اسلام آباد (امتیاز احمد بٹ ) مسلم لیگ ن کے قائد میاں محمد نواز شریف کی مرکزی قیادت سے مشاورت ، شہباز شریف کو پارٹی صدر بنانے پر اتفاق ، کل 23 ستمبر بروز ہفتہ انہیں لندن بلا لیا ، ذرائع کے مطابق میاں محمد نواز شریف نے مرکزی قیادت اور قریبی ساتھیوں سے مشاورت کر کے شہباز شریف کو پارٹی صدر بنانے کا فیصلہ کر لیا اور انہیں معاملات سے آگاہ کرنے کے لیے کل برطانیہ طلب کر لیا ہے ۔ ن لیگی ذرائع کے مطابق پارٹی کو متحد رکھنے اور ٹوٹنے سے بچانے کے لیے مریم نواز کی بجائے شہباز شریف کو پارٹی صدارت سونپنے کے لیے اتفاق رائے پیدا کر لیا گیا ہے ۔ اطلاعات ہیں کہ سابق وزیر داخلہ چوہدری نثار علی خان اور پوٹھوہار بیلٹ اوربعض دیگر علاقوں سے تعلق رکھنے والے ممبران اسمبلی نے مریم نواز کو صدر بنائے جانے کی صورت میں علیحدگی کا عندیہ دے رکھا تھا جس کے پیش نظر میاں نواز شریف نے قریبی ساتھیوں جن میں سعد رفیق سر فہرست ہیںسے مشاورت کی اور آئندہ پارٹی صدر کے لیے اتفاق رائے پیدا کرنے کی کوششیں کی ۔ مزید یہ کہ میاں محمد نواز شریف اپنی اہلیہ کلثوم نواز کی بیماری اور احتساب عدالتوں میں دائر ریفرنسز کے باعث کچھ ماہ برطانیہ میں ہی قیام کریں گے ۔
شہباز شریف کو ”ن“ لیگ کاصدر بنانے پر اتفاق، نواز شریف نے کل لندن بُلا لیا
