اسلام آباد (این این آئی) اسٹیٹ بینک آف پاکستان کے سابق ڈائریکٹر طارق باجوہ کو آئندہ 3 برس کےلئے مرکزی بینک کے نئے گورنر کی حیثیت سے تعینات کردیا گیا۔فنانس ڈویژن کی جانب سے طارق باجوہ کی بحیثیت گورنر اسٹیٹ بینک تقرری کا نوٹیفیکیشن جاری کردیا گیا جو آئندہ چند روز میں اپنا عہدہ سنبھالیں گے۔طارق باجوہ کا تعلق پاکستان ایڈمنسٹریٹو سروس سے ہے جو گذشتہ ماہ 18 جون کو سیکریٹری خزانہ کے عہدے سے ریٹائر ہوئے۔اس سے قبل وہ سیکرٹری دفاعی امور ڈویژن، چیئرمین فیڈرل بورڈ آف ریونیو (ایف بی آر) ¾ سیکرٹری خزانہ پنجاب کی حیثیت سے بھی اپنے فرائض سرانجام دے چکے ہیں۔یاد رہے کہ رواں سال 29 اپریل کو اشرف وتھرا اپنی تین سال کی مدت ملازمت پوری کرنے کے بعد گورنر اسٹیٹ بینک کے عہدے سے ریٹائر ہوگئے تھے جس کے بعد ریاض ریاض الدین قائم مقام گورنر اسٹیٹ بینک کی حیثیت سے اپنے فرائض سرانجام دے رہے تھے۔
