ملتان(ویب ڈیسک)عوامی مسلم لیگ کے سربراہ شیخ رشید کا کہنا ہے کہ نواز شریف نے اپنے ساتھیوں سے کہا ہے کی میرا نام بدنام ہوا اور سارا مال شہباز شریف نے بنایا ہے۔ملتان میں جلسے سے خطاب کرتے ہوئے عوامی مسلم لیگ کے سربراہ شیخ رشید نے کہا کہ چین میں کرپٹ لوگوں کو گولیاں مار دی جاتی ہیں، اللہ کرے کہ میٹرو کے چور کو بھی میٹرو کے اوپر گولی مار دی جائے۔انہوں نے کہا کہ ہر سیاستدان نے آ کر ہمیں بے وقوف بنایا، ایک نے روٹی، کپڑے اور مکان کا نعرہ لگایا لیکن لوگوں کو قبرستان بھی نہیں دیا گیا جب کہ ایک نے ملک کو ایشین ٹائیگر بنانے کا وعدہ کیا لیکن اپنے بچوں کو حرام کا مال کھلا کر ٹائیگر بنا دیا۔شیخ رشید نے کہا کہ ملک میں ہر طرف کرپشن کا بازار گرم ہے اور لوگ بے روز گاری سے مر رہے ہیں، ہم خود کو لٹوانے کے لیے چوروں اور لٹیروں کو ووٹ دیتے ہیں، ایسے لوگوں کو پاکستان میں سیاست کرنے کا کیا حق ہے جو اپنی جائیداد، مال اور اولاد کو باہر رکھے۔انہوں نے کہا کہ خدا گواہ ہے کہ نواز شریف نے اپنے ساتھیوں سے کہا ہے کہ میرا نام بدنام ہوا اور سارا مال شہباز شریف نے بنایا ہے۔حلف نامے میں تبدیلی کے حوالے سے انہوں نے حکمرانوں کو شدید تنقید کا نشانہ بناتے ہوئے کہا کہ آپ سے کبھی اپنے باپ کا نام بدلنے میں غلطی نہیں ہوئی لیکن ان سے غلطی ہو گئی۔عوامی مسلم لیگ کے سربراہ نے اسحاق ڈار کو منی لانڈرر قرار دیتے ہوئے کہا کہ یورپ کی 100 سال کی تاریخ میں اگر مجھے ایک وزیر کا نام بتا بھی دیا جائے جس پر کرپشن کا الزام آیا ہو اور اس نے استعفیٰ نہ دیا ہو تو میں ابھی استعفیٰ دے دوں گا۔شیخ رشید نے دعویٰ کیا کہ (ن) لیگ کے جنوبی پنجاب کے 25 ایم این ایز پارٹی کو خدا حافظ کہنے والے ہیں جن کی فہرست میری جیب میں ہے جب کہ انہوں نے فہرست لہرا کر بھی دکھائی۔
