کولمبو(ویب ڈیسک )سری لنکا کرکٹ بورڈ نے ٹیم کے اگلے ماہ جنوبی افریقہ کے خلاف ہونے والے دورے کی تیاریوں کے لیے پاکستان کے سابق کپتان وسیم اکرم کی خدمات حاصل کرلی ہیں۔وسیم اکرم جمعرات کو کولمبو میں ایک روزہ کوچنگ کلینک کا انعقاد کریں گے۔سری لنکا رکٹ بورڈ کے سربراہ تھیلانگا سوماتھیپالا کا کہنا تھا کہ ‘وسیم اکرم نے ہمارے منصوبے کا حصہ بننے کی دعوت کو قبول کرلیا ہے جو ہمارے لیے باعث فخر ہے’۔سوماتھیپالا نے کہا کہ اگر سری لنکن ٹیم کی درست سمت میں رہنمائی کی گئی تو وہ ورلڈ کپ 2019 جیت سکتی ہے۔خیال رہے کہ سری لنکا نے ورلڈ کپ 1996 لاہور میں منعقدہ فائنل میں کامیابی حاصل کرکے چمپیئن بننے کا اعزاز پایا تھا جبکہ 2007 اور 2011 کے دونوں عالمی کپ کے فائنل تک رسائی کی تھی۔سری لنکا کرکٹ بورڈ نے ٹیم کے زمبابوے کے کامیاب دورے کے بعد تربیتی سیشن کا اہتمام کیا ہے جبکہ ٹیم نے زمبابوے میں منعقدہ سہ فریقی سیریز میں کامیابی سے قبل میزبان ٹیم کے خلاف دو ٹیسٹ میچوں کی سیریز میں بھی کامیابی حاصل کی تھی۔سری لنکا کرکٹ ٹیم اگلے ماہ جنوبی افریقہ کے دورے پر روانہ ہوگی جہاں وہ 3 ٹیسٹ، 5 ایک روزہ اور 3 ٹی ٹوئنٹی میچوں پر مشتمل سیریز کھیلے گی جس کا آغاز 26 دسمبر کو ہوگا۔جنوبی افریقہ کے مشکل دورے کو دیکھتے ہوئے بورڈ نے وسیم اکرم جیسے عظیم باو¿لر کی خدمات حاصل کرنے کا فیصلہ کیا ہے۔وسیم اکرم کو پاکستان کی جانب سے ٹیسٹ اور ایک روزہ کرکٹ میں سب سے زیادہ وکٹیں حاصل کرنے کا اعزاز حاصل ہے، انھوں نے ٹیسٹ میں 414 اور 356 ایک روزہ میچوں میں 502 وکٹیں حاصل کی ہیں۔سری لنکا کے ہیڈکوچ گراہم فورڈ نے ٹیم کو خبردار کیا ہے کہ جنوبی افریقہ کے خلاف سخت چیلنج کا سامنا ہوگا۔واضح رہے کہ سری لنکا نے رواں سال اگست میں عالمی چمپیئن آسٹریلیا کو تین میچوں کی ٹیسٹ سیریز میں وائٹ واش کیا تھا جو ایک ریکارڈ ہے۔ٹیسٹ کرکٹ میں دو بہترین سیریز کے باوجود سری لنکن ٹیم درجہ بندی میں ساتویں نمبر پر موجود ہے جبکہ جنوبی افریقہ کی ٹیم کا پانچواں نمبر ہے۔
