حکومت لاک ڈاﺅن پر سختی سے عملدرآمد کرائے،پی ایم اے

لاہور (جنرل رپورٹر )صدر پی ایم اے لاہورپروفیسر اشرف نظامی،سابقہ صدر پی ایم اے پنجاب ڈاکٹر اظہار احمد چوہدری،پروفیسر شاہد ملک، پروفیسر افضل فاروق ،ڈاکٹر واجد علی،ڈاکٹر طارق محمود میاں،ڈاکٹر احمد نعیم، ڈاکٹر سعید احمد،ڈاکٹر سلمان کاظمی اور ڈاکٹر طلحہ شیروانی نے پریس کانفرنس کرتے ہوئے کہا کہ دنیا بھر میں کورونا کی تباہی اور ترقی یافتہ امیر ترین ممالک کی بے بسی نے اس بیماری سے لڑنے کا ایک ہی راستہ سمجھایا ہے کہ” آئسولیشن، آئسولیشن اور صرف آئسولیشن”۔ حکومت وقت کی طرف سے لاک ڈاو¿ن کے حوالے سے کچھ نرمی کے تاثر نے گزشتہ کچھ دنوں سے شہروں اور بازاروں میں بے ہنگم رش اور حکومتی قواعدو ضوبط کی کھلم کھلا خلاف ورزی پر ہمیں بہت تشویش ہے اور ہمیں ڈر ہے کہ ماہ رمضان میں تراویح اور باجماعت نماز کی ادائیگی کی اجازت ایک بہت بڑی مصیبت کو دعوت دینے کے مترادف ہے۔میڈیکل پروفیشن اس خطرے کو شدت سے محسوس کر تے ہوئے حکومت وقت کو خبردار کرنا چاہتا ہے کہ وہ حالات کی سنگینی کو سمجھتے ہوئے فوری طور پر لاک ڈاو¿ن پر سختی سے عملدرآمد کرائے۔ عوام کی موجودہ روش کو دیکھتے ہوئے فوری طور پر مساجد میں باجماعت تراویح اور نماز کی ادائیگی کی اجازت پر نظر ثانی کرے۔ ہم علماءکرام اور اکابرین دین سے بھی دست بدستہ درخواست کرتے ہیں کہ کہ وہ حالات کی سنگینی کے پیش نظر اپنا قومی فریضہ پورا کریں ۔ مساجد میں کسی بھی قسم کے اجتماع سے گریز کریں۔ یہ انسانی زندگی کا معاملہ ہے اور میڈیکل پروفیشن اُن سے قوم کی خاطر اپیل کر رہا ہے ۔ ہمیں امید ہے کہ وہ اس پر ضرور غور کر کے مثبت فیصلہ کریں گے۔ اس سے اُن کی عزت اور تکریم میں مزید اضافہ ہو گا۔ ہماری خواہش ہے کہ ہم احتیاط کریں اور اللہ سے التجا ہے کہ وہ پاکستان پر رحم فرمائے، ہماری خطاو¿ں کو معاف کرے اور ہم بحثییت قوم بہترین اجتماعی فیصلوں سے اپنے لوگوں کو اس بیماری سے محفوظ رکھ سکیں۔