کووڈ 19 کی چوتھی لہر نے یورپ بھر کو ایمرجنسی صورتحال میں مبتلا کردیا ہے۔
جرمن ایوان بالا نے کووڈ 19 کے پھیلاؤ کو روکنے کیلیے آج ایوان زیریں کی جانب سے دی گئی مجوزہ تدابیر کے نفاذ کی بھی منظوری دے دی۔ جرمن چانسلر اینگلا مرکل اور 16 اسٹیٹس کے سربراہوں نے نئی حفاظتی تدابیر نافذ کرنے کی منظوری دے دی۔ ’’2 جی‘‘ نامی پابندی کے تحت صرف صحتیاب اور ویکسین شدہ جرمن شہری آزادانہ نقل و حرکت کرسکیں گے۔
جرمن وزیر صحت جینز سپان کا کہنا ہے کہ گزشتہ ہفتے کے دوران کووڈ 19 کیسز کی صورتحال بدترین ہوچکی ہے اور مکمل لاک ڈاؤن کو خارج از امکان نہیں کہا جا سکتا۔ جرمنی کے اسپتالوں میں روزانہ اوسطاً 65 ہزار کووڈ کیسز لائے جارہے ہیں۔
اُدھر آسٹریا میں کووڈ 19 کے بڑھتے کیسز کے باعث چانسلر الیگزینڈر شیلنبرگ کی جانب سے پیر سے مکمل لاک ڈاؤن کا نفاذ کردیا گیا ہے۔ آسٹرین چانسلر الیگزینڈر شیلنبرگ کا کہنا ہے کہ ہم کووڈ 19 کی پانچویں اور چھٹی لہر نہیں چاہتے اس لیے آسٹریا میں اگلے سال فروری سے ویکسین کو بھی لازمی قرار دے دیا جائے گا۔
آسٹریا میں 10 روزہ لاک ڈاؤن کے دوران شہری کام، ضروری خریداری جیسے خوراک اور ادویات اور ایکسرسائز کے علاوہ گھروں سے باہر نہیں نکل سکیں گے۔ فی الحال اسکولوں کو بند نہیں کیا گیا مگر والدین سے کہا گیا ہے کہ ہوسکے تو بچوں کو گھر پر ہی رکھا جائے۔
8،99 ملین آبادی کے چھوٹے سے ملک آسٹریا میں روزانہ ایک لاکھ میں سے اوسطاً 1000 افراد کووڈ 19 کا شکار بن رہے ہیں۔
