رکھ چکری، راولپنڈی (مانیٹرنگ ڈیسک ‘ ایجنسیاں) پاک فوج نے لائن آف کنٹرول پر پاکستانی حدود کی خلاف ورزی کرنے پر بھارتی جاسوس ڈرون کو مار گرایا ہے۔ تفصیلات کے مطابق آئی ایس پی آر کے مطابق بھارتی جاسوس ڈرون لائن آف کنٹرول پر رکھ چکری سیکٹر میں جاسوسی کر رہا تھا اور پاکستان کی حدود میں داخل ہو گیا جس پر پاکستانی شولرز نے اسے کامیابی سے نشانہ بنایا اور مار گرایا جبکہ اس کی تصاویر بھی پاک فوج کی جانب سے جاری کر دی گئی ہیں۔ بھارتی جاسوس ڈرون پاکستانی علاقے میں جاسوسی کر رہا تھا، پاک فوج نے اس کا ملبہ قبضے میںلے لیا ہے۔ڈائریکٹر جنرل آئی ایس پی آر آصف غفور باجوہ نے کہا ہے کہ بھارت مقبوضہ کشمیر میں انسانی حقوق کی خلاف ورزیاں کررہاہے، وہ کشمیریوں کو انکے حق خود ارادیت کے حصول کی جدوجہد سے نہیں روک سکتا۔ ہفتہ کے روز ڈی جی آئی ایس پی آر جنرل اصف غفور باجوہ نے کشمیر پر بھارتی قبضہ کو ستر سال ہونے پر اپنے پیغام میں کہا کہ مقبوضہ کشمیر میں بھارتی فوج نہتے کشمیریوں پر ظلم و ستم کررہی ہے تاکہ ان کی آواز کو دبایا جاسکے۔ لیکن کشمیریوں کی جدوجہد اور حق خو ارادیت ایسے ہتھکنڈوں سے نہیں روکا جاسکتا ہے ۔ ترجمان آئی ایس پی آر نے بھارت کی جانب سے جنگ بندی معاہدے کی خلاف ورزی کی تفصیلات بتاتے ہوئے کہاکہ 2017 ءمیں بھارتی فوج نے 1140 مرتبہ جنگ بندی معاہدے کی خلاف ورزی کی اور 2016 ءمیں 382 ، 2015 ءمیں 248 ، 2014 میں 315 مرتبہ سویلین آبادی پر فائرنگ کرکے بے شمار بے گناہوں اور معصوموں کو شہید اور زخمی کیا جس کی پاکستان نے ہمیشہ مذمت کی ہے۔ ڈی جی آئی ایس پی آر نے کہا ہے کہ بھارت آئے روز ایل او سی کے قوانین کی خلاف ورزی کر رہا ہے اور پاکستان بھارت کی ہر جارحیت کا منہ توڑ جواب دے گا، اور بھارت کی کنٹرول لائن پر اشتعال انگیزیاں قابل مذمت ہے اور بھارت کی اشتعال انگیزیاں مقبوضہ کشمیر کے لوگوں کی خود ارادیت کی جدوجہد کو ختم نہیں کر سکتی۔ بلکہ اس طرح کرنے سے مقبوضہ کشمیر کے لوگوں میں خود انفرادیت پیدا ہو گی۔
