اقتصادی رابطہ کمیٹی، بیروزگاروں کو 12ہزار دینے،تاجروں کے 3ماہ کے بجلی بل معا ف کرنے کا فیصلہ

اسلام آباد (این این آئی) وفاقی وزیر صنعت و پیداوار حماد اظہر نے کہا ہے کہ صنعت ،کاروبار اور ملازمتوں سے متعلق ای سی سی نے دو پیکیج منظورکیے ہیں جو(آج) پیر کو وفاقی کابینہ میں منظوری کیلئے پیش کیے جائیں گے ،چھوٹے کاروبار والوں کے 3 ماہ بجلی کا بل حکومت اداکرےگی، اس طرح 80 فی صد صنعتیں بجلی بل ادائیگی کے سلسلے میں مستفید ہوں گی،کرونا وباءکے باعث بے روزگار ہونے والوں کےلئے 75 ارب روپے کا پیکیج منظور کیا گیا ہے ،ملازمت کھو دینے والے افراد کو 12 ہزار روپے فراہم کریں گے ،متاثرہ لوگ خودکو پورٹل پر رجسٹرڈ کرائیں،منظور کئے گئے پیکیج کااطلاق گلگت بلتستان اور آزاد کشمیرپر بھی ہوگا۔ کابینہ کی اقتصادی رابطہ کمیٹی نے کرونا وباءکے باعث چھوٹے اور درمیانے درجے کے اداروں کے 3 ماہ کے بجلی بل ادائیگی دیدی ،تنخواہ کیلئے نجی اداروں کو قرض کی عدم ادائیگی پر نقصانات میں 30 فیصد نقصان حکومت برداشت کرےگی ،پاک ایران بارڈر پر باڑ لگانے کیلئے تین ارب روپے کی ضمنی گرانٹ بھی منظور کرلی گئی ۔ پیر کو کابینہ کی اقتصادی رابطہ کمیٹی اجلاس مشیر خزانہ ڈاکٹر عبدالحفیظ شیخ کی زیر صدارت اسلام آباد میں ہوا ۔اجلاس میں چھوٹے اور درمیانے درجے کے اداروں کے 3 ماہ کے بجلی بل ادائیگی کیلئے 50 ارب 69 کروڑ روپے مختص کرنے کی منظوری دیدی ۔چھوٹا کاروبار اور صنعتی امداد پیکیج کے تک 95 فیصد کمرشل صارفین کو بجلی بل ادائیگی میں ریلیف فراہم کیا جائےگا، پانچ کلو واٹ سے 70 کلو واٹ لوڈ استعمال کرنے والے 72 فیصد صنعتی صارفین کو امداد فراہم کی جائےگی، اسکیم کے تحت کمرشل صارفین کو ایک لاکھ اور صنعتی صارفین کو ساڑھے چار لاکھ روپے تین ماہ کیلئے امداد فراہم کی جائےگی ۔گلگت بلتستان اور آزاد کشمیر میں اسکیم کیلئے ڈھائی ارب روپے مختص کرنے کی منظوری کمیٹی نے زرعی شعبے زرعی ٹیوب ویلوں ٹرانسپورٹرز اور مائیکرو فنانس سیکٹر کیلئے اس طرح کی اسکیم تیار کرنے کی ہدایت کر دی۔کمیٹی نے اسٹیٹ بینک کو کاروباری شعبہ کو ملازمین کو تنخواہ کی ادائیگی کی اسکیم میں کسی مسائل کے باعث قرض ادائیگی میں مشکلات آئیں تو حکومت کو اصل رقم کا تیس فیصد تک نقصان برداشت کرنا ہو گا ،کمیٹی نے اقتصادی امور ڈویڑن کو جی ٹونٹی کی طرف سے قرضوں کی ادائیگی میں ری شیڈولنگ کیلئے مذاکرات کی اجازت دی تاہم ای اے ڈی کو معائدہ کرنے سے پہلے کمیٹی سے پیشگی منظوری حاصل کرنا ہو گی ،کمیٹی نے پاک ایران بارڈر پر باڑ کی تعمیر کیلئے تین ارب روپے کی اضافی ضمنی گرانٹ جاری کرنے کی منظوری دے دی۔وفاقی حکومت نے کرونا وائرس کے باعث نافذ لاک ڈاون سے متاثر ہونے والے چھوٹے تاجروں کے لیے 50 ارب روپے کے وزیراعظم چھوٹا کاروبار امدادی پیکج جبکہ ملازمت سے نکالے جانے والے افراد اور دیہاڑی دار مزدوروں کے لیے 75 ارب روپے کے پیکج کا اعلان کردیا۔وفاقی کابینہ سے منظوری کیلئے پیکج (آج) منگل کو پیش کیا جائےگا،کابینہ سے منظوری کے بعد پیکج کی تفصیلات ویب سائٹ پر ڈال دی جائیں گی۔ پیر کو مشیرخزانہ عبدالحفیظ شیخ کی زیرصدارت اقتصادی رابطہ کمیٹی کا اجلاس ہوا جس میں وزیراعظم چھوٹا کاروبار امدادی پیکیج کی منظوری دی گئی۔ بعد میں پریس کانفرنس کرتے ہوئے وفاقی وزیر صنعت حماد اظہر نے کہا کہ اقتصادی رابطہ کمیٹی(ای سی سی) نے ایک اور اہم پیکج کی منظوری دی ہے جس سے پورے پاکستان میں 35 لاکھ کاروبار مستفید ہوں گے، اس پروگرام کا نام وزیراعظم کا چھوٹا کاروبار امدادی پیکج ہے۔