برلن : (ویب ڈیسک) امریکی ریاست ٹیکساس سے جرمنی کیلئے پرواز بھرنے والے جرمن ائیرلائن کمپنی کے طیارے میں اچانک پیدا ہونے والی ہنگامی صورتحال کے باعث 7 افراد زخمی ہوگئے۔
غیر ملکی میڈیا رپورٹس کے مطابق امریکی فیڈرل ایوی ایشن ایڈمنسٹریشن (ایف اے اے) کے مطابق لفتھانسا کے ائیر بس A330 کو 37 ہزار فٹ کی بلندی پر اچانک ائیر ٹربیولنس کی وجہ سے ہنگامی صورتحال کا سامنا ہوا جس کے باعث طیارے میں سوار 7 مسافر زخمی ہوگئے۔
جرمن ائیر لائن کی جانب سے جاری بیان میں کہا گیا ہے کہ جہاز کے اڑان بھرنے کے 90 منٹ بعداسے ائیر ٹربیولنس کا سامنا ہوا جس کے باعث جہاز کو ہنگامی بنیادوں پر بحفاظت لینڈ کروا لیا گیا تھا، مسافروں اور عملے کی حفاظت ہماری اولین ترجیح ہے، واقعے میں مسافروں کو معمولی چوٹیں آئی ہیں تاہم زخمی مسافروں کو طبی امداد دے دی گئی ہے۔
ٹربیولنس دراصل ہوا کے غیر مستحکم بہاؤ کو کہا جاتا ہے جس کی پیش گوئی مشکل ہوتی ہے، کئی لوگ اسے طوفان سے بھی تشبیہ دیتے ہیں تاہم سب سے خطرناک ’کلیئر ائیر ٹربیولنس‘ ہوتی ہے جس کے بارے میں اندازہ لگانا مشکل ہوتا ہے اور فضا میں بھی اس کے آثار کا مشاہدہ بھی نہیں کیا جا سکتاہے ۔
امریکا سے جرمنی جانیوالے طیارے کی ہنگامی لینڈنگ ، 7 افراد زخمی
