لاہور: (ویب ڈیسک) پاکستان کرکٹ بورڈ (پی سی بی) نے دنیا میں کورونا کی صورتحال کے سبب 2 برس قبل کرکٹ مقابلوں میں اپنایا جانے والا بائیو سیکور ببل ماحول ختم کرنے کا اعلان کردیا۔
پاکستان کرکٹ بورڈ کے ترجمان سمیع برنی نے بائیو سیکور ببل ختم کرنے کی تصدیق کرتے ہوئے کہا کہ یہ فیصلہ کوویڈ 19 کی صورتحال میں بہتری کے بعد کیا گیا ہے، کورونا کے آغاز پر پی ایس ایل کے میچز بند دروازوں میں کروا کر پی سی بی بائیو سیوکر ببل ماحول اپنانے والا دنیا کا پہلا کرکٹ بورڈ بنا تھا۔
بورڈ کے اس تاریخی فیصلے کے بعد مقابلوں میں شریک کرکٹرز اب کمروں میں بند نہیں رہیں گے، اس کا اطلاق سری لنکا ویمن کرکٹ ٹیم کے دورہ پاکستان سے ہوگا جبکہ حالات موزوں ہونے پر جون میں ویسٹ انڈیز کے خلاف ون ڈے انٹرنیشنل ہوم سیریز بھی بائیو سیکور ببل ماحول سے آزاد ہوگی۔
بورڈ کے ترجمان کا کہنا ہے کہ کھلاڑیوں اور آفیشلز کو احتیاطی تدابیر اپناتے ہوئے سماجی فاصلہ رکھنے سمیت دیگر اقدامات کرنے کی ہدایت جاری کی جائے گی۔
انہوں نے کہا کہ دوران مقابلہ کسی بھی کھلاڑی یا آفیشل میں علامات ظاہر ہونے پر رپیپڈ ٹیسٹ کا نتیجہ مثبت آنے کی صورت میں ضابطہ کے مطابق پی آر سی ٹیسٹ کے بعد آئسولیٹ کردیا جائے گا۔
ایک سوال کے جواب میں بورڈ کے ترجمان کا کہنا تھا کہ پاکستان کپ کے فائنل میں بائیو سیکور ببل ماحول ختم کرنے کا تجربہ کیا گیا تھا، اس تجربہ میں کامیابی پر کرکٹ ایونٹس میں بائیو سیکورببل جاری نہ رکھنے کا فیصلہ ہوا ہے۔