وفاقی وزیر نے کہا کہ مذکورہ پیکج کا بنیادی نکتہ یہ ہے کہ ہم چاہتے ہیں کہ چھوٹے تاجر جب بھی اپنے کاروبار کا بنیادی سلسلہ شروع کریں تو ان کے اگلے 3 ماہ کا بل حکومت پاکستان ادا کرے گی۔اپنی بات جاری رکھتے ہوئے حماد اظہر نے کہا کہ اس پروگرام کو ایسے نافذ العمل لائیں کہ جتنے لوگوں اور کمپنیوں کا 5 کلو واٹ تک کا کمرشل کنیکشن جو پورے پاکستان کے کمرشل کنیکشنز کا 95 فیصد بنتی ہیں اور 70 کلو واٹ صنعتی کنیکشن رکھنے والے جو تمام انڈسٹریل کنیکشنز کا 80 فیصد بنتا ہے وہ اس پالیسی سے مستفید ہوں گے۔ان کا کہنا تھا کہ بجلی کے بل کا تخمینہ گزشتہ برس مئی، جون اور جولائی کے مہینے میں بجلی کے بل کا مجموعی حجم ملا کر اتنی رقم بل میں شامل کردی جائے گی تاکہ بجلی استعمال ہونے پر بل ادا نہ کرنا پڑے۔وفاقی وزیر صنعت نے کہا یہ رقم صرف 3 ماہ کے لیے قابل قبول نہیں ہوگی جو 6 ماہ تک بل میں شامل رہے گی تاکہ جب بھی کاروبار کا سلسلہ شروع ہو یہ رقم استعمال میں لائی جاسکے۔اپنی بات جاری رکھتے ہوئے انہوں نے کہا کہ اعداد و شمار کے مطابق تقریبا 32 لاکھ کمرشل کنیکشنز اور ساڑھے 3 سے 4 لاکھ چھوٹے تاجر اس پیکج سے مستفید ہوسکیں گے۔وزیر صنعت نے کہا کہ اس پیکج کا حجم 50 ارب ہے جو آزاد کشمیر اور گلگت بلتستان میں بھی لاگو ہے، اس پیکج سے کراچی کی صنعتیں بھی مستفید ہوسکیں گی۔انہوں نے کہا کہ ہمارا مقصد ہے کہ ان بندشوں کی وجہ سے چھوٹے کاروباروں کی صلاحیت متاثر ہوئی ہے، اس اسکیم کے ذریعے چھوٹی دکانیں، کمرشل کنیکشن کی مارکیٹیں اور چھوٹی صنعتیں مستفید ہوں گی۔اپنی بات جاری رکھتے ہوئے حماد اظہر نے کہا کہ ہمارا مقصد یہی ہے کہ کاروبار اور صنعت میں جو سب سے چھوٹا اور پسماندہ طبقہ ہے جس کی تعداد 35 لاکھ ہم سب سے پہلے اس کی مدد کرنا چاہتے ہیں۔وفاقی وزیر صنعت نے کہا کہ مزدور کے احساس اور وزیراعظم کا چھوٹا کاروبار امدادی پیکج نافذالعمل ہونے کے بعد چھوٹے کاروباری افراد کو بلاضمانت قرض دینے کی اسکیم لائی جائے گی۔انہوں نے کہا کہ وہ افراد جو کرونا وائرس کی وجہ سے ملازمت سے محروم ہوگئے ہیں، دیہاڑی دار مزدور جن کی آمدن ختم ہوگئی اور وہ مزدور جو اب اپنی مزدوری پر نہیں جاسکتے ان کے لیے 75 ارب روپے مختص کیے گئے ہیں۔اپنی بات جاری رکھتے ہوئے وفاقی وزیر نے کہا کہ وزیراعظم کی ہدایت کے مطابق، وزارت صنعت و پیداوار اور احساس پروگرام مل کر ایک پورٹل قائم کریں گے جس میں تمام مذکورہ افراد رجسٹر کرسکیں گے۔وفاقی وزیر نے کہا کہ اس پورٹل پر بذریعہ اسمارٹ فون اور انٹرنیٹ رجسٹریشن کرسکیں گے جن افراد کے پاس یہ سہولت موجود نہیں کہ وہ کسی بھی شخص کے موبائل کے ذریعے پورٹل پر اپنے قواعد و ضوابط شامل کرکے رجسٹر ہوسکیں گے۔ان کا کہنا تھا کہ ڈیٹا موصول ہونے کے بعد یہ 12 ہزار روپے 40 سے 60 لاکھ افراد میں تقسیم کرسکیں گے، حکومت کا یہ پروگرام احساس پروگرام سے الگ ہے اور یہ 60 لاکھ افراد احساس پروگرام کے ایک کروڑ 20 لاکھ سے اضافی ہوں گے۔وفاقی وزیر صنعت نے کہا کہ نوکری سے نکالے گئے افراد رجسٹر ہونے کے بعد اس پیکج سے مستفید ہوسکیں گے،ہماری تمام تر توجہ کرونا سے نمٹنے پر مرکوز ہے۔ انہوں نے کہا کہ پیکج کی تفصیلات وزرات صنعت و پیداوار اور احساس پروگرام کی ویب سائٹ پر ڈالی جائیں گی، پیکج کے تحت بے روزگار ہونے والوں کو فی کس 12 ہزار روپے دیے جائیں گے جبکہ دوسرے پیکج کے تحت چھوٹےکاروبار والوں کے 3 ماہ کا بل حکومت اداکرے گی اس طرح 80 فی صد صنعتیں بل ادائیگی کے سلسلے میں مستفید ہوں گی۔حماد اظہر نے مزید کہا کہ پاکستان میں 6کروڑ گھرانے ہیں اور ہم ایک کروڑ 70 لاکھ گھرانوں تک امداد پہنچائیں گے۔