لاہور (لیڈی رپورٹر) صوبائی وزیر اطلاعات فیاض الحسن چوہان نے نیب میں شہباز شریف کی حاضری سے استثنیٰ کی درخواست پراپنے خیالات کا اظہار کرتے ہوئے کہا ہے کہ شہباز شریف لندن سے پاکستانی عوام کے شانہ بشانہ کرونا کے خلاف جنگ لڑنے کی بڑھکیں مار کر پاکستان آئے تھے اب شہباز شریف کہتے ہیں میں انہتر سالہ کینسر کا مریض ہوں اور مجھے کرونا ہونے کا خدشہ ہے۔ فیاض الحسن چوہان نے کہا کہ شہباز شریف جب سے ملک واپس آئے ہیں کرونا کے نام پر ڈرامے بازی کر رہے ہیں۔ کبھی وہ لیپ ٹاپ لیڈر بن جاتے ہیں اور کبھی ڈاکٹروں اور صحافیوں کو ایک صابن، ایک ہینڈ سینیٹائزر اور ماسک کی شکل میں مضحکہ خیز حفاظتی کٹس دے رہے ہوتے ہیں۔ فیاض الحسن چوہان نے مزید کہا کہ ریاستی اداروں کی جانب سے تحقیقات پر احتساب سے بچنے کے لیے شہباز شریف کرونا وائرس کا بہانہ کر کے پتلی گلی سے بھاگ رہے ہیں۔ انہوں نے کہا کہ ریاستی ادارے شہباز شریف کی منی لانڈرنگ، اقربا پروری اور ٹی ٹی پر مبنی ڈاکوں کا حساب کتاب مانگ رہے ہیں اور شہباز شریف کو اپنی کرپشن اور بددیانتی کا ہر حال میں حساب دینا ہو گا۔

لاہور(مانیٹرنگ ڈیسک) عالم دین علامہ آغا حسین نجفی نے کہا ہے کہ اس وقت لوگوں کی صحت اور زندگیوں کا معاملہ ہے زندگی بچانے کے لئے مساجد میں نمازیوں کے درمیان چھ فٹ کا فاصلہ ہونا چاہئے اگر ایسا ممکن نہیں تو اکیلے نماز پڑھنے میں بھی کوئی حرج نہیں۔ چینل فائیو کی کورونا اسپیشل ٹرانسمیشن میں گفتگو کرتے ہوئے انہوں نے کہا کہ سماجی فاصلہ زیادہ ہونے سے بیماری کا پھیلاﺅ کم ہو گا عوام حکومتی احکامات پر عمل کریں کسی کی وجہ سے اگر بیماری پھیلتی ہے تو وہ انسانی جانوں کے ضیاع کا ذمہ داری ہے۔ اعتکاف مسجد جامع میں ہوتا ہے اگر احتیاطی تدابیر پر عمل ممکن ہے تو مسجد میں ہو سکتا ہے لیکن گھروں میں اعتکاف میں نہیں ہو سکتا۔رمضان صبر صدقہ و خیرات کا مہینہ ہے روزہ جسم کی زکوة ہے۔ سب کو اللہ سے رجوع کرتے ہوئے اپنے گناہوں کی معافی مانگنی چاہئے۔ مسلمان سفید پوش طبقے اور غرباءکی مدد کریں۔ اداکارہ عدنان شاہ ٹیپو نے بتایا کہ پوری دنیا میں کرونا سے پونے دو لاکھ لوگ مر گئے ہیں اور پچیس لاکھ افراد کرونا سے متاثر ہیں۔تمام لو گ احتیاط کریں وٹامن سی کا استعمال کریں۔صفائی کا خاص خیال رکھیں ماسک اور سینیٹائزر لازمی استعمال کریں۔ صاحب حیثیت لوگ اپنے غریب رشتہ داروں، پڑوسیوں اور محلے داروں کی مدد کریں۔یہ حالت جنگ ہے سب مل کر کرونا سے لڑیں اسے شکست دیں۔ خوش قسمتی سے پاکستان میں کرونا ویسے نہیں پھیلا جیسے پوری دنیا میں پھیلا۔منافع خور اللہ سے ڈریں۔ فیشن ڈیزائنر بی جی نے بتایا کہ صورتحال کافی تشویشناک ہے سفید پوش طبقہ تو پس گیا ہے ایک تو وباءپھر غربت اور بھوک ،لوگوں کے لئے زندگی گزارنا مشکل ہو گیا ہے ۔