ممبئی (ویب ڈیسک )فلم ساز راج کمار ہیرانی کی جانب سے بولی وڈ بابا سنجے دت کی زندگی پر بنائی گئی فلم ‘سنجو’ کی شاندار کامیابی کے بعد بھارت کے معروف فلم ساز رام گوپال ورما نے بھی اداکار کی زندگی پر ایک اور فلم بنانے کا اعلان کیا ہے۔رام گوپال ورما کے مطابق سنجے دت کی زندگی پر بنائی گئی راج کمار ہیرانی کی فلم ‘سنجو’ میں سنجے دت کی زندگی کا ایک رخ دکھایا گیا، اس فلم میں کئی حقائق کو پر بات ہی نہیں کی گئی۔رام گوپال ورما جو اس سے قبل ’ستیاِ سرکار، کمپنی، شون، بھوت، جنگل اور اب تک چھپن جیسی کرائم تھرلر اور جرائم پیشہ افراد کے کالے دھندے کے موضوعات پر فلم بنا چکے ہیں، ان کا کہنا ہے کہ وہ ‘سنجو: دی ریئل اسٹوری’ کے نام سے فلم بنائیں گے۔ممئبی مرر سے بات کرتے ہوئے رام گوپال نے بتایا کہ وہ اپنی فلم میں سنجے دت کی زندگی کے وہ واقعات دکھائیں گے، جنہیں راج کمار ہیرانی کی فلم میں نہیں دکھایا گیا۔فلم ساز کے مطابق ان کی فلم سنجے دت کی زندگی میں آنے والے ان واقعات سے پردہ اٹھائے گی، جن سے متعلق آج بھی سب سے ذیادہ چہ مگوئیاں کی جاتی ہیں۔تاہم فلم ساز کے اعلان کے بعد ہی خود سنجے دت اپنی زندگی کے ان واقعات پر بات کرتے دکھائی دے رہے ہیں، جن پر اب تک وہ خاموش تھے۔جب کہ دوسری جانب سے ان کی بہن نمرتا دت رام گوپال ورما سے یہ التجاء کرتی نظر آرہی ہیں کہ ان کی فلم اداکار کی زندگی میں ایک بار پھر مسائل اور مشکلات لائے گی، اس لیے فلم بنانے کی ضرورت نہیں۔سنجے دت کی بہن نمرتا دت نے مڈ ڈے سے بات کرتے ہوئے اعتراف کیا کہ ان کے بھائی نے پہلے ہی زندگی میں کئی مسائل کا سامنا کیا اور مشکلات دیکھیں، جب کہ رام گوپال ورما کی فلم ان کے خاندان کو ایک بار پھر ان ہی مشکلات میں ڈالے گی۔
