اسلام آباد (این این آئی) سابق صدرِ پاکستان اور پاکستان پیپلز پارٹی پارلیمنٹیرنز کے صدر آصف علی زرداری نے یوم دفاع پاکستان کے موقع پر قوم کے نام اپنے پیغام میں کہا ہے کہ یہ وقت ملک اور معاشرے کے ازلی دشمن عسکریت پسندی اور انتہاپسندی کی سوچ کے خلاف متحد ہونے کا ہے۔ آج ہی کے روز 1965ءقوم نے مثالی اتحاد کا مظاہرہ کیا تھا۔ ہمیں ضرورت اس بات کی ہے کہ 1965ءکے اسی جذبے کے ساتھ ریاست اور معاشرے کے نئے دشمن یعنی انتہاپسندی کی سوچ کےخلاف متحد ہونے کا ہے۔ انہوں نے کہا کہ انتہاپسندی اور عسکریت پسندی کی سوچ پاکستان کی بقاءکےلئے خطرہ ہے۔ انہوںنے عوام سے اپیل کی کہ یہ جو دشمن ہمارے درمیان بیٹھا ہوا ہے اور ہر قسم کی سزا سے اب تک بچتا رہا ہے۔ آج ہمیں پہلے سے کہیں زیادہ اس بات کی ضرورت ہے کہ اپنی صفوں میں اتحاد پیدا کریں اور ان عسکریت پسندوں سے ملک کی بقاءکو جو خطرات لاحق ہوگئے ہیں ان کو ختم کرنے کے لئے متحد ہو جائیں۔ آج ہمیں دہشتگردی اور انتہاپسندی کے خلاف نئے جذبے سے لڑنے کی ضرورت ہے۔ ہم آج کے دن یہ عہد کریں کہ ہم اپنے اعتدال پسند، جمہوری اور پرامن ملک کے خلاف ہر خطرے سے نمٹنے کے لئے تیار رہیں گے اور ہمیں یہ عہد بھی کرناہے کہ اس ملک میں سیاسی تبدیلی ووٹ کی پرچی سے آئے گی نہ کہ دھونس اور زبردستی کے ذریعے۔ انہوں نے آج کے دن ہم قوم کے ان عظیم بیٹوں اور بیٹیوں کو بھی خراج عقیدت پیش کرتے ہیں جنہوں نے ہماری سرحدوں کی حفاظت کے لئے اپنی جانوں کا نذرانہ پیش کیا۔ انہوں نے یہ نذرانہ اس لئے پیش کیا کہ ہم آزادی سے رہ سکیں۔ ہمارے ان عظیم بیٹوں اور بیٹیوں کی قربانیاں رائیگاں نہیں گئیں۔

راولپنڈی (بیورو رپورٹ) پاک فوج نے یوم دفاع کا پرومو جاری کر دیا ہے جس میں آرمی چیف جنرل قمر جاوید با جوہ کا لہو گرمانے والے خطاب کو کچھ حصہ بھی شامل کیا گیا ہے جس میں ان کا کہنا ہے کہ دشمن مشرق میں ہو یا مغرب میں جان لے !اس کی گولیاں ختم ہو جائیں گی ہمارے جوانوں کی چھاتیاں نہیں۔تفصیلات کے مطابق (آج) 6ستمبر کو یوم دفاع منایا جا رہا ہے ،پاک فوج نے اس مناسبت سے جنرل ہیڈکوارٹرز (جی ایچ کیو)میں ہونے والے خصوصی پروگرام کا پرومو جاری کردیا ہے ۔پاک فوج کے شعبہ تعلقات عامہ(آئی ایس پی آر)کے ڈائریکٹر جنرل میجر جنرل آصف غفور کی جانب سے جاری ہونے والے ٹوئٹر پیغام کے مطابق یوم دفاع کی مرکزی تقریب 6 ستمبر(بدھ )کی رات 8 بجے شروع ہوگی جسے لائیو نشر کیا جائے گا۔ترجمان آئی ایس پی آر کی جانب سے جاری کیے گئے پرومو میں آرمی چیف جنرل قمر جاوید باجوہ کے بیان کا کچھ حصہ بھی شامل ہے۔اپنے لہو گرما دینے والے بیان میں آرمی چیف نے کہا، پاکستان کے دشمن جو مشرق یا مغرب میں ہیں، وہ میری یہ بات جان لیں کہ ان کے بارود اور گولیاں ختم ہوجائیں گی لیکن ہمارے جوانوں کی چھاتیاں ختم نہیں ہوں گی۔واضح رہے کہ 6 ستمبر، یومِ دفاعِ پاکستان کے طور پر ہر سال ان شہیدوں اور غازیوں کو خراجِ عقیدت پیش کرنے کے لیے منایا جاتا ہے جنہوں نے وطنِ عزیز کی سالمیت اور یکجہتی کے تحفظ کے لیے عظیم قربانیاں دیں۔ملک بھر میں یوم دفاع کے حوالے سے خصوصی تقریبات کا انعقاد کیا جاتا ہے۔

