لاہور: (ویب ڈیسک) وزیر اعلیٰ پنجاب چودھری پرویز الٰہی نے اپنا ہیلی کاپٹر سیلاب متاثرین کے لئے وقف کرنے کا اعلان کردیا۔
چودھری پرویز الٰہی کے زیر صدارت صوبائی کابینہ کا دوسرا اجلاس ہوا، اجلاس میں پنجاب کابینہ نے سیلاب متاثرین سے مکمل یکجہتی کا اظہار کرتے ہوئے ایک ماہ کی تنخواہ متاثرین کی مدد کے لیے دینے کا اعلان کردیا۔
اس موقع پر وزیر اعلیٰ پنجاب نے کہا کہ میرا ہیلی کاپٹر مصیبت زدہ بہن بھائیوں کو ریلیف دینے کے لئے استعمال کیا جائے۔
چودھری پرویز الٰہی کے زیر صدارت کابینہ اجلاس میں سیلاب سے متاثرہ دیگر صوبوں کی ضروریات پوری کرنے کا فیصلہ کیا گیا۔
انہوں نے کہا کہ پنجاب حکومت بلوچستان، سندھ اور خیبر پختونخوا کے سیلاب متاثرین کیلئے ادویات اور میڈیکل سٹاف بھجوائے گی، بلوچستان، سندھ اور خیبرپختونخوا کے سیلاب متاثرہ بہن بھائیوں کے ساتھ ہیں، پنجاب حکومت دیگر صوبوں کے ساتھ کھڑی ہے، پنجاب کابینہ نے راجن پور، ڈیرہ غازی خان اور میانوالی کے سیلاب متاثرہ علاقوں کو آفت زدہ قرار دینے کے فیصلے کی توثیق بھی کردی۔
وزیراعلیٰ چودھری پرویز الہٰی نے ریلیف کی سرگرمیو ں کو منظم انداز میں مزید تیز کرنے کی ہدایت کرتے ہوئے کہا کہ متاثرہ علاقوں میں ضرورت کے مطابق ٹینٹ، فوڈ ہیمپرز او ردیگر ضروری سامان مہیا کیا جائے گا، گھروں، فصلوں اور لائیو سٹاک کو پہنچنے والے نقصانات کا بھی ازالہ کریں گے۔
