کراچی(ویب ڈیسک) مقامی مارکیٹ میں شہرہ آفاق فلم ’شعلے‘ کے مشہور کردار ’گبرسنگھ‘ کی انٹری سوشل میڈیا پر مقبول ہوگئی۔میگا اسٹار امیتابھ بچن، دھرمیندر، ہیما مالنی، جیا بچن، سنجیو کمار اور امجد خان کی فلم ’شعلے‘ 1975 میں ریلیز کی گئی تھی جس میں ہدایت کاری کے فرائض رمیش سپی نے سر انجام دیئے تھے۔ فلم کے کئی کردار اور ڈائیلاگز مشہور ہوئے ہیں جس میں سر فہرست امجد خان کا ’گبر سنگھ‘ کا کردار ہے جو کہ امر ہوگیا ہے۔ امجد خان بھی اس کردار سے اس قدر مشہور ہوئے ہیں کہ لوگ انہیں ا?ج بھی ’گبر سنگھ‘ کے نام سے جانتے ہیں لیکن اب ان سے بالکل مشابہت رکھنے والا ایک شخص سوشل میڈیا پر مقبول ہورہا ہے۔ کراچی کی حیدری مارکیٹ میں اہل خانہ کے ساتھ خریداری کرنے والے شخص کی تصاویر سامنے آئی ہیں جو بالکل فلم ’شعلے‘ کے کردار ’گبرسنگھ‘ سے مشابہت رکھتے ہیں۔سوشل میڈیا پر ’گبرسنگھ‘ سے مشابہت رکھنے والے شخص کی تصویر تیزی سے وائرل ہورہی ہے اور ٹوئٹر صارفین کی جانب سے طرح طرح کے تبصرے کیے جارہے ہیں۔یاد رہے کہ اداکار امجد خان قیام پاکستان سے قبل پشاور میں پیدا ہوئے تھے اور انہوں نے کئی بالی وڈ فلموں میں کام کیا جب کہ ان کا انتقال 1992 میں 51 سال کی عمر میں ممبئی میں ہوا۔