اسلام آباد (خبرنگار خصوصی) پاکستان تحریک انصاف کے سربراہ عمران خان نے کہا ہے کہ خیبر پختونخوا میں متعارف کروائے گئے نئے بلدیاتی نظام پر اس لیے اب تک مکمل طور پر عمل نہیں کیا جا سکا کیونکہ ان کی اپنی جماعت کے ارکانِ صوبائی اسمبلی اور صوبائی بیوروکریسی اس نظام کی مخالف ہے۔ برطانوی نشریاتی کو دیئے گئے انٹرویو میں عمران خان کا کہناتھا کہ اب میں خدا کا شکر ادا کرتا ہوں کہ 2013ءکے الیکشن میں ہمیں مرکز میں حکومت نہیں ملی ورنہ یہاں بھی خیبر پختونخوا والا حال ہوتا جہاں پرویز خٹک کے علاوہ سب نئے لوگ ہیں جنہیں ایک سال تک تو پتہ ہی نہیں چلا کہ ہو کیا رہا ہے۔ عمران خان نے کہا کہ انہوں نے خود اور ان کی ٹیم نے خیبر پختونخوا میں حکومت سے بہت کچھ سیکھا ہے،جو سبق ہم نے خیبر پختونخوا میں سیکھے ہیں وہ مرکز میں ہمارے بہت کام آئیں گے جب ہمیں یہاں پر حکومت ملے گی۔ان کا کہناتھا کہ قانونی طور پر تو یہ نظام پورے صوبے میں نافذ ہو چکا ہے لیکن اس کے عملاً نفاذ میں کچھ وقت لگے کا کیونکہ ہم نے اس میں ایسے انقلابی کام کیے ہیں جو اس سے پہلے پاکستان میں ہوئے ہی نہیں۔ اس لیے ان کی مخالفت بھی ہو رہی ہے، خود ہمارے ایم پی ایز اور بیوروکریسی کی طرف سے اس کی مخالفت ہو رہی ہے، خیبر پختونخوا کا بلدیاتی نظام پورے ملک میں سب سے اچھا ہے۔ عمران خان نے کہا کہ پاکستان کے لیے یہ ایک ‘بالکل نیا اور اچھوتا نظام ہے جس پر عمل کرنے میں کافی مشکلات پیش آ رہی ہیں۔کراچی کا میئر کہتا ہے کہ ہمیں خیبر پختونخوا والا نظام چاہیے۔ پنجاب کے بلدیاتی نمائندے کہتے ہیں کہ انہیں بھی وہی نظام چاہیے۔ اس نظام میں کچھ تو ہے ایسا، جبھی تو لوگ اس کا مطالبہ کرتے ہیں۔پاکستان تحریک انصاف کے سربراہ نے 2013 کے انتخابات میں مرکز میں حکومت نہ ملنے پر خدا کا شکر ادا کرتے کہا کہ اگر اس وقت انہیں مرکز میں حکومت مل جاتی تو ناتجربہ کار ارکان پارلیمنٹ کی وجہ سے انہیں مشکلات کا سامنا کرنا پڑتا۔عمران خان نے کہا کہ نا تجربہ کار ہونے کے باوجود ان کی ٹیم نے خیبر پختونخوا میں عمدہ کارکردگی کا مظاہرہ کیا ہے۔انہوں نے کہا کہ بلدیاتی نظام کا نفاذ، تعلیم کے شعبے میں سرمایہ کاری اور صحت میں اصلاحات خیبر پختونخوا حکومت کی تین ایسی کامیابیاں ہیں جن پر انہیں فخر ہے۔جتنا بجٹ ہم نے تعلیم پر خرچ کیا ہے، اتنا کسی دوسرے صوبے نے نہیں کیا۔ ہمارے سکولوں کی معیار اتنا بہتر ہوا ہے کہ ہزاروں بچے نجی سکولوں کو چھوڑ کر سرکاری سکولوں میں داخل ہوئے ہیں۔عمران خان نے کہا کہ نا تجربہ کار ہونے کے باوجود ان کی ٹیم نے خیبر پختونخوا میں عمدہ کارکردگی کا مظاہرہ کیا ہے۔انہوں نے کہا کہ بلدیاتی نظام کا نفاذ، تعلیم کے شعبے میں سرمایہ کاری اور صحت میں اصلاحات خیبر پختونخوا حکومت کی تین ایسی کامیابیاں ہیں جن پر انہیں فخر ہے۔جتنا بجٹ ہم نے تعلیم پر خرچ کیا ہے ¾ اتنا کسی دوسرے صوبے نے نہیں کیا ¾ ہمارے سکولوں کی معیار اتنا بہتر ہوا ہے کہ ہزاروں بچے نجی سکولوں کو چھوڑ کر سرکاری سکولوں میں داخل ہوئے ہیں۔