پٹیالہ: (ویب ڈیسک) بھارت میں ایک اور کبڈی پلیئر کو بے دردی سے جھگڑے کے دوران قتل کر دیا گیا۔
خیال رہے کہ گذشتہ ماہ بھارتی پنجاب ہی کے علاقے جالندھر میں کبڈی کے بین الاقوامی کھلاڑی سندیپ سنگھ ننگل کو چار افراد نے فائرنگ کرکے قتل کردیا تھا۔
پولیس نے سندیپ سنگھ کے قتل میں ملوث چار افراد کو گرفتار کرلیا ہے اور کینیڈا میں مقیم ایک انڈین شہری کو اس کیس میں مفرور قرار دیا گیا تھا۔
بھارتی میڈیا رپورٹس کے مطابق کبڈی کے کھلاڑی دھرمیندر سنگھ کو پنجابی یونیورسٹی کے سامنے گولی مار کر ہلاک کیا گیا۔
پولیس ذرائع کے مطابق دھرمیندر سنگھ کے گاؤں کے ایک گروہ کی پڑوسی گاؤں کے ایک گروہ سے لڑائی ہوئی تھی اور گذشتہ شب دھرمندر اس معاملے کوسلجھانے گئے تھے جب انہیں گولی ماری گئی۔
رپورٹس میں بتایا گیا کہ گذشتہ رات قتل ہونے والے دھرمیندر سنگھ سیاست میں بھی کافی متحرک تھے، پنجاب میں ہونے والے حالیہ انتخابات سے قبل انہوں نے’شرومانی اکالی دل‘ کو چھوڑ کر اروند کیجریوال کی عام آدمی پارٹی میں شمولیت اختیار کی تھی۔
