اسلام آباد: (ویب ڈیسک) وفاقی وزیر اطلاعات مریم اورنگزیب نے کہا ہے کہ وزیراعظم شہباز شریف ‘عظمت شہداء کنونشن’ میں سانحہ 9 مئی کی مذمت اور شہدا، غازیوں کو خراج عقیدت پیش کریں گے۔
سماجی رابطے کی ویب سائٹ ٹوئٹر پر اپنے پیغام میں وفاقی وزیر اطلاعات مریم اورنگزیب نے کہا کہ شہدائے وطن کو پوری قوم کی طرف سے سلام عقیدت پیش کرنے اور ان سے یک جہتی کیلئے آج منگل کو عظمت شہداء کنونشن کا انعقاد ہوگا۔
انہوں نے مزید کہا کہ عظمت شہداء کنونشن اسلام آباد کنونشن سینٹر میں منعقد ہوگا جس میں شہداء کے اہل خانہ بھی شریک ہوں گے۔