جب ان کی توجہ اساتذہ یا عمارات کی عدم موجودگی کے باعث خیبر پختونخوا میں بند ہونے والے سینکڑوں سکولوں کی طرف دلوائی گئی تو انہوں نے تسلیم کیا کہ گو کہ ان کی حکومت نے تعلیم کےلئے بجٹ میں غیر معمولی اضافہ کیا ہے لیکن اس شعبے میں درپیش چیلنجز کے مقابلے میں یہ رقم ابھی بھی کم ہے۔صحت کے شعبے میں اپنی حکومت کی کامیابیوں کا ذکر کرتے ہوئے عمران خان نے کہا کہ ڈاکٹروں کی دیہات اور دور دراز علاقوں میں حاضری یقینی بنانا بہت مشکل کام تھا اس سے پہلے ڈاکٹر صرف پشاور ہی میں ملتے تھے ¾ ہم نے ان کی تنخوایں بڑھائیں ¾ سروس سٹرکچر بہتر کیا اور ڈاکٹروں کی تعداد بڑھائی۔ پہلے ہمارے صوبے میں تین ہزار ڈاکٹر تھے اب دس ہزار سے زائد ہیں۔پشاور کے سب سے بڑے ہسپتال لیڈی ریڈنگ سمیت مختلف ہسپتالوں کی عمارتوں کی حالت زار کے بارے میں ایک سوال پر عمران خان نے کہا کہ عمارتوں کی حالت بہتر بنانے کے لیے بہت بڑی رقم کی ضرورت ہے جو ان کے پاس نہیں ہے۔

اسلام آباد(آئی این پی‘مانیٹرنگ ڈیسک) چیئرمین نیب نے شریف خاندان اور اسحاق ڈار کے اثاثے منجمدکرنے کی سفارش مسترد کردی جبکہ پانامہ کیس کے حوالے سے نیب کے اہم ترین ایگزیکٹو بورڈ کا اجلاس آج طلب کرلیا گیا جس میں شریف خاندان، اسحاق ڈار کیخلاف ریفرنسز کی منظوری دی جائے گی۔تفصیلات کے مطابق چیئرمین نیب نے شریف خاندان اور اسحاق ڈار کے اثاثے منجمدکرنے کی سفارش مسترد کردی جبکہ شریف خاندان اور اسحاق ڈار کا نام ای سی ایل میں ڈالنے کی سفارش بھی مسترد کر دی ۔ دونوں معاملات پر فیصلہ نیب کورٹ کرے گی۔ دوسری جانب پانامہ کیس کے حوالے سے نیب کے اہم ترین ایگزیکٹو بورڈ کا اجلاس (آج ) بدھ کو طلب کرلیا گیا۔ذرائع کے مطابق اجلاس میں شریف خاندان، اسحاق ڈار کیخلاف ریفرنسز کی منظوری دی جائے گی، شریف خاندان کیخلاف 3 ریفرنسز دائر کرنے کی منظوری دی جائے گی۔ذرائع کے مطابق اسحاق ڈار کیخلاف آمدن سے زائد اثاثے بنانے کا ریفرنس دائر کرنے کی منظوری ہوگی، 7 ستمبر کو شریف خاندان، اسحاق ڈار کیخلاف ریفرنسز دائر کردئیے جائیں گے ۔2 ریفرنسز اسلام آباد، 2 پنڈی کی احتساب عدالتوں میں دائر کیے جائیں گے۔ اجلاس میں پراسیکیوٹر جنرل، ڈائریکٹر جنرل آپریشنز، ڈائریکٹر جنرل نیب پنڈی طلب کرلیے گے ۔ذرائع کے مطابق شریف خاندان کے اثاثے منجمد کرنے، نام ای سی ایل میں ڈالنے کا جائزہ لیا جائے گا،اسحاق ڈار کے اثاثے منجمد کرنے، نام ای سی ایل میں ڈالنے کا بھی جائزہ لیا جائے گا، ذرائع کے مطابق نواز شریف، حسن نواز، حسین نواز اور مریم نواز کیخلاف 3 ریفرنسز دائر ہوں گے، پارک لین اپارٹمنٹس، آف شور کمپنیوں اور عزیزیہ سٹیل ملز کے ریفرنسز دائر ہوں گے۔نیب پراسیکیوشن کی جانب سے کلیئر قرار دیئے گئے ریفرنسز میں ایوین فیلڈ، عزیزیہ اسٹیل ملز او ر آف شور کمپنیوں کے ریفرنسز شامل ہیں، سابق وفاقی وزیر خزانہ اسحاق ڈار کے خلاف آمدن سے زائد اثاثوں کا ریفرنس بھی کلیئر قرار دیاگیا ہے، شریف خاندان اور اسحاق ڈار کے خلاف ریفرنسز آپریشن ونگ کو ارسال کردیئے گئے ہیں۔