دبئی (اے پی پی) انٹرنیشنل کرکٹ کونسل (آئی سی سی) کی تازہ ترین ون ڈے رینکنگ میں آسٹریلوی ٹیم جنوبی افریقہ کے ہاتھوں ون ڈے سیریز میں 5-0 سے وائٹ واش کے باوجود پہلے نمبر پر براجمان ہے، جنوبی افریقہ دوسرے نمبر پر موجود ہے، بلے بازوں میں اے بی ڈی ویلیئرز سرفہرست ہیں، ڈیوڈ وارنر 9 درجے ترقی پا کر کیریئر بہترین تیسرے نمبر پر آ گئے، ڈی کوک 5 درجے بہتری کے ساتھ چوتھے نمبر پر پہنچ گئے، پاکستان کے بابراعظم 57 درجے لمبی چھلانگ لگا کر 15ویں نمبر پر آ گئے، ریلی روسو 30 درجے ترقی کے ساتھ 32ویں نمبر پر پہنچ گئے، باﺅلرز میں ٹرینٹ بولٹ نے سنیل نارائن سے پہلی پوزیشن چھین لی۔ آل راﺅنڈرز میں شکیب کا پہلی پوزیشن پر قبضہ برقرار ہے۔ جمعرات کو آئی سی سی کی طرف سے جاری کردہ تازہ ترین عالمی درجہ بندی میں آسٹریلوی ٹیم کے ریٹنگ پوائنٹس میں کمی ہوئی ہے تاہم وہ 119 پوائنٹس کے ساتھ سرفہرست ہے، جنوبی افریقہ دوسرے، نیوزی لینڈ تیسرے، بھارت چوتھے، انگلینڈ پانچویں، سری لنکا چھٹے، بنگلہ دیش ساتویں، پاکستان آٹھویں اور ویسٹ انڈیز نویں نمبر پر ہے، بلے بازوں میں ڈی ویلیئرز پہلے اور کوہلی دوسرے نمبر پر برقرار ہیں، ڈیوڈ وارنر جنوبی افریقہ کے خلاف ون ڈے سیریز میں 386 رنز بنا کر 9 درجے ترقی پا کر کیریئر بہترین تیسرے نمبر پر آ گئے، ڈی کوک کینگروز کے خلاف سیریز میں 300 سے زائد رنز بنا کر 5 درجے بہتری پا کر چوتھے نمبر پر پہنچ گئے، پاکستان کے بابراعظم ویسٹ انڈیز کے خلاف مسلسل تین سنچریاں بنا کر 57 درجے ترقی پاتے ہوئے 15ویں نمبر پر پہنچ گئے، دوسری جانب نیوزی لینڈ کے ٹرینٹ بولٹ دنیا کے نمبر ایک باﺅلر بن گئے، سنیل نارائن تنزلی کے ساتھ دوسرے نمبر پر چلے گئے۔، عمران طاہر ترقی پاتے ہوئے تیسرے، عادل رشید ساتویں، مشرفی نویں اور محمدنبی دسویں نمبر پر پہنچ گئے۔ شکیب الحسن دنیا کے نمبر ایک آل راﺅنڈر برقرار ہیں۔
