کیپ ٹاﺅن (ویب ڈیسک) سرفراز احمد کی معطلی کے بعد قومی ٹیم کی قیادت کرنے والے شعیب ملک نے ساتھی کرکٹرز کے ساتھ اپنی 37ویں سالگرہ منائی۔پاکستان کرکٹ بورڈ کے آفیشل پیچ کی جانب سے سماجی رابطے کی ویب سائٹ ٹوئٹر پر ویڈیو جاری کی گئی جس میں قومی ٹیم کے موجودہ کپتان کو ساتھی کھلاڑیوں کے ساتھ کیک کاٹتے ہوئے دیکھا جاسکتا ہے۔کیپ ٹاﺅن میں جنوبی افریقہ کے خلاف پہلے ٹی ٹوئنٹی میں شکست کے بعد ہوٹل پہنچ کرشعیب ملک نے سالگرہ کا کیک کاٹا، ٹیم کے ارکان نے ہیپی برتھ ڈے گنگنانے کے ساتھ تالیاں بجائیں اور شعیب کے لیے نیک خواہشات کا اظہار کیا۔اس موقع پر شعیب ملک نے ٹیم کے ارکان کا شکریہ اداکرتے ہوئے دعاﺅں میں یاد رکھنے کی درخواست کی۔یکم فروری کو سیالکوٹ میں پیدا ہونے والے شعیب ملک اب تک 35 ٹیسٹ، 279 ون ڈے اور 109 ٹی ٹوئنٹی میں ملک کی نمائندگی کا اعزاز رکھتے ہیں۔