لاہوریوں کا دل بہت بڑا ہے یہ دل کھول کر لوگوں کی مدد کرتے ہیں ان حالات میں سب ایک دوسرے کی مدد کریں ساری ذمہ داری حکومت نہیں اٹھا سکتی۔لوگ بلا ضرورت باہر نہیں نکلتے ضرورت کے تحت نکلتے ہیں۔حکومتی ٹائیگر فورس کا کوئی فائدہ نہیں حکومت کام نہیں کر رہی۔ مذہبی سکالر علامہ حسین اکبر نے بتایا کہ ایسی وبائیں ماضی میں انسانی تاریخ میں آتی رہی ہیں۔نبی کریم نے فرمایا روزہ رکھواور صحت یاب ہو جاﺅ اور بیمایوں اور گناہوں سے بچ جاﺅ۔ اسلام میںعبادات اجتماعی بھی ہیں اور انفرادی بھی، مسلمان پاک اور صاف جگہ کہیں بھی عبادت کر سکتے ہیں۔احتیاط ضروری ہے کیونکہ کرونا وبائی مرض ہے ۔لوگ لاک ڈاﺅن کی پابندی کریں۔شیعہ حضرات کو امام بارگاہوں میں مجالس کی اجازت ہونی چاہئے۔ اللہ گناہ تو معاف کر دیتا ہے لیکن کسی کے حقوق معاف نہیں ہوتے۔ سماجی کارکن یوسف صلاح الدین نے بتایا کہ س وقت پوری انسانیت موذی وبا سے لڑرہی ہے کوئی بھی ملک اکیلا اسے شکست نہیں دے سکتا عوامی تعاون بہت ضروری ہے۔خود بھی بچیں دوسروں کو بھی بچائیں حکومتی ہدایات پر عمل کریں۔سماجی فاصلوں سے فائدہ ہو رہا ہے۔لوگ گھروں سے بلاوجہ باہر مت نکلیں کرونا وائرس کو سنجیدہ لیں قوم کو یکجا ہونا چاہئے۔حکومت کی طرف سے بہت سے لوگوں کو پیسے مل چکے ہیں۔ ہاکی پلیئراظفر یعقوب نے بتایا کہ پوری دنیا میں کرونا پھیلا ہے احتیاط کریں اور اللہ کو یاد کریں اسی میں سب کی بھلائی ہے۔اپنا مدافعتی نظام بہتر بنائیں متوازن غذا استعمال کریں۔ایسے لوگوں کی مدد کی جائے جن کے گھر چولہا نہیں جل رہا اس کا اجر اللہ دے گا۔

لاہور (لیڈی رپورٹر) عدنان شاہد فاﺅنڈیشن کے زیراہتمام خبریں و چینل ۵ کے رضاکاروں کی جانب سے لاہور میں 14 ویں روز بھی دیہاڑی دار اور مزدور طبقہ میں مختلف مقامات پر مفت کھانا تقسیم کیا گیا۔اینکر پرسن اور سینئر صحافی مبشر لقمان نے خبریں کو خراج تحسین پیش کرتے ہوئے کہا کہ خبریں اور چینل۵ نے مختلف شہروں میں غریب اور مستحق افراد کو مفت کھانا تقسیم کرنا شروع کیا ہے جو قابل تعریف کام ہے۔ ضیاشاہد صاحب ہمارے قابل احترام اور ہمارے سینئر ہیں اور امتنان شاہد صاحب میرے بھائی ہیں۔لیکن آج مجھے خوشی اس بات کی ہے کہ میرا مرحوم دوست اور پیارا بھائی عدنان شاہد اللہ تعالیٰ اس کے درجات بلند فرمائے اس کے زیرسایہ خبریں چینل ۵ یہ سب کچھ کررہا ہے۔ اس کا صلہ اللہ تعالیٰ کی ذات دے گی۔ باقی میڈیا ہاﺅسز کو بھی چاہئے کہ وہ خبریں جیسا اقدام کرے۔ ان کی تقلید کرے۔ صدر آزادکشمیر سردار مسعود نے کہا کہ میں چیف ایڈیٹر محترم ضیاشاہدصاحب اور ان کے صاحبزادے امتنان شاہد صاحب کو مبارکباد پیش کرتا ہوں۔ اس جبکہ ہم کرونا کی وباءکے باعث مشکل میں ہیں ایسے وقت میں انہوں نے غریب اور مستحق لوگوں کو کھانا تقسیم کرکے ایک بڑا نیکی کا کام کیا ہے۔ باقی لوگوں کو بھی چاہئے کہ نیکی کے ایسے کاموں میں بڑھ چڑھ کر حصہ لیں اور لوگوں کی مدد کریں۔ہیڈ کوچ پاکستان ہاکی ٹیم خواجہ جنید نے کہا کہ خبریں گروپ کی پوری ٹیم جو اس لاک ڈاﺅن میں غریبوں اور مستحق افراد میں راشن تقسیم کررہی ہے میں ان سب کو سلام پیش کرتا ہوں۔ فیشن ڈیزائنر بی جی نے کہا ضیاشاہد صاحب کو اور امتنان شاہد صاحب کو خبریں رضاکار کے حوالے سے مبارکباد پیش کرتی ہوں اور ان سے درخواست کرتی ہوں کہ میرے درزیوں کیلئے بھی راشن بھجوائیں۔ آپ اس وقت ایک اچھا کام کررہے ہیں میں آپ کے ساتھ ہوں اچھا کام کرنے سے ملک کی عزت میں اضافہ ہوتا ہے۔ اداکارہ زارا شیخ نے کہا کہ میں خبریں گروپ کے اس اقدام کو سراہتی ہوں۔ خبریں سے میرا پرانا تعلق ہے اور جب بھی کوئی ایسی مشکل پڑی ہے خبریں نے بڑھ چڑھ کر حصہ لیا ہے اور خبریں رضاکار زندہ باد۔

لاہور (خصوصی رپورٹر) وزیراعلیٰ پنجاب سردار عثما ن بزدار نے دیپالپور، چشتیاں اور ساہیوال کے طوفانی دورے کئے۔ وزیراعلیٰ عثمان بزدار نے تینوں شہروں کے ہسپتالوں میں کورونا سے متاثرہ مریضوں کے علاج معالجے کے انتظامات اور آئسولیشن وارڈز میں طبی سہولتوں کی فراہمی کا جائزہ لیا۔ وزیراعلیٰ عثمان بزدار نے گندم خریداری مراکز کے بھی دورے کئے اور کاشتکاروں کی سہولت کیلئے مراکز پر کئے جانے والے انتظامات کا مشاہدہ کیا۔ وزیراعلیٰ عثمان بزدار کی زیرصدارت دیپالپور، چشتیاں اور ساہیوال میں اعلیٰ سطح کے اجلاس منعقد ہوئے جن میں کورونا وائرس کی روک تھام کیلئے کئے جانے والے اقدامات، گندم خریداری مہم اور انسداد ڈینگی کے انتظامات کا جائزہ لیا گیا۔ وزیراعلیٰ عثمان بزدار نے دیپالپور میں تحصیل ہیڈ کوارٹر ہسپتال کا دورہ کیا اور ہسپتال میں مردوں اور خواتین کیلئے بنائے گئے آئسولیشن وارڈز کا معائنہ کیا۔ وزیراعلیٰ عثمان بزدار نے ہسپتال میں ڈائلسیز سینٹر بھی دیکھا اور ڈائلسیز سینٹر میں گردوں کے امراض میں مبتلا مریضوں کیلئے طبی سہولتوں کا مشاہدہ کیا۔ وزیراعلیٰ عثمان بزدار نے اس موقع پر گفتگو کرتے ہوئے کہا کہ کورونا سے نمٹنے کیلئے ہرممکن وسائل بروئے کار لائے جا رہے ہیں۔منتخب نمائندے انتظامیہ اور پولیس متحرک انداز میں اپنے فرائض جاری رکھے ہوئے ہیں۔موجودہ حالات میں ذمہ داری بڑھ گئی ہے، فرائض کو عبادت سمجھ کر سرانجام دینا ہوگا۔ دکھی انسانیت میں ہمہ وقت مصروف ڈاکٹرز، نرسز اور پیرا میڈیکل سٹاف کی خدمات لائق تحسین ہیں۔ حفاظتی اقدامات عوام کے تحفظ کیلئے اٹھائے گئے ہیں اور عوام اپنی اور اپنے پیاروں کی زندگیوں کو محفوظ بنانے کیلئے حکومتی اقدامات کی پابندی کریں۔آزمائش عارضی ہے،انشاءاللہ سرخرو ہوں گے۔ آزمائش کی گھڑی میں عوام کو کسی صورت حالات کے رحم و کرم پر نہیں چھوڑیں گے۔ وزیراعلیٰ عثمان بزدار نے دیپالپور میں گندم خریداری مرکز کا بھی معائنہ کیا ۔ وزیراعلیٰ عثمان بزدارسے سینٹر پر موجود کاشتکاروں نے گفتگو کرتے ہوئے کہا کہ آپ کی حکومت نے ہماری سہولت کیلئے بہترین انتظامات کئے ہیں۔ کاشتکاروں کیلئے گندم خریداری مرکز پر ایسے شاندار انتظامات کبھی نہیں دیکھے۔سینٹر پر کسان سہولت کے ساتھ اپنی گندم فروخت کر رہے ہیں۔ وزیراعلیٰ عثمان بزدار نے اس موقع پر کہا کہ کاشتکاروں کے مفادات کا تحفظ ہر صورت کیا جائے گا۔خریداری گندم مہم میں گرداوری کی شرط ختم کر دی گئی ہے۔ وزیراعلیٰ عثمان بزدار نے کہا کہ گندم خریداری مراکز پر ناپ تول میں کمی سمیت کسی قسم کی شکایت پیدا نہیں ہونی چاہیئے۔جہاں سے بھی کوئی شکایت آئی، سخت ایکشن لیا جائے گا۔ خریداری مراکز پر کاشتکاروں اور عملے کے تحفظ کیلئے ایس او پیز پرسختی سے عملدرآمد جاری رکھا جائے اور سینی ٹائزر کی موجودگی کو یقینی بنایا جائے۔ وزیراعلیٰ عثمان بزدار کی زیرصدارت اوکاڑہ میں اعلیٰ سطح کا اجلاس منعقد ہوا جس میں کورونا وائرس کی روک تھام کیلئے کئے جانے والے اقدامات، گندم خریداری مہم اور انسداد ڈینگی کے انتظامات کا جائزہ لیا گیا۔ صوبائی وزراءسید صمصام بخاری، نعمان لنگڑیال، اعجاز عالم، اراکین اسمبلی، تحریک انصاف کے ٹکٹ ہولڈرز ، تحریک انصاف کے ضلعی صدر و جنرل سیکرٹری اور انتظامی افسران نے اجلاس میں شرکت کی۔ وزیراعلیٰ عثمان بزدار نے اجلاس سے خطاب کرتے ہوئے کہا کہ منتخب نمائندے اور انتظامی افسران متاثرہ افراد کو ریلیف فراہم کرنے کیلئے کوئی کسر اٹھا نہ رکھیں۔ یہ وقت عوام کے ساتھ شانہ بشانہ کھڑا ہونے کا ہے۔ کورونا کے ساتھ انسداد ڈینگی، گندم خریداری مہم اور صفائی کے انتظامات کو خوب سے خوب تر بنایا جائے۔ عوام کے جان و مال کے تحفظ کیلئے پولیس جانفشانی سے فرائض سرانجام دے۔وزیراعلیٰ عثمان بزدار نے اوکاڑہ دیپالپور روڈ کی تعمیر و بحالی کا کام جلد شروع کرنے کا اعلان کیا اور سڑک کی تعمیر و بحالی کیلئے متعلقہ حکام کو ہدایات دیں۔ انہوں نے کہا کہ گورنمنٹ ڈگری کالج برائے خواتین دیپالپور میں عدم دستیاب سہولتیں ترجیحی بنیادوں پر مہیا کریں گے۔اوکاڑہ میں منتخب نمائندوں کی مشاورت سے ترقیاتی کام ہوں گے اور اوکاڑہ میں تعلیم، صحت اور دیگر سہولتوں کی بہتری کیلئے ہرممکن وسائل دیئے جائیں گے۔وزیراعلیٰ عثمان بزدار کو کورونا سے نمٹنے، مریضوں کے علاج معالجے، انسداد ڈینگی اور گندم خریداری مہم کے حوالے سے کئے جانے والے انتظامات کے بارے میں بریفنگ دی گئی۔وزیراعلیٰ عثمان بزدار نے آج چشتیاں کا بھی دورہ کیا اور احساس کفالت پروگرام کے تحت مالی امداد تقسیم کرنے کے سنٹر کا معائنہ کیا۔ وزیراعلیٰ عثمان بزدار نے سینٹر پر مالی امداد کی تقسیم کے عمل کا جائزہ لیا ۔ وزیراعلیٰ عثمان بزدار نے مستحق خواتین سے سینٹر میں فراہم کی جانے والی سہولتوں کے بارے میں دریافت کیا۔ خواتین نے سینٹر میں مہیا کی جانے والی سہولتوں پر اطمینان کا اظہار کیا اور کہا کہ ہمیں انتہائی شفاف طریقے سے مالی امداد مل رہی ہے اور ہم وزیراعظم عمران خان اور آپ کے شکرگزار ہیں۔ سینٹر میں ہمارے لئے ہر طرح کی سہولت فراہم کی گئی ہے۔ وزیراعلیٰ عثمان بزدار نے اس موقع پر گفتگو کرتے ہوئے کہا کہ احساس کفالت پروگرام کے تحت لاکھوں مستحق افراد میں اربوں روپے کی مالی امداد تقسیم کی جا چکی ہے۔ پاکستان کی تاریخ میں مالی امداد کی تقسیم کا ایسا شفاف پروگرام کبھی نہیں آیا۔مالی امداد کوئی احسان نہیں بلکہ یہ وہ حق ہے جو ریاست مستحق افراد کو لوٹا رہی ہے۔ وزیراعلیٰ عثمان بزدارنے تحصیل ہیڈ کوارٹر ہسپتال چشتیاں کا دورہ کیا۔ وزیراعلیٰ عثمان بزدار نے کورونا کے مریضوں کیلئے قائم وارڈ کا معائنہ کیا اور علاج معالجہ کے لئے سہولتوں کا بھی مشاہدہ کیا اور آئسولیشن وارڈ میں انتظامات کو مزید بہتر بنانے کی ہدایت کی۔وزیراعلیٰ عثمان بزدار نے کہا کہ تحصیل ہیڈ کوارٹر ہسپتال چشتیاں کو تمام ممکنہ وسائل دے کر بہتر بنائیں گے۔ ڈاکٹراور پیرا میڈیکل سٹاف کی کورونا مریضوں کے علاج معالجے کیلئے مثالی خدمات کو سراہتے ہیں۔ڈاکٹر اور پیرا میڈیکل سٹاف قوم کے محسن ہیں۔ یہ وقت دکھی انسانیت کی خدمت کا ہے۔ پنجاب حکومت ڈاکٹرز کی ہر ممکنہ حوصلہ افزائی جاری رکھے گی۔ وزیراعلیٰ عثمان بزدار نے دانش سکول چشتیاں میں شجرکاری مہم کے تحت سکول کے لان میں پودا لگایا۔ وزیراعلیٰ پنجاب سردار عثمان بزدار کی زیرصدارت چشتیاں میں اجلاس منعقد ہوا۔ وزیراعلیٰ عثمان بزدار نے اجلاس سے خطاب کرتے ہوئے کہا کہ چشتیاں سمیت بہاولنگر میں صحت کی سہولتوں کیلئے ضروری وسائل فراہم کریں گے۔پنجاب حکومت چیف منسٹر رمضان پیکج کے تحت مستحق افراد کو مالی امداد دے گی۔ انہوں نے کہا کہ احساس کفالت پروگرام پاکستان کی تاریخ کا سب سے شفاف پروگرام ہے۔ مالی امداد کی رقم اصل حقداروں تک پہنچائی جا رہی ہے۔لاک ڈاﺅن کے باعث عام آدمی کی مشکلات کا احساس ہے۔ انہوں نے کہا کہ صوبائی وزرائ، منتخب نمائندوں ، انتظامیہ اور پولیس نے موجودہ غیر معمولی حالات میں بہترین کام کیا ہے۔میں اپنی سیاسی اور انتظامی ٹیم کو شاباش دیتا ہوں۔ اراکین قومی و صوبائی اسمبلی نے وزیراعلیٰ عثمان بزدار کو بہاولنگر کے مسائل سے آگاہ کیا۔ اجلاس میں کورونا کی صورتحال، مریضوں کے علاج معالجے، گندم خریداری مہم اور انسداد ڈینگی کے اقدامات پر بریفنگ دی گئی۔ صوبائی وزیر شوکت علی لالیکا، طاہر بشیر چیمہ، شوکت بسرا ، بہاولنگر کے اراکین قومی و صوبائی اسمبلی،تحریک انصاف کے ٹکٹ ہولڈرز،تحریک انصاف کے ضلعی صدر ، جنرل سیکرٹری اور انتظامی و پولیس حکام نے اجلاس میں شرکت کی۔ وزیراعلیٰ عثمان بزدار نے آج ڈسٹرکٹ ہیڈکوارٹر ہسپتال ساہیوال کا دورہ کیا۔ وزیراعلیٰ عثمان بزدار نے ہسپتال میں کورونا کے مریضوں کیلئے بنائے جانے والے ایمرجنسی ڈیپارٹمنٹ کا افتتاح کیا اور ایمرجنسی ڈیپارٹمنٹ کے مختلف شعبے دیکھے۔وزیراعلیٰ عثمان بزدارنے ایمرجنسی ڈیپارٹمنٹ میں فراہم کی جانے والی طبی سہولتوں کا جائزہ لیا۔ وزیراعلیٰ عثمان بزدار نے میڈیا سے گفتگو کرتے ہوئے کہا کہ ڈسٹرکٹ ہیڈکوارٹر ہسپتال ساہیوال میں دل کے امراض کے علاج کیلئے سہولت موجود نہیں۔ انشاءاللہ اس ہسپتال میں کارڈیک سینٹر بنایا جائے گا اور ساہیوال میں چلڈرن ہسپتال بھی بنائیں گے۔ کارڈیک سینٹر اور چلڈرن ہسپتال پر اگلے مالی سال سے کام شروع ہوگا۔ انہوں نے کہا کہ کورونا پوری دنیا کا مسئلہ ہے۔ پنجاب میں اب تک 4111 متاثرہ مریض ہیں جبکہ 705 مریض صحت یاب ہو چکے ہیں۔محکمہ صحت کو اس وباءسے نمٹنے کیلئے فوری طور پر 14 ارب روپے کے فنڈز دیئے گئے ہیں جبکہ 62 کروڑ روپے ڈویژن کی سطح پر لیبز کے قیام کیلئے دیئے گئے ہیں۔پنجاب حکومت روزانہ کی بنیاد پر 3200 ٹیسٹ کرنے کی صلاحیت رکھتی ہے جسے ہم پہلے 5 ہزار اور پھر 10 ہزار تک بڑھائیں گے۔ انہوں نے کہا کہ گندم خریداری مہم جاری ہے اور 8 لاکھ 30 ہزار سے زائد کا باردانہ جاری ہو چکا ہے۔ حکومت کے مالی امداد پروگرام کے تحت آج تک 22 ارب 75 کروڑ روپے غریب لوگوں میں تقسیم کئے جا چکے ہیں۔ انہوں نے کہا کہ وزیراعظم عمران خان کے وژن کے مطابق پنجاب میں تعمیراتی سیکٹر کیلئے آسانیاں پیدا کر رہے ہیں اور اس سلسلے میں سٹیمپ ایکٹ میں ترمیم کی جا رہی ہے اور اس سلسلے میں پنجاب کابینہ سے منظوری لی جائے گی۔ اسی طرح پنجاب میں انسداد ذخیرہ اندوزی آرڈیننس 2020 کا اجراءکیا جا رہا ہے اور اس کی کابینہ سے منظوری حاصل کی جائے گی۔ انہوں نے کہا کہ ہماری پہلی اور آخری ترجیح اس وقت کورونا کا پھیلاﺅ روکنا ہے کیونکہ اس وباءکے باعث صورتحال بدل چکی ہے۔ بجٹ آنے والا ہے، ہم ترقیاتی منصوبوں کی طرف بھی توجہ دیں گے۔ وزیراعلیٰ عثمان بزدار نے کہا کہ صحافیوں کیلئے ہر ڈویژنل ہیڈکوارٹر میں صحافی کالونی بنائی جائے گی۔ اس سلسلے میں میں نے ہدایات جاری کردی ہیں۔ انہوں نے کہا کہ ڈاکٹروں اور پیرا میڈیکل سٹاف کیلئے حفاظتی لباس اور ضروری ساز و سامان کیلئے فنڈز جاری کر دیئے گئے ہیں اور ساہیوال کے ہسپتال میں بھی حفاظتی لباس مہیا کئے گئے ہیں۔ وزیراعلیٰ عثمان بزدار نے ڈپٹی کمشنر آفس ساہیوال میں کورونا کنٹرول روم کا معائنہ کیا۔ وزیراعلیٰ عثمان بزدار کو کنٹرول روم کے بارے میں بریفنگ دی گئی ۔ وزیراعلیٰ عثمان بزدار کی زیرصدارت سرکٹ ہاﺅس ساہیوال میں اعلیٰ سطح کا اجلاس منعقد ہوا جس میں صوبائی وزراءسید صمصام بخاری، نعمان لنگڑیال، اراکین اسمبلی، تحریک انصاف کے ٹکٹ ہولڈرز ، ضلعی صدر و جنرل سیکرٹری اور انتظامی و پولیس حکام نے اجلاس میں شرکت کی۔ اجلاس میں انسداد کورونا کیلئے کئے جانے والے اقدامات کا تفصیلی جائزہ لیا گیا۔ اجلاس میں گندم خریداری مہم اور ڈینگی کے سدباب کیلئے کئے جانے والے انتظامات بھی غور کیا گیا۔وزیراعلیٰ عثمان بزدار نے ہدایت کی کہ منتخب نمائندے اور انتظامی افسران عوام کی خدمت کیلئے کوئی کسر اٹھا نہ رکھیں۔ انہوں نے کہا کہ یہ وقت دکھی انسانیت کے دکھ بٹانے کا ہے۔

لاہور (جنرل رپورٹر) فوڈ پانڈا اور روڈ رنر ڈیلیوری کمپنیاں کرونا وائرس کے پھیلاﺅ میں سرفہرست ، کرونا وائرس کے خلاف حکومتی حکمت عملی ناکام ہو کر رہ گئی ، کرونا وائرس سے بچاﺅ کے لئے امریکہ ، برطانیہ سمیت یورپین ممالک ہر ممکن لائحہ عمل اپنانے پر مجبور ہوئے ، حکومت پنجاب اور متعلقہ ادارے فوڈ پانڈا اور روڈ رنر کے ڈیلیوری بوائز کو شہریوںمیں کھانا ڈیلیور کرنے کے ساتھ ساتھ کرونا وائر س منتقل کرنے کی کھلی چھٹی دے دی ، شہریوں نے فوڈ پانڈا اور روڈ رنر کے تمام ڈ یلیوری بوائز کے کرونا ٹیسٹ کروانے کا مطالبہ کر دیا ۔ بتایا گیا ہے کہ پاکستان سمت دنیا بھر میں کرونا وائرس سے لاکھوں لوگ متاثر ہو چکے ہیں اور لاکھوں افراد کی اموات واقع ہو چکی ہیں ۔ ترقی یافتہ ممالک بھی اس وبا سے محفوظ نہیں رہ سکے کیونکہ انہوں نے اس وائرس کے پھیلاﺅ کو سنجیدگی سے نہیں لیا تھا تا ہم پاکستان میں وفاقی حکومت کی جانب سے ہیلتھ ایمرجنسی تو نافذ کرنے کے ساتھ ساتھ بہتر حکمت عملی اپنائی گئی مگر پنجاب کے اندر لاک ڈاﺅن سے فائدہ اٹھانے اور شہریوں کی زندگیوں سے کھیلنے والی فوڈ پانڈا اور روڈ رنر جیسی کمپنیوں نے ذاتی مفاد کو آگے رکھتے ہوئے کرونا وائرس کے پھیلاﺅ میں سرفہرست سمجھی جا رہی ہے ۔ طبی ماہرین کا کہنا ہے کہ بیرون ملک سے آئے افراد کرونا وائرس پاکستان لائے اور خود متاثر ہونے کے علاوہ انہوں نے اپنے قریبی عزیزوں کو بھی وائرس منتقل کیا۔پاکستانی معاشرے میں میل ملاپ پر بہت زور رہتا ہے اور یہ وائرس اسی وجہ سے پھیل رہا ہے خاص طور پر جب فوڈ پانڈا اور روڈ رنر کے ڈیلیوری بوائز ایک گھر میں کھانا ڈیلیور کرتے ہیں اور وہاں سے اس کھانے کی قیمت وصول کرتے ہیں اس کے بعد پھر نئی ڈیلیوری دینے نکل جاتے ہیں انہوں نے نہ تو ماسک پہنا ہوتا ہے اور نہ ہی گلو ز اور دن بھر مختلف شاہراہوں پر پھرتے رہتے ہیں اور ان سے ہی کرونا وائرس صحت مند لوگوں تک پہنچتا ہے اور اسی لئے طبہ ماہرین معاشرتی دوری کی افادیت کو سامنے لے کر آتے ہیں ۔

