معروف ہسپانوی شو منی ہائسٹ کی ٹوکیو (ارسولا کوربیرو) نے بھارتی فلموں میں کام کرنے کی خواہش کا اظہار کیا ہے۔
چار سیزن پر مشتمل منی ہائسٹ کا 5 واں اور آخری سیزن اگلے ماہ ستمبر میں مداحوں کیلئے ڈیجیٹل پلیٹ فارم نیٹ فلکس پر ریلیز کیا جائے گا۔
ریلیز سے قبل ہسپانوی اداکارہ ارسولا کوربیرو نے بھارتی میڈیا کو انٹرویو دیا جس میں انہوں نے منی ہائسٹ کی دنیا بھر میں مقبولیت پر حیرانی کا اظہار کیا۔
انہوں نے کہا کہ بالی وڈ مایہ ناز انڈسٹری ہے اور میں اب تک کافی بھارتی فلمیں دیکھ چکی ہوں لیکن ان کے نام بھول جاتی ہوں، مجھے صرف ایک فلم کا نام یاد ہے جس کی میں بہت بڑی مداح بھی ہوں اور وہ ہے ‘سلم ڈاگ ملینئر’۔
اداکارہ کا کہنا تھا کہ اگر میرے پاس وقت ہوا تو میں ہندی زبان سیکھ کر بالی وڈ کی فلموں میں کام کرنا پسند کروں گی، میں اپنی اداکاری کو مخصوص نہیں کرنا چاہتی، مجھے چیلنجز پسند ہیں۔
انہوں نے بتایا کہ جب میں نے امریکا میں اپنی پہلی فلم کی تھی تب میری انگریزی اچھی نہیں تھی لیکن محنت کی اور اس میں اداکاری بھی کی۔
