ملتان(خصوصی رپورٹ)وزیرخارجہ خواجہ آصف امریکہ میں بھارتی دہشتگرد کلبھوشن یادیو کو رہا کرنے کا وعدہ کرکے آئے تھے۔ ذرائع کا کہنا ہے کہ امریکہ نے خواجہ آصف پر دباﺅ ڈالا تھا کہ وہ بھارت کے ساتھ تعلقات کو بہتر بنائیں جس کیلئے ضروری ہے کہ کلبھوشن یادیو کے کیس کو ختم کیاجائے اور اسے بھارت واپس جانے دیاجائے۔ خواجہ آصف نے بھارت سے تعلقات بہتر بنانے کے پہلے مرحلے کے طور پر کلبھوشن کی بیوی اور ماں سے ملاقات کا اہتمام کروایا ہے۔ بعدازاں بھارتی دہشتگرد کو امریکی جاسوس اور ٹیرارسٹ ریمنڈ ڈیوس کی طرح فرار کرادیاجائے گا۔ کراچی کے اخبار امت کے مطابق جب وزیرخارجہ خواجہ آصف نے ستمبر2017ءکو امریکہ کا دورہ کیا تھا تو ان پر دباﺅ ڈالاگیا کہ پاکستان بھارت کے ساتھ تعلقات کو بہتر بنائے جس کیلئے ضروری ہے کہ وہ کلبھوشن یادیو کو ہر ممکن ریلیف فراہم کرے اور اس کیس کو ختم کرنے کی کوشش کرے جس پر خواجہ آصف نے امریکی حکام کو ناصرف بھارتی دہشتگرد کلبھوشن یادیو کی اس کے اہلخانہ سے ملاقات کرانے کی یقین دہانی کرائی بلکہ کلبھوشن یادیو کو رہا کرانے کا بھی وعدہ کیا۔ ذرائع کے مطابق امریکہ کے اسی دورے میں خواجہ آصف نے امریکی حکام سے جماعت الدعوة کو دبانے کا بھی وعدہ کیا تھا۔ یاد رہے کہ بھارت کے ساتھ تعلقات بہتر بنانے کی خواہش کا اظہار کرتے ہوئے واشنگٹن میں ایشیا سوسائٹی میں تقریر کرتے ہوئے خواجہ آصف نے اسلام پسندوں پر تو دہشتگردی کا الزام لگایا تھا لیکن پاکستان میں دہشتگردی کے واقعات میں ملوث ”را“دہشتگرد کلبھوشن یادیو کا نام تک نہیں لیا تھا۔ خواجہ آصف حافظ محمد سعید اور ان کی جماعت الدعوة کو ہی نہیں حقانی نیٹ ورک کو بھی بوجھ قرار دے کر آئے تھے جبکہ یہ دونوں تنظیمیں پاکستان میں کسی بھی دہشتگردی کے واقعے میں کبھی بھی ملوث نہیں پائی گئیں۔ حافظ سعید کو پاکستان کی عدالتوں نے بھی بے گناہ قرار دیا ہے۔ خواجہ آصف نے یہ بیان دیا کہ ان کی حکومت کلبھوشن کی رحم کی اپیل پر فیصلہ کرسکتی ہے اور اگر کلبھوشن کی ماں اور بیوی سے ملاقات میں قونصلر ساتھ ہوگا تو اسے بھی ملاقات کا موقع دیاجائے گا۔ تاہم پیر کو کلبھوشن کی اپنی ماں اور بیوی سے ملاقات ہوئی تو بھارتی ہائی کمشن کا ڈپٹی ہائی کمشنران کے ساتھ تھا۔ اس پر ترجمان دفترخارجہ نے کہا کہ اس ملاقات میں بھارتی ڈپٹی ہائی کمشنر بطور مبصر موجود تھے۔ اس ملاقات کو قونصلر رسائی نہیں کہا جاسکتا اس لئے کہ یہ کلبھوشن کی اپنی ماں اور بیوی سے ملاقات تھی اور یہ آخری ملاقات نہیں تھی۔ ذرائع کے مطابق یہ رسائی اس کے باوجود دی گئی کہ دفترخارجہ جانتا ہے کہ اس طرح کی قونصلر رسائی کو تسلیم کرنے سے عالمی عدالت میں پہلے سے موجود مقدمے پر منفی اثر پڑسکتا ہے اس بیان سے یہ بھی ثابت ہوگیا کہ وزیرخارجہ خواجہ آصف کا مشن یہ ہے کہ کسی نہ کسی طرح کلبھوشن یادیو کو رہا کرایاجائے تاہم وزیرخارجہ کے اس مشن کو پاکستان کے قومی سلامتی کے محافظ اداروں کی تائید حاصل نہیں۔ ذرائع نے بتایا کہ بھارت کلبھوشن کی رہائی کیلئے کافی عرصے سے پاکستان کی حکومت کے ساتھ بیک ڈورڈپلومیسی کررہا ہے۔ اپریل2017ءمیں بھارتی سٹیل ٹائی کون سجن جندال بھی کلبھوشن یادیو تک قونصلر رسائی کا مطالبہ لے کر اسلام آباد میاں نوازشریف سے ملنے آیا تھا لیکن میاں نوازشریف مری میں موجود تھے تو جندال کو بغیر ویزے کے مری کے حساس علاقے تک رسائی دے دی گئی۔ ذرائع کا کہنا ہے کہ یہ محض انسانی ہمدردی یا اتفاق نہیں کہ کلبھوشن کو جیل کے بجائے دفتر خارجہ میں اپنی ماں اور بیوی سے ملوایا گیا ہے۔ اس کارروائی کی وجہ سے بھارت کے حوصلے بلند ہوں گے اور عالمی عدالت میں پاکستان کا مو¿قف کمزور ہوگا۔ ذرائع کے بقول کلبھوشن کے معاملے میں حکومت کی سنجیدگی اس سے بھی واضح ہوجاتی ہے کہ نہ تو سابق وزیراعظم میاں نوازشریف نے کلبھوشن کا نام لیا اور نہ ہی موجودہ وزیراعظم شاہدخاقان عباسی نے کلبھوشن کی کارروائیوں کی مذمت کی ہے۔ذرائع نے بتایا کہ جب پاکستان کے قومی سلامتی نے ا یران سے آنے والے بھارتی دہشتگرد کو گرفتار کیا جو حسین مبارک پٹیل کے نام سے سفر کررہا تھا تو اس نے ابتدائی تفتیش میں ہی اداروں کو بتادیا تھا کہ اس کا نام کلبھوشن یادیو ہے۔ وہ بھارتی بحریہ کا افسر ہے اور پاکستان کے مختلف علاقوں میں دہشتگردی کا منصوبہ ساز ہے۔ اس اہم کامیابی پر اس وقت کے آرمی چیف جنرل راحیل شریف‘ وزیراعلیٰ بلوچستان ثناءاللہ زہری‘ ڈی جی آئی ایس آئی اور ڈی جی آئی بی نے مشترکہ طور پر اس وقت کے وزیراعظم میاں نوازشریف سے ملاقات کی اور ان سے درخواست کی کہ آپ اس اہم کامیابی کا ٹیلی وژن پر اعلان کریں کیونکہ اس وقت کوئی وزیرخارجہ نہیں تھا اور وزارت خارجہ کا قلمدان میاں نوازشریف کے پاس تھا۔ ذرائع کے مطابق یہ خبر سن کر میاں نوازشریف کے چہرے کا رنگ متغیر ہوگیا تھا اور انہوں نے اس اہم کامیابی کا اعلان کرنے سے انکار کردیا تھا۔ اس کے بعد گرفتاری کا اعلان آئی ایس پی آر کے ڈائریکٹر جنرل اس وقت میجر جنرل عاصم باجوہ نے وزیراطلاعات سنیٹر پرویز رشید کے ساتھ مشترکہ پریس کانفرنس میں کیا۔ اس موقع پر پرویز رشید کا چہرہ ان کے دل کی داستان سنارہا تھا۔ ان کا چہرہ اترا ہوا تھا اور انہوں نے نہایت تھکے ہوئے لہجے میں کہا کہ ڈی جی آئی ایس پی آر بتائیں گے کہ بات کیا ہے۔ میجر جنرل عاصم باجوہ نے ساری تفصیل بتائی اور بتایا کہ کلبھوشن یادیو کے پاس سے امریکی‘ ایرانی اور پاکستانی کرنسی کے علاوہ پاکستان کے نقشے برآمد ہوئے ہیں۔ اس گرفتاری کے بعد کئی بار مشیرخارجہ سرتاج عزیز میڈیا سے گفتگو میں یہ کہتے رہے کہ ہمارے پاس کلبھوشن کے خلاف کوئی سٹرونگ ثبوت موجود نہیں۔ یہ بیان انہوں نے کلبھوشن کی گرفتاری کے انکشاف کے بعد دیا تھا جبکہ اسی زمانے میں ایران کے صدر روحانی پاکستان آئے ہوئے تھے جن سے آرمی چیف جنرل راحیل شریف نے شکوہ کیا تھا کہ کلبھوشن کو آپ کی حکومت نے پالا ہے۔ ایرانی میڈیا اس ملاقات کی تردید کرتا رہا ہے۔ ذرائع کا کہنا ہے کہ حقیقت یہ ہے کہ کلبھوشن کی رہائی کیلئے بھارت اور امریکہ سرگرم ہوگئے ہیں اس لئے یہ خدشات موجود کہ کلبھوشن کو کسی بھی وقت ریمنڈ ڈیوس کی طرح سودے بازی کرکے رہا کروایاجاسکتا ہے۔ خیال رہے کہ ریمنڈڈیوس کی رہائی میں پنجاب حکومت کی مرضی ومنشا شامل تھی۔ دوسری جانب عسکری حلقوں کے قریبی ذرائع کا کہنا ہے کہ کلبھوشن یادیو کی پھانسی میں تاخیر تو ہوسکتی ہے لیکن اسے پاکستان سے باہر لے جانا آسان نہیں ہوگا۔ نوازلیگ کی حکومت ڈان لیکسن کے حوالے سے پہلے ہی اپنا کردار مشکوک بناچکی ہے اس معاملے پر پرویز رشید نے وزارت سے فارغ ہوئے۔ طارق فاطمی سے معاون خصوصی امورخارجہ کا عہدہ چھین لیا گیا اور راﺅ تحسین علی خان پرنسپل انفارمیشن آفیسر کے عہدے سے ہٹائے گئے اور انہیں ترقی بھی نہیں ملی۔
کلبھوشن

لاہور (نیااخبار رپورٹ) محکمہ داخلہ پنجاب نے ممکنہ دہشت گردی کے خطرے کے پیش نظر لاہور سمیت صوبے کے تمام بڑے شہروں میں قانون نافذ کرنے والے اداروں کو سکیورٹی کے فول پروف انتظامات کرنے کے احکامات جاری کردیئے۔ محکمہ داخلہ پنجاب کی جانب سے ملنے والی اطلاعات کے مطابق نیوایئر نائٹ کے موقع پر دہشت گردی کا خدشہ ہے جس سے بچنے کیلئے لاہور پولیس کی جانب سے سکیورٹی پلان تیار کرلیا گیا ہے۔ جس کے تحت شہر بھر میں تقریباً 10 ہزار اہلکار ڈیوٹی سرانجام دیں گے۔ یہ نفری مال روڈ، لبرٹی مارکیٹ، فیروزپور روڈ، کینال روڈ، شادمان ، فورٹریس سٹیڈیم، اقبال ٹاﺅن سمیت اہم مقامات پر تعینات کی جائے گی۔