اسلام آباد، لاہور (نمائند گان خبریں) قومی احتساب بیورو(نیب) نے کہا ہے کہ وہ آٹا اور چینی کے اربوں روپے کے اسکینڈل پر خاموش تماشائی کا کردار ادا نہیں کرسکتا۔ نیب نے آٹا اور چینی اسکینڈل کے حوالہ سے جامع، مفصل، آزادانہ اورقانون کے مطابق کاروائی کا فیصلہ کیا ہے، آٹا اور چینی کا اسکینڈل پرائم میگا اسکینڈل ہے ۔اربوں روپے کی ڈکیتی پر نیب خاموش تماشائی کا کردار ادا نہیں کرسکتا۔ نجی ٹی وی کے مطابق نیب اس وقت جامع تحقیقات کے حوالہ سے تمام قانونی تقاضوں کا جائزہ لے رہا ہے اور نیب کے اعلیٰ حکام اس پورے معاملہ پر گہری نظر رکھے ہوئے ہیں۔ نیب ذرائع نے نجی ٹی وی کو بتا یا ہے کہ نیب اس پورے معاملہ میں خاموش تماشائی کا کردار ادا نہیں کر سکتا کیونکہ اربوں روپے کی ڈکیتی کامعاملہ ہے اورآٹا اور چینی کا جو اسکینڈل ہے یہ پرائم میگا اسکینڈل ہے کیونکہ پہلے ہی نیب بہت سارے میگا اسکینڈلز کی تحقیقات کررہا ہے اور اب اس معاملہ کے بھی تمام قانونی پہلوﺅں کا گہرائی سے جائزہ لیا جارہا ہے اور قانونی جائزے کے بعد بھر پور ، جامع ، آزادانہ اور قانون کے مطابق نیب کاروائی کرنے کا ارادہ رکھتا ہے۔ قومی احتساب بیورو( نیب) لاہور نے کہا ہے کہ سابق وزیر اعلیٰ محمد شہباز شریف کے خلاف آمدن سے زائد اثاثہ جات اور مبینہ منی لانڈنگ کی تحقیقات آخری مراحل میں داخل ہو چکی ہیں تاہم قومی ادارے کو ان کی جانب سے تحقیقات میں تاحال عدم تعاون کا سامنا ہے،قومی ادارے کے ساتھ عدم تعاون کا مظاہرہ کرنے کی صورت میں قانون اپنا راستہ اپنانے پر حق بجانب ہو گا۔ اپنے بیان میں ترجمان نیب نے کہا کہ سابق وزیر اعلیٰ محمد شہباز شریف کیخلاف آمدن سے زائد اثاثہ جات اور مبینہ منی لانڈرنگ کے کیس میں جاری تحقیقات کے حوالے سے انہیں 17اپریل کو ذاتی حیثیت میں نیب انویسٹی گیشن ٹیم کے روبرو پیش ہونے کی ہدایت کی گئی تھی جس کے لئے ادارے کی پالیسی کے تحت انہیں باقاعدہ مفصل سوال نامہ بھی ارسال کیا تھا۔ نیب لاہور کو مذکورہ کیس منطقی انجام تک پہنچانے کیلئے ان سے مفصل و جامع جوابات درکار ہیں کیونکہ ان کے خلاف تحقیقات آخری مراحل میں داخل ہو چکی ہیں تاہم قومی ادارے کو ان کی جانب سے تحقیقات میں تاحال عدم تعاون کا سامنا ہے۔ نیب لاہور میں 17 اپریل کو پیش نہ ہونے اور کرونا وباءکا عذر پیش کرنے کی صورت میں نیب لاہور کی جانب سے انہیں دوبارہ 22 اپریل دن 12بجے نیب تفتیشی ٹیم کے روبرو پیش ہونے کا نوٹس ارسال کیا گیا ہے اور انہیں آگاہ کیا جاتا ہے کہ ان کی نیب لاہور میں پیشی کے موقع پر مکمل حفاظتی اقدامات اپنائے جائیں گے جن میں سوشل ڈسٹینسنگ ، ماسک و سینیٹائزر کا استعمال شامل ہو گا اگرچہ اس موقع پر اس بات کی وضاحت بھی کی جاتی ہے کہ قومی ادارے کے ساتھ عدم تعاون کا مظاہرہ کرنے کی صورت میں قانون اپنا راستہ اپنانے پر حق بجانب ہو گا۔