میڈرڈ (اے پی پی) سپین کے بین الاقوامی شہرت یافتہ ٹینس سٹار اور عالمی نمبر دو رافیل نڈال فٹنس مسائل کے باعث اے ٹی پی فائنلز ٹینس ٹورنامنٹ سے باہر ہو گئے۔ ان کے دستبردار ہونے کی وجہ سے اب امریکی کھلاڑی جان اسنر ایونٹ میں ایکشن میں دکھائی دیں گے۔ عالمی نمبر دو رافیل نڈال گزشتہ ماہ پیرس ماسٹرز ٹینس ٹورنامنٹ کے دوران ٹخنے کی انجری کا شکار ہوکر ایونٹ سے دستبردار ہوگئے تھے جس کا فائدہ نوویک جوکووچ کو ہوا اور انہوں نے عالمی رینکنگ میں پھر پہلی پوزیشن حاصل کرلی۔ رافیل نڈال نے اپنے بیان میں کہا کہ اے ٹی پی فائنلز سے دستبرداری کے فیصلے پر مایوسی ہو رہی ہے لیکن اب سو فیصد فٹنس حاصل کرنے کے بعد دوبارہ کورٹ کا رخ کروں گا اور وہ اس دوران ٹخنے کی سرجری بھی کروا لیں گے۔ 17 گرینڈ سلام کے فاتح ہسپانوی سٹار نے کہا کہ وہ بہت جلد فٹنس مسائل سے چھٹکار حاصل کرنے کے بعد ٹینس کورٹس میں ایکشن میں نظر آئینگے۔ واضح رہے کہ اے ٹی پی فائنلز ٹینس ٹورنامنٹ 11 نومبر سے انگلینڈ کے درالحکومت لندن میں شروع ہوگا۔
