میزبان، اداکار و گلوکار فخر عالم شوٹنگ پر جاتے ہوئے بدترین ٹریفک حادثے کا شکار ہوگئے، جس وجہ سے ان کی گاڑی کو کافی نقصان پہنچا۔
فخر عالم نے اپنی متعدد ٹوئٹس میں اسلام آباد کے قریب گاڑی کو پیش آنے والے حادثے سے متعلق مداحوں کو آگاہ گیا اور ساتھ ہی ان کی گاڑی کو ٹکر مارنے والے ٹرک کی تصاویر بھی شیئر کیں۔
فخر عالم نے سلسلہ وار ٹوئٹس میں بتایا کہ چنیوٹ سے آنے والے ٹرک نے غلط یوٹرن لیتے ہوئے ان کی گاڑی کو ٹکر ماری، جس وجہ سے بال بال بچ گئے۔
اداکار و گلوکار نے حادثے کو خطرناک قرار دیتے ہوئے بتایا کہ خوشقسمتی سے انہوں نے حفاظتی بیلٹ پہن رکھی تھی، جس وجہ سے انہیں کافی نقصان نہیں پہنچا۔
فخر عالم کے مطابق ان کی گاڑی کو ٹکر مارنے والے ٹرک کے ڈرائیور کے پاس نہ تو ڈرائیونگ لائسنس تھا اور نہ ہی ان کے پاس شناختی کارڈ اور دیگر دستاویزات تھے۔
اداکار و گلوکار کا کہنا تھا کہ ڈرائیور نے انتہائی غفلت کا مظاہرہ کرتے ہوئے ان کی گاڑی کو ٹکر ماری، جس وجہ سے حادثہ پیش آیا اور ایسے ہی ڈرائیور ملک بھر میں ہونے والے خطرناک روڈ حادثات کا سبب بنتے ہیں۔
انہوں نے لوگوں کو بھی ہدایت کی کہ وہ دوران سفر یا ڈرائیونگ حفاظتی بیلٹ کا استعمال کریں اور غیر محتاط ڈرائیونگ کرنے والے افراد کی شکایت قانون نافذ کرنے والے اداروں سے کریں۔
فخر عالم نے قانون نافذ کرنے والے اداروں سے بھی التجا کی کہ وہ اس بات کو یقینی بنائیں کہ غیر تربیت یافتہ اور غیر محتاط انداز میں ڈرائیونگ کرنے والے افراد کے خلاف ایکشن لیں۔
فخر عالم نے مداحوں کو بتایا کہ ان کی گاڑی کو ٹکر مارنے والے ڈرائیور کی جانب سے معافی مانگے جانے اور اپنی غلطی کا تحریری اعتراف کیے جانے کے بعد ہی انہیں معاف کیا گیا، تاہم اس بات کو یقینی بنایا گیا کہ ڈرائیور دوبارہ ایسی غلطی نہ کرے اور باقی کا کام اسلام آباد پولیس سر انجام دے گی۔
