نئی دہلی: (ویب ڈیسک) بالی ووڈ اداکارہ جوہی چاؤلہ کو 5 جی ٹیکنالوجی کیس میں عدالت سے بڑا ریلیف مل گیا۔ ہائی کورٹ نے 5 جی ٹیکنالوجی کیس میں بالی ووڈ اداکارہ جوہی چاؤلہ کے جرمانے کو 20 لاکھ سے کم کرکے 2 لاکھ کرنے کی تجویز دی ہے۔ بھارتی میڈیا کے مطابق دہلی ہائی کورٹ کا کہنا ہے کہ وہ اداکارہ جوہی چاؤلہ کا جرمانہ 20 لاکھ سے کم کرکے 2 لاکھ روپے کرسکتی ہے اگر اداکارہ اپنی پوزیشن کو استعمال کرتے ہوئے معاشرے میں عوامی کام کرے۔ اس حوالے سے عدالت نے ایک پروگرام تجویز کیا ہے جس کے تحت دہلی اسٹیٹ لیگل سروس اتھارٹی اداکارہ سے فلاحی مقصد کے کاموں میں شعور اجاگر کرنے کے حوالے سے رابطہ کرے۔ جسٹس وپن سنگھی اور جسٹس جسمیت سنگھ پر مشتمل دو رکنی بینچ نے دوران سماعت اداکارہ کے وکیل سے کہا ہے کہ ہم اداکارہ پر عائد جرمانے کو مکمل طور پر ختم تو نہیں کریں گے لیکن اس میں کمی کردیں گے۔ لیکن اس کے ساتھ ایک اور شرط عائد ہوتی ہے آپ کی کلائنٹ ایک مشہور اداکارہ ہے جنہیں عوام بہت اچھی طرح جانتی ہے۔ لہذا جوہی چاؤلہ کو عوامی کام کرنے ہوں گے۔ انہیں اپنی ساکھ کو معاشرے میں اچھے کام کرنے اور اچھے مقاصد کے لیے استعمال کرنا چاہئے۔ واضح رہے کہ گزشتہ برس کے وسط میں اداکارہ جوہی چاؤلہ نے بھارت میں 5 جی ٹیکنالوجی کے استعمال کے خلاف عدالت سے رجوع کیا تھا جس پر دہلی ہائی کورٹ نے اداکارہ کی درخواست مسترد کرتے ہوئے ان پر 20 لاکھ روپے جرمانہ عائد کردیا تھا
