امام الحق فیلڈنگ کوچ نے ٹیم جوائن کرلی

دبئی(آئی این پی )قومی ٹیم کے بلے باز امام الحق اور نئے فیلڈنگ کوچ گرانٹ بریڈ برنٹ نے ایشیا کپ کے لیے دبئی میں قومی ٹیم کو جوائن کرلیا۔امام الحق ویزے میں تاخیر کے باعث قومی ٹیم کے ہمراہ نہیں جاسکے تھے تاہم انہوں نے گزشتہ روز دبئی پہنچ کر ٹیم کو جوائن کرلیا۔دوسری جانب قومی کرکٹ ٹیم کے نئے فیلڈنگ کوچ گرانٹ بریڈ برنٹ بھی دبئی پہنچ گئے، انہیں پی سی بی نے حال ہی میں فیلڈنگ کوچ کے عہدے پر تعینات کیا ہے۔ایشیا کپ کے لیے پاکستان ٹیم نے گزشتہ روز سے تیاریوں کا آغاز کردیاہے اور 16ستمبر کو ہانگ کانگ کے خلاف میچ سے قبل بھرپور پریکٹس کی جائے گی۔ایونٹ کا سب سے بڑا ٹاکرا پاکستان اور بھارت کے درمیان 19 ستمبر کو ہوگا۔ پی سی بی ذرائع کے مطابق قومی کرکٹرز نے گزشتہ روزآرام کیا اور میگا ایونٹ کی تیاری کیلئے دبئی کے وقت کے مطابق آج شام چھ سے رات نو بجے تک آئی سی سی اکیڈمی میں ٹریننگ کریں گے جس کا سلسلہ آئندہ تین روز تک جاری رہے گا۔ ٹیم انتظامیہ کا 19 ستمبر کو بھارت کیخلاف میچ سے متعلق کہنا ہے کہ ویرات کوہلی کی عدم موجودگی اور انگلینڈ کے ہاتھوں شکست کے سبب پاکستان کا پلہ بھاری ہے۔ پاکستان، بھارت اور ہانگ کانگ کی ٹیم کو گروپ اے ، بنگلہ دیش، سری لنکا اور افغانستان کو گروپ بی میں رکھا گیا ہے ، ہر گروپ سے دو ٹیمیں سپر فور مرحلے کیلئے کوالیفائی کریں گی جہاں پر چاروں ٹیمیں آپس میں مدمقابل ہوں گی اور دو ٹاپ ٹیموں کے درمیان فائنل کھیلا جائے گا۔ پاکستان اور بھارت کے مابین 19ستمبر کو دبئی میں شیڈول ایشیا کپ کے میچ پر پاک بھارت سمیت پوری دنیا کے شائقین کرکٹ کی نظریں لگی ہوئی ہیں اور شائقین کی بہت بڑی تعداد یا تو گراو¿نڈ میں جاکر یا پھر ٹی وی پر دونوں روایتی حریفوں کے مابین ہونے والے میچ کو دیکھنے کیلئے بے تابی سے انتظار کررہی ہے۔