وزیراعظم عمران خان نےوزیراعلیٰ پنجاب سردارعثمان بزدار سے ملاقات کی ہے ۔
تفصیلات کے مطابق لاہورمیں وزیراعظم عمران خان نے وزیراعلیٰ پنجاب سردار عثمان بزدار سے ملاقات کی جس میں عثمان بزدار نے صوبے میں جاری ترقیاتی منصوبوں کے حوالے سے وزیراعظم کو آگاہ کیا ۔
ذرائع کے مطابق ملاقات میں پنجاب کے انتظامی امور، عوام کے ریلیف کے اقدامات، مہنگائی اور ذخیرہ اندوزی کے تدارک کے لائحہ عمل اور جاری ترقیاتی منصوبوں پر پیش رفت پر تفصیلی گفتگو ہوئی ہے۔
اس موقع پر عثمان بزدار نے وزیراعظم کو حکومت پنجاب کے انتظامی ڈھانچے کی بہتری کیلئے اٹھائے گئے اقدامات سے آگاہ کیا جن کو وزیرِ اعظم نے تسلی بخش قرار دیا۔
ذرائع کا کہنا ہے کہ ملاقات میں محرم الحرام کے دوران ایس او پیز پر سختی سے عملدرآمد کو یقینی بنانے کے حوالے سے بھی وزیر اعلیٰ پنجاب نے وزیر اعظم کو بریفنگ دی اور بھونگ میں مندر کی تعمیر اور اقلیتوں کے تحفظ کیلئے انتظامات کو مزید مستحکم کرنے کی حکمت عملی پر بھی بریفنگ دی ۔
اس موقع پربلدیاتی و کنٹونمنٹ بورڈ کے الیکشنز کے معاملے پر بھی بات چیت ہوئی ۔
