جکارتہ(نیوزایجنسیاں) پاکستان کاایشین گیمز 2018ء میں ہاکی ایونٹ میں طلائی تمغہ جیتنے کاخواب بکھرگیا۔جاپان نے حیران کن طورپر 1-0سے فتح سمیٹ کر گیمزکی تاریخ میں پہلی بارفائنل کےلئے کوالیفائی کیا۔ملائیشیا نے دفاعی چمپئن بھارت کے ارمان بھی خاک میں ملا دئیے اورسنسنی خیزمقابلے کے بعد پینلٹی شوٹ آﺅٹ پر7-6سے فتح سمیٹ کر فائنل کےلئے کوالیفائی کیا۔جاپان کے فائنل کھیلنے کے باعث ملائیشیا کی ٹوکیواولمپکس 2020ءمیں براہ راست نشست بھی کنفرم ہوگئی۔میزبان ہونے کے ناطے جاپان پہلے ہی اولمپکس میں کھیلے گا۔پاکستان اور بھارت ایونٹ کی واحد دو ٹیمیں تھیں جو اب تک ناقابل شکست تھیں مگر دونوں ٹیمیں سیمی فائنل میں کامیابی حاصل نہ کرسکیں۔فائنل میں جاپان کا مقابلہ ملائیشیا جبکہ کانسی کے تمغے کے لیے پاکستان کا مقابلہ بھارت سے ہوگا۔جکارتہ کے گیلورابنگ کرنوہاکی فیلڈمیں کھیلے گئے سیمی فائنل میں ٹورنامنٹ میں اب تک شاندار کارکردگی دکھانے والی پاکستانی ٹیم نے سیمی فائنل میں مایوس کن کھیل پیش کیا۔پہلے کوارٹرمیں مقابلہ بغیرکسی گول کے برابررہا۔دوسرے کوارٹرکے دوسرے منٹ میں یاما ڈا شو ٹا نے گول داغ کر جاپان کو سبقت دلائی جو کھیل کے اختتام تک برقراررہی۔پاکستان نے جوابی گول کرنے کی بھرپور کوشش کی تاہم جاپانی دفاع نے اسے ایسا کرنے سے باز رکھا۔اس سے قبل پہلے سیمی فائنل میں بھارت اور ملائیشیا کی ٹیموں کے درمیان کانٹے دار مقابلہ ہوا اور اس کا فیصلہ پنلٹی شوٹس پر ہوا۔بھارتی ہاکی ٹیم ایونٹ میں اب تک ناقابل شکست تھی اور اس نے مجموعی طور پر حریف ٹیموں کے خلاف 70 سے بھی زائد گول اسکور کیے۔لیکن سیمی فائنل میں وہ اپنا کامیابی کا سلسلہ برقرار نہ رکھ سکی اور میچ ہار گئی۔میچ مقررہ وقت تک کھیل 2-2 سے برابر رہا جس کے بعد دونوں ٹیموں کو پنلٹی شوٹ آٹس ملیں جس میں ملائیشیا نے 7-6 سے فتح حاصل کرکے فائنل کیلئے کوالیفائی کر لیا۔