لاہور (مانیٹرنگ ڈیسک) نواز شریف اور شہباز شریف کے ڈاکٹر طاہر القادری سے خفیہ مذاکرات‘ طاہرالقادری کے تمام مطالبات ماننے کی پیشکش کردی۔ یہ انکشاف سینئر صحافی نے نجی ٹی وی پروگرام میں کیا۔ انہوں نے کہا کہ شریف برادران نے خفیہ رابطوں میں طاہرالقادری کو پیشکش کی ہے کہ ہم ماڈل ٹاو¿ن سانحہ کے شہداءکا قصاص‘ زخمیوں کو معاوضہ اور متاثرین کی مدد کرنے کیلئے تیار ہیں۔ لیگی ذرائع کے مطابق شریف برادران اور طاہر القادری کے درمیان مذاکرات آخری سٹیج پر ہیں۔

اسلام آباد( مانیٹرنگ ڈیسک، آئی این پی) بھارت نے الزام لگایا ہے کہ کلبھوشن کی بیوی کے جوتے اور منگل سوتر اتروادیا گیا اور جوتے واپس نہیں کئے گئے، جبکہ پاکستان نے جواب میں کہا ہے کہ جوتوں میں کوئی مشکوک چیز تھی اسی لئے اتروائے گئے۔ پاکستان نے کلبھوشن فیملی کی توہین کی،ملاقات کا جو طریقہ کار اختیار کیا گیا وہ طے شدہ اصولوں سے مختلف تھا،سکیورٹی کے نام پر کلبھوشن بیوی کے منگل سوتر اتروائے گئے، پاکستانی حکام نے کلبھوشن کی اہلیہ کا جوتا بھی واپس نہیں کیا،کلبھوشن کی والدہ کو ان کی مادری زبان مراٹھی میں بات نہیں کرنے دی ،طے تھا کہ میڈیا کو فیملی کے قریب نہیں آنے دیا جائے گا،کلبھوشن کے بارے میں جھوٹے اور سوچے سمجھے فقرے کسے گئے، یادیو کے زیادہ تر ریمارکس پہلے سے تیار کرائے گئے تھے،فیملی کے لیے میٹنگ کا پورا ماحول خوفزدہ کرنے والا تھا، دونوں خواتین نے صورتحال کا بہادری اور وقار کے ساتھ سامنا کیا بھار تی ڈپٹی ہائی کمشنر کو بھی ایک اضافی شیشے کی دیوار کے پیچھے بٹھایا گیا۔بھارتی جاسوس کلبھوشن یادیو سے ان کی والدہ اور اہلیہ سے ملاقات کے ایک روز بعد بھارتی وزارت خارجہ کے ترجمان رویش کمار نے ایک بیان میں کہا ہے کہ سکیورٹی کے نام پر کلبھوشن کی ماں اور بیوی کے مذہبی اور ثقافتی اداب کی بھی خلاف ورزی کی گئی۔ ان کے منگل سوتر اتروائے گئے۔ ان کے کنگن اور بندی بھی اتروا لی گئی۔ یہی نہیں ان کے کپڑے بھی بدلوائے گئے جس کی کوئی ضرورت نہیں تھی۔رویش کمار نے مزید بتایا کہ ہمیں اس کی کوئی وجہ نہیں سمجھ میں آرہی کہ پاکستانی حکام نے میٹنگ ختم ہونے کے بعد کلبھوشن کی اہلیہ کا جوتا کئی بار درخواست کرنے کے باوجود واپس کیوں نہیں کیا۔ ہم انھیں متنبہ کرتے ہیں کہ وہ اس سے کوئی چال چلنے سے باز رہیں۔ترجمان نے کہا کہ کلبھوشن کی والدہ کو ان کی مادری زبان مراٹھی میں بات نہیں کرنے دی گئی اور جب بھی وہ مراٹھی میں بات کرنے کی کوشش کرتیں انھیں روک دیا جاتا۔انھوں نے کہا کہ دونوں ملکوں کے درمیان یہ طے پایا تھا کہ میڈیا کو فیملی کے قریب نہیں آنے دیا جائے گا اس کے باوجود کئی مرحلوں پر میڈیا کو ان کے نزدیک آنے دیا گیا انھیں ہراس کرنے دیا گیا اور کلبھوشن کے بارے میں جھوٹے اور سوچے سمجھے فقرے کسے گئے۔