اسلام آباد(نامہ نگار خصوصی ) ڈاکٹر فردوس عاشق اعوان کی جگہ عاصم سلیم باجوہ کو معاون خصوصی برائے اطلاعات مقر ر کردیا گیا ہے جبکہ سینیٹر شبلی فراز کو وفاقی وزیر اطلاعات بنا دیا گیا ہے ۔ فردوس عاشق اعوان کو معاون خصوصی برائے اطلاعات کے عہدے سے ہٹاکر عاصم سلیم باجوہ کو معاون خصوصی برائے اطلاعات مقرر کردیا گیا ہے۔کابینہ ڈویژن سے جاری نوٹیفکیشن کے مطابق عاصم سلیم باوجوہ کو اعزازی طور پر وزیر اعظم کا معاون خصوصی مقرر کیا گیا ہے جبکہ سینیٹر شبلی فراز کو وفاقی وزیر اطلاعات مقرر کردیا گیا ہے۔ سینیٹر شبلی فراز کو وفاقی وزیر برائے اطلاعات و نشریات بنا ئے جانے کے بعد قائد ایوان سینٹ آج (منگل کو ) وفاقی وزیر کا حلف اٹھائیں گے۔صدر مملکت عارف علوی شبلی فراز سے وفاقی وزیر کا حلف لیں گے۔حلف برداری کی تقریب ایوان صدر میں منعقد ہوگی ۔وفاقی وزراء اور دیگر اعلیٰ حکام تقریب میں شرکت کریں گے۔حلف اٹھانے کے بعد کابینہ ڈویژن باضابطہ نوٹیفیکیشن جاری کرے گا۔شبلی فراز کی بطور وفاقی وزیرِ اطلاعات تعیناتی کا فیصلہ وزیراعظم نے کیا۔واضح رہے کہ لیفٹیننٹ جنرل(ر) عاصم سلیم باجوہ سی پیک اتھارٹی کے چیئرمین کے طور پر فرائض انجام دے رہے ہیں، اس کے علاوہ عاصم سلیم باجوہ سابق ترجمان پاک فوج اور کمانڈر سدرن کمانڈ کے طور پر بھی فرائض انجام دے چکے ہیں۔
لاہور (تجزیہ نگار) وزارت اطلاعات میں اہم تبدیلیوں کے بعد اگلے دس دن کے اندر مزید وزارتوں میں تبدیلیوں کا امکان ہے۔ متعدد وزیروں کے محکمے تبدیل بھی ہو سکتے ہیں اور اس بات کا بھی امکان ہے کہ چند وزیروں کو دوبارہ کابینہ میں شامل نہ کیا جائے۔ ذرائع نے بتایا ہے کہ پی ٹی آئی میں دیگر جماعتوں سے آنے والوں کو وزارتوں سے محروم کیا جا سکتا ہے کیونکہ ایسے وزیروں پر جو پی ٹی آئی کے نہیں تھے پی ٹی آئی کے حلقے انتہائی ناخوش تھے مسلسل دباﺅ کی وجہ سے وزیراعظم عمران خان نے دیگر پارٹیوں سے پی ٹی آئی میں آنے والوں سے وزارتیں واپس لینے کا فیصلہ کیا اور اس حوالے سے سب سے پہلے فردوس عاشق اعوان سے عہدہ واپس لے لیا گیا اور پی ٹی آئی کے پرانے رہنما شبلی فراز کو وزارت اطلاعات کا قلمدان سونپ دیا گیا۔
