پاکستان اور بنگلا دیش کے مابین پہلے ٹیسٹ کے تیسرے روز کا کھیل اختتام پذیر ہوگیا ۔
میزبان ٹیم نے دوسری اننگز میں 4وکٹوں کے نقصان پر 39رنز بنالئےاور پاکستان کے خلاف 83رنز کی برتری حاصل کرلی ہے۔
مشفق الرحیم 12اور یاسر علی 8 رنز بنا کر کریز پر موجود ہیں جبکہ شاہین آفرید ی نے 3 اور حسن علی نے 1 وکٹ حاصل کی۔
قبل ازیں چٹاگانگ ٹیسٹ کے تیسرے روز پاکستان ٹیم پہلی اننگز میں 286 رنز بنا کر آؤٹ ہو گئی تھی۔
بنگالی ٹائیگرز کا دوسری اننگز میں ٹاپ آرڈر فلاپ ہو گیا، شادمان اسلام 1، نجم الحسین شانتو اور مومن الحق صفر رنز پر آوٹ ہوئے، سیف حسن 18 رنز بنا سکے۔
چٹا گانگ ٹیسٹ کے تیسرے دن پاکستان نے بغیر کسی نقصان 145رنز پر اننگز کا آغاز کیا تھا، ڈیبیو میچ کھیلنے والے عبداللہ شفیق 52 رنز بنا کر آؤٹ ہوئے، اظہر علی بغیر کوئی رن بنائے پویلین واپس لوٹ گئے، ابتدائی دو وکٹوں کے بعد عابد علی نے شاندار سنچری بنائی، بنگلا دیش کے خلاف اوپنر نے کیریئر کی چوتھی سنچری اسکور کی، بابر اعظم 10 رنز بنا کر مہدی حسن کی گیند پر آؤٹ ہو گئے۔
کپتان کے بعد پویلین لوٹنے والوں کی لائن لگ گئی، فواد عالم 8 ، محمد رضوان 5، حسن علی 12 ، ساجد خان 5 اور نعمان علی صرف 9 رنز بنا سکے۔ پوری شاہین ٹیم 286 رنز بنا کر آوٹ ہو گئی۔ بنگالی باولرز تاج الاسلام نے 7، عبادت حیسن نے 2 جبکہ مہدی حسن میراز نے 1 وکٹ حاصل کی۔
گذشتہ روز بنگلا دیش کے 330 رنز کے جواب میں پاکستان نے کھیل کے اختتام پر بغیر کسی نقصان کے 145 رنز بنائے تھے۔ اس سے قبل بنگلادیش نے اپنی نامکمل اننگز کا آغاز کیا تو لٹن داس 113 اور مشفیق الرحیم 82 رنز پر بیٹنگ کر رہے تھے۔ تاہم کھیل کے دوسرے ہی اوور میں حسن علی نے سنچری اسکور کرنے والے لٹن داس کو ایک رن کے اضافے کے بعد 114 رنز پر ایل بی ڈبلیو کر دیا۔ لٹن داس اور مشفیق الرحیم کے درمیان 206 رنز کی شراکت ہوئی۔
اگلے آنے والے بیٹر یاسر علی کو بھی حسن علی نے 4 رنز پر بولڈ کر دیا جبکہ مشفیق الرحیم 91 رنز بنا کر فہیم اشرف کی گیند پر وکٹوں کے پیچھے کیچ آؤٹ ہو گئے۔ شادمان اسلام، سیف حسن اور نجم الحسین 14، 14 رنز بنا کر پویلین لوٹے۔ مہدی حسن 38 رنز بنا کر ناٹ آؤٹ رہے۔ پاکستان کی جانب سے حسن علی نے 5 وکٹیں حاصل کیں۔ شاہین شاہ آفریدی اور فہیم اشرف نے 2، 2 کھلاڑیوں کو آؤٹ کیا۔ ایک وکٹ ساجد خان کے حصے میں آئی
تیسرے روز کا کھیل ختم،بنگلا دیش کے پاکستان کیخلاف 4وکٹوں پر 39رنز
