راولپنڈی(خصوصی رپورٹر)انسداد دہشت گردی راولپنڈی کی خصوصی عدالت نمبر 1 کے جج امجد علی شاہ نے توہین رسالت، توہین قرآن اور توہین مذہب کے مقدمہ میں نامزد ملزم کو الزامات ثابت ہونے پر موت اور عمر قید بامشقت کی سزا سنا دی ہے عدالت نے دیگر دفعات کے تحت ملزم کو مجموعی طور پر 32 سال قید بامشقت اور 13 لاکھ روپے جرمانے کی سزا بھی سنائی ہے عدم ادائیگی جرمانہ کی صورت میں ملزم کو مزید اڑھائی سال قید بھگتنا ہوگی ایف آئی اے سائبر کرائم نے 3 اگست 2018 کو محمد ابتسام المصطفی کے خلاف مقدمہ درج کیا تھا جس میں الزام تھا کہ ملزم نے فیس بک پر اپنے نام سے اکانٹ بنا کر اس پر توہین رسالت، توہین قرآن اور توہین مذہب پر مبنی مواد شئیر کیا گزشتہ روز ٹرائل مکمل ہونے پر عدالت نے ملزم کو تعزیرات پاکستان کی دفعہ 295 سی کے تحت موت کی سزا سناتے ہوئے حکم دیا ہے کہ ملزم کی موت واقع ہونے تک اسے پھانسی کے پھندے پر لٹکایا جائے تاہم سزائے موت پر عملدرآمد ہائی کورٹ کی توثیق سے مشروط ہوگا عدالت نے 295 بی کے تحت ملزم کو عمر قید بامشقت اور 295 اے کے 10 سال قید بامشقت اور 1 لاکھ روپے جرمانے کی سزا سنائی ہے اسی طرح انسداد دہشت گردی ایکٹ کی دفعہ 7/1 جی کے تحت 5 سال قید بامشقت اور 5 لاکھ روپے جرمانہ، دفعہ 9 اے ٹی اے کے تحت 5 سال قید بامشقت اور 5 لاکھ روپے جرمانہ اور دفعہ 11 ڈبلیو کے تحت دفعہ 7/1 جی کے تحت 5 سال قید بامشقت اور 1 لاکھ روپے جرمانہ جبکہ پیکا ایکٹ 2016 کی دفعہ 11 کے تحت 7 سال قید اور 1 لاکھ روپے جرمانے کی سزا سنائی ہے عدم ادائیگی جرمانہ پر ملزم کو مجموعی طور پر اڑھائی سال قید کی مزید سزا بھگتنا ہوگی عدالت نے ملزم کو ضابطہ فوجداری کی دفعہ 382 بی کا فائدہ بھی دیا ہے جس کے تحت ملزم کا عرصہ حوالات سزا سے منہا تصور ہوگا۔ یاد رہے کہ انسداد دہشت گردی عدالت نے جمعہ کے روز توہین رسالت کے ملزم کو چوتھی بار سزائے موت سنائی ہے لاہور ہائی کورٹ پنڈی بنچ اسے قبل ملزم کا کیس تین مرتبہ ریمانڈ بیک کرچکا ہے۔ انسداد دہشت گردی کی عدالت نے پہلی مرتبہ 28 ستمبر 2019 کو ملزم کو عمر قید کی سزا سنائی تھی۔ ملزم نے ٹرائل کورٹ کے فیصلے کیخلاف پہلی اپیل لاہور ہائیکورٹ پنڈی بنچ میں دائر کی۔ جس پر جسٹس چوہدری عبدالعزیز اور جسٹس شاہد محمود عباسی پر مشتمل ڈویژن بنچ نے اپیل منظور کرتے ہوئے 14جون2021 کو کیس از سرِ نو سماعت کے لئے ٹرائل کورٹ کو واپس بھیج دیا۔ ٹرائل کورٹ نے دوسری مرتبہ ملزم کو عمر قید کے بجائے موت کی سزا سنا دی۔ جس پر ملزم نے ٹرائل کورٹ کے فیصلے کے خلاف دوسری اپیل لاہور ہائیکورٹ پنڈی بنچ میں دائر کی۔ جس پر جسٹس چوہدری عبدالعزیز اور جسٹس صداقت علی خان نے 13 نومبر 2023 کو کیس ایک مرتبہ پھر ٹرائل کورٹ کو واپس بھیج دیا۔ جہاں انسداد دہشت گردی عدالت راولپنڈی نے دوسری مرتبہ بھی ملزم کی سزائے موت برقرار رکھی۔ جس پر ملزم نے ٹرائل کورٹ کے فیصلے کے خلاف تیسری اپیل ہائیکورٹ میں دائر کی۔ جس پر جسٹس صداقت علی خان اور جسٹس تنویر احمد شیخ نے 12 مئی 2026 کو تیسری مرتبہ کیس ریمانڈ بیک کیا۔ تاہم گزشتہ روز انسداد دہشتگردی عدالت نے چوتھی مرتبہ ملزم کو سزائے موت کے ساتھ عمر قید کی سزا سنادی۔
