وزیراعظم عمران خان نے کہا ہے کہ لوگوں کی جان و مال کا تحفظ حکومت کی بنیادی ذمہ داری ہے۔
تفصیلات کے مطابق وزیراعظم عمران خان کی زیر صدارت اجلاس ہوا جس میں اجلاس میں یونیورسل پاکستان ایمرجنسی ہیلپ لائن (PEHEL) -911 کے قیام کے بارے میں وزیر اعظم کو اپ ڈیٹ سے آگاہ کیا گیا۔
اجلاس میں وزیراعظم کو بریفنگ دیتے ہوئے کہا گیا کہ بین الصوبائی رابطوں سمیت تمام ضروری کام مکمل ہوچکا ہے، اکتوبر 2021 کے پہلے ہفتے تک ہیلپ لائن باقاعدہافتتاح کے لیے تیار ہو گی۔
اس موقع پر وزیراعظم عمران خان نے کہا کہ حکومت جرائم کی روک تھام کے لیےیونیورسل پاکستان ایمرجنسی ہیلپ لائن-911 کا اجراء کرے گی۔
عمران خان نے یہ بھی کہا کہ متعلقہ حکام ملک میں جرائم پر قابو پانے کے لیے جلد از جلد سروس کے آغاز میں تمام رکاوٹوں کو دور کریں، لوگوں کی جان و مال کا تحفظ حکومت کی بنیادی ذمہ داری ہے۔
وزیراعظم عمران خان نے مزید کہا کہ اس ہیلپ لائن کے اجراء سے ملک میں امن و سلامتی کو یقینی بنانے میں مدد ملے گی جبکہ جرائم کے خلاف بروقت کارروائی عمل میں لائی جا سکے گی۔
اجلاس میں وزیر داخلہ شیخ رشید احمد ، معاون خصوصی ڈاکٹر شہباز گل ، سیکرٹری داخلہ ، وزارت داخلہ ، وزارت انفارمیشن ٹیکنالوجی اور ٹیلی کمیونیکیشن کے متعلقہ افسران نے شرکت کی جبکہ چیئرمین پاکستان ٹیلی کمیونیکیشن اتھارٹی, چیئرمین نادرا ، چیف کمشنر اسلام آباد، ڈی جی نیشنل ٹیلی کمیونیکیشن کارپوریشن بھی اجلاس میں شریک ہوئے۔