رویش کمار نے اپنے بیان میں مزید کہا کہ ‘اس میٹنگ کے بارے میں جو تفصیلات ہمیں ملی ہیں ان سے واضح ہے کہ جادھو شدید تنا ﺅ میں تھے اور وہ دبا ﺅکے ماحول میں بات کر رہے تھے۔ یادیو کے زیادہ تر ریمارکس پہلے سے تیار کرائے گئے تھے تاکہ ان سے پاکستان میں ان کی مبینہ سرگرمیوں کے پاکستانی منصوبے کی توثیق ہو سکے۔انھوں نے کہا کلبھوشن جس طرح نظر آرہے تھے ان کی صحت اور حالت کے بارے میں بھی سوالات پیدا ہوتے ہیں۔انھوں نے کہا کہ پاکستان کی جانب سے یقین دہانی کرائے جانے کے باوجود فیملی کے لیے میٹنگ کا پورا ماحول خوفزدہ کرنے والا تھا۔ تاہم دونوں خواتین نے صورتحال کا بہادری اور وقار کے ساتھ سامنا کیا۔ انہوں نے کہا بھارت کے ڈپٹی ہائی کمشنر کو بھی میٹنگ تک رسائی نہیں دی گئی اور انھیں ایک اضافی شیشے کی دیوار کے پیچھے بٹھایا گیا۔وزارت خارجہ نے کہا ہے کہ پاکستان نے جس طرح اس میٹنگ کا انتظام کیا اس سے یہ واضح ہے کہ کلبھوشن یادیو پر جو جھوٹے الزامات لگائے گئے ہیں یہ انھیں درست ثابت کرنے کی یہ ایک کوشش تھی۔’پاکستان نے جو کچھ بھی کیا اس میں سچائی کا کوئی عندیہ نہیں ملتا۔اس سے قبل کلبھوشن کی والدہ اور اہلیہ نے اسلام آباد سے واپس آنے کے بعد وزیر خارجہ سشما سوراج سے ملاقات کی۔ بعد میں انھوں نے وزارت خارجہ کے اہلکاروں کو بھی اس میٹنگ کے بارے میں بتایا ہے۔ دفتر خارجہ کا کہنا ہے کہ بھارتی جاسوس کلبھوشن یادیو کی اہلیہ کے جوتے میں کوئی مشکوک چیز موجود تھی اس لیے وہ جوتے رکھ کر انہیں متبادل جوتوں کا جوڑا فراہم کیا گیا۔ ترجمان دفتر خارجہ کے مطابق پاکستان کی قید میں موجود بھارتی جاسوس کلبھوشن یادیو سے گزشتہ روز ان کی اہلیہ اور والدہ کی ملاقات کروائی گئی، کلبھوشن کی بیوی کے جوتے میں کوئی مشکوک چیز پائی گئی جس پر انہیں متبادل جوتوں کا جوڑا دیا گیا۔ ترجمان دفتر خارجہ کے مطابق کلبھوشن کی بیوی کی جیولری اور دیگر ضروری اشیا واپس کردی گئیں جب کہ ان کے جوتے میں کیا تھا اس بات کی تصدیق کے لیے جوتے لیب بھجوادیے گئے ہیں، کلبھوشن کی بیوی نے موٹے سول والے جوتے پہن رکھے تھے۔ واضح رہے کہ پاکستان نے انسانی ہمدری کے تحت سزائے موت کے منتظر قیدی بھارتی جاسوس کلبھوشن یادیو سے ان کی والدہ آوانتی سودھی یادیو اور بیوی چیتنکاوی یادیو کی ملاقات کرائی تھی جو 40 منٹ تک جاری رہی۔

