نیودہلی: (ویب ڈیسک) بھارتی ریاست بہار میں زہریلی شراب پینے سے 20سے زائد افراد جان کی بازی ہار گئے۔
بھارتی میڈیا کے مطابق ریاست بہار کے ضلع سارن میں شراب پینے سے متعدد افراد کی حالت خراب ہوئی تھی جنہیں فوری طور پر ہسپتال منتقل کیا گیا تھا۔
میڈیا رپورٹس کے مطابق تین افراد ہسپتال جاتے ہوئے راستے میں ہی دم توڑ گئے جبکہ دیگر اموات کل اور آج رپورٹ ہوئی ہیں۔ تاہم مقامی میڈیا نے ہلاک ہونے والوں کی تعداد 31 بتائی ہے۔
بھارتی میڈیا کے مطابق واقعے کے بعد پولیس نے شراب کی غیر قانونی دکانوں کے خلاف کریک ڈاؤن کرتے ہوئے متعدد افراد کو گرفتار کر لیا ہے۔
یاد رہے کہ رواں برس جولائی میں بھارتی ریاست گجرات میں کچی شراب پینے سے 42 افراد ہلاک ہوگئے تھے جبکہ گزشتہ برس بھارتی ریاست پنجاب میں ایسے ہی ایک واقعہ میں کم از کم 100 افراد جان کی بازی ہار گئے تھے۔
