جاپان نے افغانستان کے لیے 10 کروڑ ڈالر امداد بھیجنے کا فیصلہ کیا ہے۔
جاپانی میڈیا کے مطابق حکومت کی جانب سے افغانستان کے لیے 100 ملین ڈالر مالیت کا تازہ پیکیج دینے کا فیصلہ کیا گیا ہے۔
حکومتی عہدیدار کا کہنا ہے کہ افغان عوام کی امداد کا مقصد ملک اور گرد و نواح کے خطے میں استحکام لانا ہے۔
واضح رہے کہ پاکستان سمیت کئی ممالک اس مشکل وقت میں افغانستان کی امداد کر رہے ہیں۔ وزیر اعظم عمران خان نے انسانی بنیاد پر افغانستان کےلیے پانچ ارب روپے امداد کی منظوری دے رکھی ہے جس میں 50 ہزار میٹرک ٹن گندم اور ادویات و میڈیکل کا سامان شامل ہے۔
روس کی جانب سے انسانی امداد پر مشتمل سامان کی پہلی کھیپ کابل پہنچ چکی ہے۔ چند دنوں کے دوران ایران، پاکستان، ازبکستان، چین اور قطر سمیت کچھ ممالک نے افغانستان کو انسانی امداد اور طبی سامان کی فراہمی میں تعاون کیا ہے۔
