسلے میں ملک بھر میں دہشت گردوں کے خلاف کارروائیاں کی جا رہی ہیں۔ پنجاب رینجرز، ایلیٹ پولیس اور حساس اداروں کے اہلکار خفیہ اطلاع پر کارروائی کے لیے کے ڈیرہ غازی خان پہنچے تو ملزمان نے فائرنگ کر دی جس کے نتیجے میں 2 رینجرز اہلکار زخمی ہو گئے۔سیکورٹی فورسز کی جوابی کاروائی میں 3 دہشت گرد ہلاک ہو گئے جن کے قبضے سے کلاشنکوف، دستی بم اور بارود سمیت دیگر اسلحہ برآمد کر لیا گیا۔