فیصل آباد(اے این این) مسلم لیگ ن کے رکن اسمبلی رضا نصر اللہ گھمن نے پاکستان تحریک انصاف میں شمولیت اختیار کرلی۔میڈیا رپورٹس کے مطابق مسلم لیگ ن کے مستعفی ہونے والے رکن اسمبلی رضا نصر اللہ گھمن آئندہ عام انتخابات میں این اے 75 چک جھمرہ سے پاکستان تحریک انصاف کے امیدوار ہونگے۔واضح رہے کہ پی ٹی آئی کی اعلی قیادت سے ہونے والی ڈیل کے بعد ہی انھوں نے استعفی دیا ہے، اس ڈیل میں پی ٹی آئی کے ضلعی صدر چوہدری علی اختر، دلدار چیمہ اور میاں نعیم نے کردار ادا کیا ہے۔ذرائع کے مطابق سابق ضلع ناظم رانا زاہد توصیف بھی این اے 75 سے پی ٹی آئی کی ٹکٹ کیلئے امیدوار تھے اور وہ کچھ عرصہ سے علاقہ کی سرکردہ شخصیات سے رابطوں میں بھی مصروف تھے مگر اب رضا نصراللہ گھمن کی ڈیل کے بعد این اے 75 میں توصیف برادران کیلیے کوئی گنجائش نہیں رہی اور وہ این اے80 تک محدود ہو جائیں گے۔

اسلام آباد (مانیٹرنگ ڈیسک) نواز شریف نے چودھری نثار کا تحریک عدل کی مخالفت کا بیان مسترد کردیا، پارٹی قائدین نے چودھری نثار کیخلاف انضباطی کارروائی کا فیصلہ کرلیا، نجی ٹی وی کے مطابق چودھری نثار کے تحریک عدل کی مخالفت میں دیئے بیان کو نواز شریف نے مسترد کردیا ہے، ن لیگی قائدین نے اس بیان پر انضباطی کارروائی کرنے کا فیصلہ کرلیا ہے، وزیر داخلہ احسن اقبال نے الزام لگایا ہے کہ چودھری نثار میری وزارت میں مداخلت کررہے ہیں، ان کیخلاف کارروائی کی جائے، پارٹی ذرائع کے مطابق ن لیگ میں ایک بڑا گروپ چودھری نثار کا مخالف بن چکا ہے، مرکزی قیادت نے چودھری نثار کو پارٹی سے نکالنے یا شوکاز نوٹس جاری کرنے پر غور شروع کردیا ہے۔

اسلا م آ با د (آن لائن) سابق وزیر اعظم محترمہ بے نظیر بھٹو شہید کی دسویںبرسی ا ٓج منائی جائے گی اس سلسلے میں جنوبی پنجاب کے شہروںملتان،ڈیرہ غازی خان،مظفر گڑھ،کوٹ ادو،بہاولپور،خانیوال،میاں چنوں،کبیروالا،جہانیاں،دنیا پور،لودھراں،وہاڑی سمیت ملک بھر کے تمام چھوٹے بڑے شہروں میںپیپلز پارٹی کے زیر اہتمام تعزیتی اجتماعات اور مختلف تقریبات منعقد کی جائیں گی جس میں محترمہ بے نظیر بھٹو شہیدکے ایصال ثواب کیلئے فاتحہ خوانی کی جائے گی اس موقع پر پیپلز پارٹی کے کارکن،سیاسی جماعتوں اور سول سوسائٹی کے ارکان شرکت کریں گے ۔مرکزی تقریب گڑھی خدابخش لاڑکانہ میں ہو گی جس میں شرکت کیلئے جہانیاں سمیت جنوبی پنجاب سے بھی قافلے روانہ ہو چکے ہیں۔واضح رہے کہ محترمہ بے نظیر بھٹو کو دس برس قبل 27دسمبر 2007ءکو اس وقت شہید کر دیا گیا جب وہ لیاقت باغ راولپنڈی میں ایک عوامی جلسے سے خطاب کے بعد اپنی گاڑی میں بیٹھ کر واپس اسلام آباد جا رہی تھیں۔محترمہ بے نظیر بھٹو کی شہادت کے بعد ان کے بیٹے بلاول بھٹو زرداری کو ان کا سیاسی وارث بنایا گیا ہے۔

