میڈرڈ(اے پی پی) ایسکو کی شاندار ہیٹرک کی بدولت سپین نے ارجنٹائن کو انٹرنیشنل فرینڈلی فٹ بال میچ میں یکطرفہ مقابلے کے بعد 6-1 گولز کے واضح مارجن سے ہرا دیا، برازیل نے عالمی چیمپئن جرمنی کو شکست دے کر اس کی مسلسل فتوحات کا تسلسل توڑ دیا۔ مختلف ممالک میں انٹرنیشنل فرینڈلی فٹ بال میچز کے سلسلے میں کھیلے گئے ایک میچ میں سپین نے ارجنٹائن کو با آسانی ایک کے مقابلے میں 6 گولز سے ہرا کا کامیابی حاصل کی، ایسکو نے شاندار ہیٹرک کر کے ٹیم کی جیت میں اہم کردار ادا کیا، ڈائیگو کوسٹا، تھیاگو اور لیگو نے ایک، ایک گول کیا، ارجنٹائن کی جانب سے واحد گول اوتامندی نے کیا۔ برازیل نے جرمنی کو سخت مقابلے کے بعد 1-0 گول سے شکست دی۔ جیسز نے پہلے ہاف کے 37ویں منٹ میں گول کر کے برازیل کو برتری دلائی اور ان کا یہی گول فیصلہ کن ثابت ہوا، جرمنی نے حریف ٹیم کی برتری ختم کرنے کیلئے آخر دم تک سرتوڑ کوشش کی تاہم برازیل کے مضبوط دفاع نے اسے کامیاب نہ ہونے دیا، فرانس نے رواں برس شیڈول ورلڈ کپ کے میزبان روس کو 3-1 گولز سے زیر کیا، سوئٹزرلینڈ نے پاناما کو 6-0 گولز کے واضح مارجن سے شکست دی، سکاٹ لینڈ نے ہنگری، یوکرین نے جاپان، تنزانیہ نے کونگو، جارجیا نے ایستونیا کو شکست دی، اٹلی اور انگلینڈ کے درمیان میچ کانٹے دار مقابلے کے بعد 1-1 گول سے برابری پر ختم ہوا۔
