ہاکی کوچ حسن سردار کی منصب سنبھالتے ہی فنڈز کی فریاد

لاہور(آئی این پی)رولینٹ اوٹیمن کی جگہ قومی ہاکی ٹیم کے ہیڈ کوچ بنائے جانے والے اولمپیئن حسن سردار نے ذمہ داریاں سنبھال لی ہیں۔ قومی ہاکی ٹیم کے ہیڈ کوچ رولینٹ اوٹیمن کے عہدے سے مستعفی ہونے کے بعد لیجنڈ سابق کپتان حسن سردار کو قومی ٹیم کا ہیڈ کوچ مقرر کیا گیا تھا، حسن سردار نے اپنے عہدے کی ذمہ داریاں سنبھال لی ہیں اور انہوں نے وزیر اعظم عمران خان سے فنڈز کی فراہمی کی اپیل بھی کردی ہے۔قومی ہاکی ٹیم کے ہیڈ کوچ حسن سردار کا کہنا ہے کہ ہاکی فیڈریشن کو شدید مالی مشکلات کا سامنا ہے جس کے باعث بہت سے مسائل پیدا ہوگئے ہیں اورکھلاڑی بھی پریشان ہیں، جب کہ بھارت میں ہونے والا ورلڈ کپ بھی سر پر ہے یہ ملک کی عزت کا سوال ہے، فنڈز کے بغیر ورلڈ کپ کی تیاری اچھی نہیں ہو سکتی، اس لئے حکومت جتنی جلدی گرانٹ جاری کرے گی قومی کھیل کو اتنا ہی فائدہ ہوگا۔حسن سردار کا کہنا تھا کہ غیر ملکی کوچز اب ساتھ نہیں رہے، اب ہم ریحان اور ثقلین کے ساتھ مل کر ٹیم کو تیار کریں گے۔ ایشین ہاکی چیمپئینز ٹرافی سے قبل پینلٹی کارنر اور دفاع کے شعبے کو بہتر بنانا ہدف ہے۔ ایشین گیمز میں گولڈ میڈل لینا چاہیے تھا لیکن اچھے نتائج نہیں آئے۔ اب ہمارا ٹارگٹ ورلڈ کپ میں اچھے نتائج دینا ہے۔راشد محمود، شفقت رسول اور کپتان رضوان کے کیمپ میں رپورٹ نہ کرنے پر چیف کوچ نے واضح کیا کہ لیگ کھیلنے والے تین کھلاڑیوں کو براہ راست ٹیم میں منتخب کرنے میں کوئی حرج نہیں، وہ ہالینڈ میں لیگ میچز کھیل کر اپنی پرفارمنس کو بہتر کررہے ہیں۔ اگر ان میں سے جلد کوئی فری ہوگیا تو کیمپ میں آجائے گا، ہمیں ان کے باہر کھیلنے پر کوئی اعتراض نہیں۔