تازہ تر ین

عراق: کورونا سے متاثرہ مریضوں کے ہسپتال میں آتشزدگی، 82 افراد جاں بحق

عراق کے دارالحکومت بغداد میں وائرس سے متاثرہ مریضوں کے ہسپتال میں آتشزدگی کے نتیجے میں 82 افراد ہلاک اور 110 زخمی ہوگئے۔

غیرملکی خبررساں ادارے ‘رائٹر’ کے مطابق وزارت داخلہ کے ترجمان نے بتایا کہ ہسپتال میں کورونا وائرس کے مریضوں کے لیے بھی وارڈ تھا۔

ترجمان خالد المحنا نے سرکاری ٹیلی ویژن کو بتایا کہ ہمیں فوری طور پر مستقبل میں اس طرح کے دردناک واقعے سے بچنے کے لیے تمام ہسپتالوں میں حفاظتی اقدامات کا جائزہ لینا ہوگا.

اس حوالے سے ذرائع نے بتایا کہ عراقی دارالحکومت کے دیالہ پل کے علاقے میں ابن خطیب ہسپتال میں آکسیجن ٹینک پھٹنے سے آگ لگی۔

رائٹرز کے فوٹوگرافر نے بتایا بہت سی ایمبولینسز زخمیوں کو محفوظ مقام پر منتقل کررہی تھیں۔

طبی ذرائع نے بتایا کہ اس واقعے میں زخمی نہ ہونے والے مریضوں کو بھی ہسپتال سے باہر منتقل کیا گیا۔

دفاعی یونٹ کے سربراہ نے بتایا کہ یہ پلمونری انتہائی نگہداشت یونٹ کے لیے وارڈ میں آگ لگی اور 120 افراد میں سے 90 افراد کو بچایا لیا گیا۔

میجر جنرل کدھم بوہن نے مزید کہا کہ آگ بجھادی گئی ہے۔

دوسری جانب عراقی وزیر اعظم مصطفیٰ الکاظمی نے واقعے کی تحقیقات کا حکم دیا۔

انہوں نے کہا کہ اس طرح کا واقعہ غفلت کا ثبوت ہے لہذا میں نے ہدایت کی ہے کہ فوری طور پر تحقیقات کا آغاز کیا جائے اور ہسپتال کے منیجر اور سیکیورٹی اور مرکز کے سربراہوں کو بھی ان تمام افراد کے ساتھ حراست میں لیا جائے جب تک کہ ہم ان لاپرواہوں کی نشاندہی کریں اور احتساب کے دائرے میں لے کر آئیں۔

ایک عینی شاہد جو اپنے بھائی سے ملنے گیا تھا اس نے بتایا کہ آکسیجن کی ٹینکی پھٹنے سے آگ بھڑک اٹھی تو لوگوں نے کھڑکیوں سے گود کر جان بچائی اور اس دوران آگ کووڈ 19 کے مریضوں وارڈ میں تیزی سے پھیل گئی۔

دھماکے کے وقت وہاں موجود مریضوں میں سے ایک کے رشتہ دار نے بتایا کہ شروع میں ایک دھماکا ہوا اور آگ ایندھن کی طرح پھیل گئی۔

نہوں نے بتایا کہ ‘میرا بھائی بیمار تھا اور دھواں اس تک پہنچا چکا تھا میں اپنے بھائی کو سڑک پر لے گیا، پھر میں واپس آیا تب تک آخری منزل تک آگ نہیں پھیلی تھی اور میں نے دیکھا کہ ایک 19 سالہ لڑکی کا دم گھٹ رہا تھا اس کی موت ہونے ہی والی تھی’۔

انہوں نے بتایا کہ میں نے اسے اپنے کندھوں پر اٹھا لیا اور میں نیچے بھاگ گیا، لوگ چھلانگ لگا رہے تھے۔

وزارت صحت نے بتایا کہ عراق میں کووڈ 19 سے متاثرہ افراد کی کل تعداد 10 لاکھ 25 ہزار سے زائد ہے اور 15 ہزار 217 افراد جاں بحق ہوچکے ہیں۔

علاوہ ازیں پاکستان نے واقعہ پر عراق کی حکومت اورعوام سے اظہار تعزیت کرتے ہوئے کہا کہ ‘ہمارے نیک خواہشات اور دعائیں متاثرین اور ان کے اہل خانہ کے ساتھ ہیں’۔


اہم خبریں
   پاکستان       انٹر نیشنل          کھیل         شوبز          بزنس          سائنس و ٹیکنالوجی         دلچسپ و عجیب         صحت        کالم     
Copyright © 2016 All Rights Reserved