نوشہروفیروز (آئی این پی) پاکستان پیپلز پارٹی کے چیئر مین بلاول بھٹو نے کہا کہ نواز شریف اور عمران خان کاکوئی سیاسی مستقبل نہیں نواز شریف نے عدلیہ مخالف تحریک چلائی تو نواز شریف سیاسی خودکشی کربیٹھےں گے، نااہل ہونے کے بعد جس ڈگر پر چل نکلے ہیں یہ راستہ ان کیلئے نقصان دہ ہوگا۔ منگل کو نوشہروفیروز کے نواحی علاقے میں ہولو ٹیکنالوجی کے ذریعے کارکنوں سے خطاب کرتے ہوئے چیئر مین پیپلز پارٹی بلاول بھٹو نے کہا کہ شہید بینظیر بھٹو نے اقتدار کیلئے نہیں ملک اور قوم کیلئے جان دی، الیکشن 2018 میں پی پی پی ملک بھر سے کلین سوئیپ کرے گی ن لیگ اور پی ٹی آئی کو آئندہ الیکشن میں تاریخی شکست ہوگی ، آصف علی زرداری نے کہا ہے کہ پیپلزپارٹی ان تمام مذہبی منافرت سے بھرپور عناصر کی مخالفت کرتی رہے گی جو اپنا نظریہ خلافت کے نام پر عوام پر تھوپنا چاہتے ہیں، شہید محترمہ بینظیر بھٹو کا پاکستان کے لئے وژن ایک جدید اور ترقی پسند ریاست کا تھا اور ان کا عزم مسلح مذہبی انتہاپسندوں کے خلاف مزاحمت سے تعبیر تھا۔ منگل کو شہید محترمہ بینظیر بھٹو کی دسویں یوم شہادت کے موقع پر اپنے پیغام میں انہوں نے کہاکہ آج ہم شہید محترمہ بینظیر بھٹو کو خراج عقیدت پیش کر رہے ہیں جن کا پاکستان کے لئے وژن ایک جدید اور ترقی پسند ریاست کا تھا اور ان کا عزم مسلح مذہبی انتہاپسندوں کے خلاف مزاحمت سے تعبیر تھا۔ یہ انتہاپسند پاکستانی ریاست اور معاشرے کو مذہب کے نام پر ہائی جیک کرنا چاہتے تھے۔ انہیں اچھی طرح سے معلوم تھا کہ انتہاپسندی اور مذہبی منافرت کے یہ بھیڑیے انہیں اپنے راستے سے ہٹانا چاہتے ہیں ، ان کے سامنے ایک آسان راستہ یہ تھا کہ وہ ان مذہبی انتہاپسندوں کی مزاحمت نہ کرتیں لیکن پاکستان کے عوام کے لئے ان کا ایک خواب اور وژن تھا جس کی تکمیل کے لئے انہوں نے انتہاپسندوں کے خلاف جنگ کی قیادت کی اور اپنی زندگی کا نذرانہ پیش کیا۔ آج ہمارے سر ان کی عقیدت میں جھکے ہوئے ہیں۔ انہوں نے کہا کہ یہ وہ خاصیتیں ہیں جن سے پاکستان پیپلزپارٹی کے لیڈران اور کارکن بھرپورہیں۔ پارٹی کو اپنے لیڈروں پر فخر ہے۔ آج اس موقع پر ہم شہید محترمہ بینظیر بھٹو اور ان تمام لوگوں کو سلام عقیدت پیش کرتے ہیں جنہوں نے جمہوریت، آئین اور قانون کی حکمرانی کے لئے جدوجہد کرتے ہوئے اپنی جانوں کا نذرانہ پیش کیا۔